İlham Əliyevin seçkilərdə hər hansı ciddi rəqibinin olması düşünülə bilməz - Fərhad Mehdiyev

“Növbədənkənar prezident seçkilərinin ehtimal olunan səbəbləri və bu seçkiləri müşayiət edən hallar da ayrıdır. Halları səbəblərə qatmayaq”.

Ölkə.Az xəbər verir ki, bu sözləri politoloq Fərhad Mehdiyev deyib. O bildirib ki, hazırda Prezident İlham Əliyevin reytinqi olduqca yüksəkdir və ona qarşı hər hansı ciddi rəqibin olması düşünülə bilməz:

“Digər tərəfdən, İlham Əliyevdən başqa ölkədə hansısa siyasətçinin reytinqi hazırkı prezidentin reytinqi ilə nəinki yarışa bilmir, hətta seçicilərin 20% səsinin toplaya biləcəyi inandırıcı görünmür. 

Lakin bu o demək deyil ki, növbədənkənar seçkilərin keçirilməsinin səbəbi Prezidentin yüksək reytinqidir”. 

F.Mehdiyevin sözlərinə görə, regionda ciddi konyektur və geosiyasi dəyişikliklərin olması ehtimal daxilindədir:

“Azərbaycan Prezidenti beynəlxalq aktorlarla danışıqlar masasında daha güclü bir “background”a oturmaq istəyir - daha yuxarı faizlə xalq dəstəyi və daha uzun müddətlik (7 il) xalqı təmsil etmə hüququ. 

Oktyabr 2020-ci ildə anladıq ki, növbədənkənar parlament seçkilərinin səbəbi nə imiş. 
Növbədənkənar prezident seçkilərinin səbəbinin də daha dəqiq anlaşılması yenə müəyyən müddət sonra baş verəcək.

Hər halda 2024-ün martında Putin öz istəyi ilə vəzifəni başqasına ötürməsə, hakimiyyətdən getməsi gözlənilmir.

Habelə, istisna edilmir ki, növbədənkənar prezident seçkilərindən sonra 2025-ci ilin noyabr ayı gəlmədən növbədənkənar parlament seçkiləri keçirilsin”.

Qeyd edək ki, 2024-cü il fevralın 7-də Azərbaycanda növbədənkənar Prezident seçkiləri keçiriləcək.

Ölkə.Az