Mirşahin də ATV-yə gedir?

Son zamanlar ANS-lə ATV arasında gedən soyuq müharibənin açıq müstəviyə keçməsi birincilərin ciddi itkiləri ilə müşayiət olunmaqdadır.

Ölkə.Az-ın əldə etdiyi məlumata görə, yaxın günlərdə telekenalın daha bir məşhur siması ATV-yə keçəcək.

Ancaq əvvəlcə gəlin ANS-dan ATV-yə transfer olunanlara nəzər salaq.

Turan İbrahimov "Günəbaxan"ın ən reytinqli dövrünün aparıcısı idi və telekanaldan Mirşahinlə münasibətlərdəki gərginliyə görə ayrıldı. Hazırda ATV-də səhər proqramının aparıcısıdır.

İlqar Mikayıloğlunun da geniş tamaşaçı auditoriyasına tanınmasında "Günəbaxan"ın böyük rolu olmuşdu. Elə İlqar Mikayıloğlu da ANS-dən incik düşdü və ATV-yə üz tutdu. Deyilənlərə görə, Mikayıloğlu ANS-də anons çəkilişləri zamanı yıxılaraq qolu sınıbmış və uzun müddət bir yerdə işlədiyi komandadan heç bir qayğı görməyincə, işindən ayrılıb.

Orxan Firkətoğlunun "Zorxana"sı da ANS-ın yaddaqalan layihələrindən sayılırdı. O da indi ATV-nin əməkdaşıdır.

ANS-dən ATV-yə ən qalmaqallı transfer isə Mətanət Əliverdiyeva oldu. Hətta iş o yerə çatdı ki, Əliverdiyevanın gedişi iki telekanal arasında uzun illərdir davam edən soyuq müharibəni əvvəldə qeyd etdiyimiz kimi açıq müstəviyə keçirdi.

Xatırlayırsınızsa, bir müddət öncə Aytən Səfərovanın da ATV-yə üz tutacağı barədə məlumatlar yayılmışdı. Hələlik bu barədə dəqiq məlumat olmasa da, Səfərovanın da iş yerini dəyişəcəyi istisna deyil.

Maraqlıdır, uzun illər teleməkanda hökmranlıq edən telekanal niyə birdən-birə bu qədər tanınmış simasını itirdi? Deyilənlərə inansaq, telekanal daxilində yaradıcı insanın işləməsi üçün normal mühit yoxdur, hətta ANS əməkdaşlarının təbirincə desək, burada hərbi rejim hökm sürür. Hətta bəzi əməkdaşlar yarızarafat deyirlər ki, belə getsə, Mirşahin özü də ATV-yə keçəcək. Onsuz da hazırda bu telekanalda qalan yeganə tanınmış sima elə Mirşahinin özüdür.

Səbinə
Ölkə.Az