Gəncədə aksiya keçirən kəlbəcərli köçkünlər əslində nə istəyir?

İyulun 26-na keçən gecə Gəncə şəhərində məskunlaşan məcburi köçkünlər aksiya keçirib. Yeni salınan yaşayış kompleksində yaşayanların aksiya keçirməsinin səbəbini yaxınlıqda yerləşən Alüminium zavodundan çıxan tüsütnün yaratdığı xoşagəlməz halla əlaqəli olduğu bildirilir. Məsələ ilə bağlı Gəncə şəhərində yerləşən Kəlbəcər rayon İcra Hakimiyyəti ilə əlaqə saxlamaq cəhdlərimiz boşa çıxsa da, oradakı vətəndaşlardan bəzi məlumatlar əldə edə bildik. 

Ölkə.Az-ın modern.az-a istinadən əldə etdiyi məlumata görə, əslində məcburi köçkünlərin davası evlə bağlıdır. Belə ki, yaşayış kompleksinin davamı olaraq orada yeni evlər tikilir. Həmin insanlar da daha çox otaqlı ev əldə etmək üçün haray salıblar. Belə ki, gecə saatlarında 50 nəfərə yaxın məcburi köçkün küçəyə çıxaraq yolu bağlayıb və maşınları daşlamağa başlayıb. 20 dəqiqqəyə qədər davam edən insidentdən sonra Gəncə və Kəlbəcər rayon İcra hakimiyyətlərinin səlahiyyətli nümayəndələri onları sakitləşdirə biliblər. Məsələ burasındadır ki, sözügedən Alüminium zavodu uzun müddətdir fəaliyyətini dayandırıb. Yeni istifadəyə verilən zavod isə oradan xeyli aralıdır, həm də müasir tələblərə cavab verdiyindən zavodun tüstüsündən söhbət gedə bilməz. Sakinlər bununla belə, külək əsən zaman yaxınlıqda olan toz-torpağın onların yaşayışına mane olduğunu söyləyiblər.

Qeyd edək ki, 1400 kəlbəcərli məcburi köçkünün hamısı bu aksiyaya qoşulmayıb. Onların arasında

yaşadığı yerdən çox razı qalanlar da var. “Neçə illərdir isti su üzünə həsrət idik. Şükürlər olsun, indi yaxşı yaşayırıq. Bunlar nə istəyir, başım çıxmır”, - deyə məcburi köçkün Həsən dayı bildirib. 

Məlumat üçün deyək ki, hazırda Kəlbəcər rayon İcra Hakimiyyətinin nümayəndələrilə kəlbəcərli məcburi köçkünlərin görüşü keçirilir. Görüşdə məcburi köçkünlər yeni evlər istədiklərini bildiriblər.

Qaçqın və Məcburi Köçkünlərin işi üzrə Dövlət Komitəsinin mətbuat xidmətinin rəhbəri Elçin Qədimov məsələni araşdırdıqlarını söyləyib.

Ölkə.Az