FHN Bakı Yol Polisinə avtomatik yanğınsöndürmə topu verdi - Foto
Fövqəladə Hallar Nazirliyinin (FHN) Dövlət Yanğın Nəzarəti Xidməti Bakı Şəhər Baş Polis İdarəsinin Dövlət Yol Polisi İdarəsində Tailandda istehsal olunmuş avtomatik yanğınsöndürmə topunu təqdim edib.
Təqdimatla bağlı keçirilmiş tədbirdə bildirilib ki, avtomatik yanğınsöndürmə topu insan müdaxiləsi, mexaniki təsir olmadan kiçik bir alışma, alov toxunduğu zaman aktivləşir və yanğın 3-5 saniyə müddətində sönür.
Baş Polis İdarəsi Dövlət Yol Polisinin şəxsi heyətinə ekoloji cəhətdən təhlükəsiz olan avtomatik yanğınsöndürmə topunun texniki xüsusiyyətləri haqqında məlumat verilib. Bildirilib ki, çəkisi 1,3 kq olan bu avtomatik yanğınsöndürmə vasitəsi hazırda istifadə olunan ilkin yanğınsöndürmə vasitələrindən 5-10 dəfə yüngüldür və A, B, C sinif yanğınları, habelə 1300V gərginlik altında olan elektrik qurğularında, avtomobillərdə baş vermiş yanğınları söndürmək iqtidarındadır.
Dövlət Yanğın Nəzarəti Xidmətinin əməkdaşları yanğınların statistikası və təhlilinə istinad edərək bildiriblər ki, nəqliyyat vasitələrində 2012-ci ildə 340, 2013-cü ildə 372 yanğın hadisəsinin baş verib.
Qeyd olunub ki, bu yanğınların genişlənməsinin başlıca səbəbləri isə avtomobillərdə ilkin yanğınsöndürmə vasitələrinin olmaması, sürücülərin bu vasitələrin təyinatını və onlardan düzgün istifadə edilməsini bilməmələridir. Bütün bunları nəzərə alaraq, Dövlət Yol Polisi İdarəsinin şəxsi heyəti tərəfindən sürücülər arasında müvafiq maarifləndirmə işlərinin aparılması zəruridir.
Ölkə.Az
