Ümid Partiyasının Elat bayramı münasibətilə təbrik mesajı

5-ci Elat bayramında iştirakım Elata ilk gəlişim idi və təbii ki,əvvəlki illərdə iştirak etməməyimin təəsüfünü yaşadım. Etiraf edirəm ki, Başkeçidin Armudlu yaylağında təqribən 7 saatlıq bir zaman kəsiyində sərgilənən möhtəşəm mənzərəni izləmək olduqca qürurverici idi. Artıq 5-ci ildir ki, Borçalı ictimai cəmiyyəti öz imkanları çərçivəsində bu vacib missiyanı yerinə yetirir və mence Elat bayramı hər il daha çox kütləvilik qazanır. Həmin mərasimdə Güney Azərbaycandan, Türkiyədən sənət adamları və şairlər, Quzey Azərbaycanın ayrı-ayrı şəhərlərindən, habelə xaricdə yaşayan əslən Borçalıdan olan soydaşlarımız iştirak edirdilər. Güneyli şair, dəyərli dostum Huşəng Cəfərini orada görmək isə mənim üçün başqa bir bayram əhval-ruhiyyəsi yaratdı. Azərbaycanın bəzi diaspora və qeyri-hökumət təşkilatları, o cümlədən DAK və Beynəlxalq Diaspora mərkəzindən əlavə Türkiyədən Sərhəd boyları dərnəyi, Tərəkəmə Qarapapaq dərnəyi rəhbərlərinin Elatdakı iştirakı da xüsusi qeyd olunmalıdır. Eyni zamanda Gürcüstan parlamentinin deputatı, soydaşımız Mahir Dərziyev də Elatda idi. Çox səmimi görüşlərimiz oldu. Təbii ki, birliyimizi yaşadan , habelə Türkiyə , Gürcüstan və Azərbaycan arasındakı münasibətlərin daha da möhkəmləndirilməsinə xidmət edən bu tədbir barədə yalnız xoş sözlər deyə bilərik. Elatda üç ölkənin bayraqlarının dalğalanması həm də Cənubi Qafqazda inteqrasiya imkanlarının artırılması istiqamətində nümunə olacaq davranışdır. Bunu da nəzərə almalıyıq ki, mədəni tədbirlər siyasilərin aça bilmədikləri qapıları çox rahatlıqla aça bilir. Elat bayramı da Azərbaycanla Gürcüstan arasındakı münasibətlərin inkisafina yalnız dəstək ola bilər. Bu tandeme Türkiyəni də əlavə etsək bu üçbucaq gələcəkdə Cənubi Qafqaz regionundakı durumun bölgə xalqlarının xeyrinə daha da yaxşılaşmasında çox təsirli ola bilər. Eyni zamanda Elat günü Borçalıda yaşayan soydaşlarımız üçün də bir yaşam, varlıq stimuludur. Ən azı ildə bir dəfə ayrı-ayrı ölkələrdə yaşayan soydaşlar Borçalıya gəlib birlik, bərabərlik mesajı verirlər. Borçalı əhalisi həmin gün özünə, öz varligina inam hissi yaşayır. Ona görə mən belə düşünürəm ki , Azərbaycandakı siyasi partiya və ictimai təşkilatların soydaşlarımız üçün önəmli olan belə bir gündə Borçalı cəmiyyətinin səsinə səs verib, Armudlu yaylağında olması vacibdir. Elat bayramı həm də bütövlükdə milli birliyimiz üçün məhək sayıla bilər. Bu birlik isə bizə bu gün hər zamankından daha vacibdir.