Mətn ölçüsü:
  • 100%

Rejissor Orxan Mərdan: \"Kino Mərkəzi mənə də borcludur\"

Xəbər verdiyimiz kimi rejissor Emil Quliyev Nizami Kino Mərkəzindən pulunu ala bilmədiyini, bu pulun qurumun işıq puluna ödənildiyini iddia edib. Ardınca bir sıra rejissor və prodüser onun dediklərində həqiqət olduğunu bildiriblər.

Ölkə.azbildirir ki, bu barədə prodüser-rejissor Orxan Mərdan qeyd edib:

“Borclu borclunun sağlığını istəyər. Mənə də borcludurlar. Mən bağışladım, sən də bağışla. Məsələ odur ki, borcu istəməyə direktor yoxdur. Gün o gün olsun direktor təyin olunsun, onların borcu qədər direktora qonaqlıq verim”.

Qeyd edək ki, Nizami Kino Mərkəzinin mətbuat katibi Arzu Əhədova Ölkə.Az-a açıqlamasında ödənişin verilmədiyini təsdiqləyib. O, sözügedən vəziyyəti maliyyə çətinlikləri ilə əlaqələndirib:

"Kinoteatr pandemiyadan sonra yaxşı işləmir. Problemlər, kommunal borclar var. Amma bu o demək deyil ki, biz nəyisə ödəməkdən imtina edirik.

Düzdür, bu dəqiqə vəziyyətimiz elə deyil ki, ödəmələri aparaq, amma borc bizim borcumuzdur, onu da kinoteatr ödəyəcək".

Mərkəzin əməkdaşı E.Quliyevin "əslində, pulu almaq fikrim də yoxdur" sözlərinə də münasibət bildirib:

"Niyə ödəmirik? Bu elə-belə baş verən bir şey deyil. Bizim onunla müqaviləmiz var. Müqavilə əsasında onsuz da ödəmələrimizi aparmalıyıq. Sadəcə, hazırda apara bilmirik". 

A.Əhədova nə qədər məbləğdən söhbət getdiyini və Mərkəzin zərərini açıqlamayıb:

"Ödənilməli olan məbləğ, əslində, böyük deyil, amma biz onu deyə bilmərik.  

Onunla münasibətimiz çox yaxşıdır. "Mən burada tək olmuşam" filmi Emil bəyin bizim kinotetarda yayımlanan birinci filmi deyil. Onun "Pərdə" və "İkinci pərdə" filmləri də  bizdə təqdim olunub. Hamısının da ödənişi  edilib. İndi vəziyyət bir az belədir deyə yubanır", - deyə o əlavə edib.