Nazirimiz ölkəmizin əleyhinə olan "hesabatların" hazırlanmasında hansı rolu oynayır?

Dünən mediamızın manşetləri çox qəribə və ilk görünüşdən məntiqsizlik ifadə edən bir xəbərin istilasına uğradı.

Xəbərdə deyilirdi: Fövqəladə hallar naziri, general-polkovnik Kəmaləddin Heydərov diplomatik missiyasının başa çatması ilə əlaqədar ABŞ-ın Azərbaycandakı səfiri Riçard Morninqstarla görüşüb.

FHN-in saytında dərc olunan məlumatda  K.Heydərov səfirin Azərbaycan-ABŞ əlaqələrinin daha da möhkəmlənməsindəki rolunu qeyd edib, ona gələcək fəaliyyətində uğurlar arzulayıb.

 

Fövqəlnazir ABŞ-ın müvafiq qurumları ilə nazirlik arasında əməkdaşlığın perspektivlərindən bəhs edib, əmin olduğunu bildirib ki, bu əməkdaşlıq gələcəkdə daha da güclənəcək.

 

Görüşdə səfirə Azərbaycanda fövqəladə halların qarşısının alınması və nəticələrinin aradan qaldırılması sahəsində görülən işlər, nazirliyin strukturuna daxil olan qurumların fəaliyyəti barədə ətraflı məlumat verilib.

 

Səfir R. Morninqstar ABŞ-Azərbaycan əlaqələrinin yüksələn xətlə inkişaf etdiyini bildirib, Azərbaycanın Fövqəladə Hallar Nazirliyi və Birləşmiş Ştatların müvafiq qurumları arasında əməkdaşlığın geniş perspektivləri olduğunu söyləyib.

 

Görüşdə qarşılıqlı maraq doğuran digər məsələlərə dair ətraflı fikir mübadiləsi aparıldığı deyilir.

Maraqlıdır, bir neç ay əvvəl az qala Azərbaycanın daxili işlərinə qarışdığına görə "persona non grata" elan olunan Morninqstarın FHN başçısı ilə hansı ümumi söhbətləri ola bilər və onlar nəyi müzakirə ediblər? Xəbərdə bildirilir ki, fövqəlnazir Morninqstara Azərbaycanda "fövqəladə halların aradan qaldırılması və qarşısının alınması sahəsində görülən işlərdən danışıb və ABŞ diplomatına ətraflı məlumat verib. Maraqlıdır, dünənə qədər ölkədə kütləvi iğtişaşlar, xaos, vətəndaş qarşıdurması, siyasi ehtirasları qızışdıraraq ümumiyyətlə "fövqəladə hal" yaratmaq istəyən bir ölkənin səfirinə Heydərov hansı məlumatları verib? Məgər Kəmaləddin Heydərov hər altı ayda bir dəfə məhz ABŞ-ın dövlət və qeyri-hökumət qurumlarının açıqladığı hesabatlarda Azərbaycanın geridə qalmış, antidemokratik və hakimiyyətin despot, prezidentin diktator kimi qələmə verildiyindən xəbərsizdir? Daxildəki narazı qüvvələrin hakimiyyətə qarşı qaldırılmasına, antiazərbaycan təbliğatının aparılmasına və hakimiyyətin gözdən salınması üçün həyata keçirilən bütün fəaliyyətlərin ABŞ hökumətinə bağlı fondlar tərəfindən maliyyələşdirildiyindən Kəmaləddin Heydərovun məlumatsız olduğunu düşünmək sadəlövhlük olardı. Elə isə siyasət və diplomatiya ilə heç bir əlaqəsi olmayan bir nazirliyin başçısının, öz ölkələrinin xüsusi xidmət orqanları ilə sıx əlaqədə olduğu səfirlər, konsullar və müxtəlif ranqlı diplomatlarla görüşünün əsas məqsədi nədən ibarətdir?

Xatıradırıq ki, ABŞ Dövlət departamentinin keçən həftə açıqladığı son hesabatında Azərbaycanda dini azlıqların hüquqlarının guya taplandığı haqda ayrıca bölmə dərc edilib. Ölkəmizdəki inkişafın və demokratik cəmiyyət quruculuğunun belə yüksək səviyyədə getdiyi bir dövrdə Heydərovun dərin rəğbət, sonsuz məhəbbət və heyranlıq duyduğu  Amerikanın Azərbaycana qarşı bu qədər qərəzli mövqeyi heç cür başa düşülən deyil.