Bir gündə iki Xalq artisti itkisi, xərçəngin, qəfil ölümlərin apardığı məşhurlarımız - Gözlənilməz vidalar
Geridə qoyduğumuz 2023-cü il bir sıra xoş xəbərlərlə yanaşı, həm də itkilərlə yadda qaldı.
Ölkə.Az bu il vəfat edən siyasətçi, sənətçi və digər tanınmışların siyahısını təqim edir:
Bu ilin ilk itkilərindən biri “Toppuş bacı” ləqəbi ilə tanınan Əməkdar artist Tünzalə Əliyeva oldu. O, yanvarın 22-də uzun sürən onkoloji xəstəlikdən sonra ömrünün 49-cu ilində dünyadan köçdü.
T.Əliyevadan 1 ay sonra fevralın 21-də isə Azərbaycanın teatr və kino aktyoru, Xalq artisti, Prezident təqaüdçüsü Ramiz Novruzu da eyni xəstəlik səbəbindən itirdik.
23 fevralda isə tanınmış vokalçı, Xalq artisti, Azərbaycan Dövlət Akademik Opera və Balet Teatrının solisti Əli Əsgərov ömrünün 62-ci ilində vəfat etdi.
Jurnalist, media üzrə tanınmış mütəxəssis Ellada Mustafayevada fevralın 28-də onkoloji xəstəlikdən 34 yaşında dünyasını dəyişdi.
Martın 2-də Qafqaz Müsəlmanları İdarəsinin Nəsimi rayonu üzrə nümayəndəsi, tanınmış ilahiyyatçı Hacı Şahin Həsənlinin 48 yaşında qəfildən ürəktutmadan vəfat etməsi də gözlənilməz oldu.
Bu il Ədliyyə Nazirliyinin Penitensiar Xidmətinin İctimaiyyətlə əlaqələr şöbəsinin rəisi Mehman Sadıqov da qəfil ürəktumadan həyatını itirdi. O, martın 12-də 59 yaşında vəfat etdi.
Ölümü bir çoxları üçün gözlənilməz, o cümlədən faciəvi olan şəxslərdən biri də Əməkdar mədəniyyət işçisi, tanınmış televiziya prodüseri, rejissoru Oqtay Əliyev idi. Həyatını itirməsinə səbəb idarə etdiyi “Lexus” markalı avtomobil yolun hərəkət hissəsindən çıxaraq aşması (23 mart) olmuşdu.
9 apreldə isə 2 Xalq artisti Azər Paşa Nemətov və İranə Tağızadə dünyadan köçdü. Azərbaycan Dövlət Akademik Milli Dram Teatrının bədii rəhbəri-baş rejissoru və direktoru olan Azər Paşa Nemətov 76 yaşında, Azərbaycan Dövlət Akademik Rus Dram Teatrının rejissoru İrana Tağızadə isə 65 yaşında vəfat etdi.
Tanınmış qarmon ifaçısı, Xalq artisti, “Şöhrət” ordenli Aftandil İsrafilov da 29 apreldə 82 yaşında dünyadan köçdü.
Bir ay sonra isə 29 mayda daha bir sənətçini, “Şofer Əhməd” ləqəbi ilə tanınan Əməkdar artist Elxan Qasımovu itirdik.
Azərbaycanın Xalq rəssamı Fazil Nəcəfov da bu ilin 12 iyulunda 88 yaşında vəfat etdi.
20 iyulda isə tanınmış telejurnalist Natəvan Babayevanın 45 yaşında onkoloji xəstəlikdən ölməsi də üzücü hadisələrdən idi.
31 iyulda keçmiş baş nazir Surət Davud oğlu Hüseynov Türkiyədə vəfat edib.
Bu ilin sözsüz ki, ən böyük itkilərindən biri də Millət vəkili, Milli Məclisin Mədəniyyət Komitəsinin sədri Qənirə Paşayeva oldu. Komaya düşərək xəstəxanaya yerləşdirilən deputat 48 yaşında vəfat etdi.
Azərbaycan Dövlət Neft Şirkətinin (SOCAR) birinci vitse-prezidenti, akademik Xoşbəxt Yusifzadəni isə 3 oktyabrda 93 yaşında itirdik.
Noyabrın 10-da Əməkdar incəsənət xadimi, bəstəkar Mobil Babayev 78 yaşında, Bakı Dövlət Universitetinin Jurnalistika fakültəsinin professoru, filologiya üzrə fəlsəfə doktoru Yalçın Əlizadə isə 83 yaşında dünyasını dəyişdi.
Son olaraq bu il vəfat edən şəxslər arasında Azərbaycanın Çindəki keçmiş səfiri, sabiq deputat, Ombudman Səbinə Əliyevanın atası Yaşar Əliyev də var. Sabiq diplomat isə 75 yaşında dünyasını dəyişdi.
Billurə Yunus
