Fazil Mustafa: "İran şiəlik adı altında ölkəmizdə öz agenturasını yaradıb" - Özəl
Deputat Fazil Mustafa sosial şəbəkədə yazığı son statusa aydınlıq gətirdi
Ölkə.az-a danışan Böyük Quruluş Partiyasının lideri Fazil Mustafa yazdığı statusda heç bir məzhəbi təhqir etmədiyini bildirib. O deyib ki, Ramazan ayının bayram namazının vaxtı məsələsində yaranan ixtilafa bildirdiyi münasibət mətbuatda İrana işləyən bəzi media orqanları tərəfindən qərəzli şəkildə şərh olunaraq təhrif edilib.
"Mənim valideyinlərim, ata-anam da şiədir, belə çıxır mən öz valideyinlərimi təhqir edirəm? Nəyə görə şiəlik dedikdə İrana işləmək nəzərdə tutulmalıdır? Nəyə görə Azərbaycanda İranın əleyhinə fikir səsləndirilən hər bir kəs şiəliyə düşmən kimi qələmə verilir? İddia edirlər ki, guya mən namazın vaxtının Türkiyə vaxtı ilə qılınmasının tərəfdarıyam. Xeyr, elə deyil. Gəlin başqa müsəlman ölkələrinin vaxtı ilə bayramı qeyd edək. Məsələn, Malayziya, Sinqapur, İndoneziya. Başa düşə bilmirəm niyə məhz İran vaxtı ilə olmalıdır? İran haqqında söylədiyim fikirləri dövlətçiliyimizin mövqeyindən söyləyirəm, amma nədənsə bunu bəziləri "şiəliyin əleyhinə" qələmə verməyə çalışırlar. Statusumda sələndirdiyim fikirdə ağıl sahibi müsəlmanlara müraciət etmişəm. Azərbaycanda oturub hansısa xaricdəki alimin və ya müctəhidin dediyi ilə hərəkət etmək, xarici xüsusi xidmət orqanına işləmək deməkdir", deyə Fazil Mustafa müxbirimizə verdiyi açıqlamasında bildirib.
Xatırladırıq ki, bəzi xəbər saytları deputatın yazdığı statusun şiələrin əleyhinə olduğu iddia edərək onu adı çəkilən məzhəbə mənsub olanları təhqir etməkdə ittiham etmişdi.
Statusu olduğu kimi sizə təqdim edirik:
"QEYD
Ağıl Allahın insana verdiyi ən böyük əmanətdir. Başqa heç bir məxluqa bu verilməyib. Ayələrin çoxusunda da, anlayın, ağlınızı işlədin deyə birbaşa insana tələb qoyulub. İnsanın axirətdə sorğulanmasının əsas səbəbi də bu əmanətlə bağlıdır. Bu əmanəti dağlar, göylər və yer götürməyib, insan cahillikdən götürüb, indi də yalnız insan etdiklərinə görə məsuliyyət daşıyır. Atdan, qoyundan, eşşəkdən , qurbağadan, ilandan belə bir tələb yoxdur. İstər Əhli Sünnə olsun, istər Əhli-Şiə, kim çıxıb söyləyirsə ki, mən ağlımı özüm işlətmirəm, öz şeyximə, müctehidimə həvalə etmişəm, həmin zatlar nəyi söyləsə, onu da təqlid edəcəyəm, bu artıq yalnız ağıldan imtina deyil, adamlıqdan imtinadır. Yəni məsuliyyəti özündən başqasına ötürməkdir. İslam, ağlını insanlıq üçün səmərəli istifadə edənlərin dinidir". Fazil Mustafa
Səxavət Məmməd
Ölkə.az
