\"Dedi ki, mən Gəncədə tanınmış adamam, bilsələr, vergi bir yandan boğazıma çökəcək, icra başçısı bir yandan...\"

""Bozbaş pictures"ə baxanda oradakı obrazlardan biri Fəlakət deyir, "əla, əla, əla". Beynimə ideya gəldi ki, günəbaxan tumunun adını qoyum, "Əla Tum", reklam rolikində də, Şəmi, Şöşü, Fəlakəti çəkim"

"Əla Tumları"nın ideya müəllifi Mustafayev Azər Ölkə.Az-a bildirib ki, onu bir qrup şəxs aldadaraq ideyasını oğurlayıb, 20 min manat pulunu alıb, aylıq gəliri 40-60 min manat göstərilsə də 8 ay ərzində ümumiyyətlə pul verməyiblər.

Hadisənin tam təfsilatı haqqındakı yazını sizə təqdim edirik:

Puç olan "günəbaxan sevdası"

3 il bundan əvvəl günəbaxan tumunun istehsalı ilə məşğul olmaq istəyirdim. Buna görə də, mənə keyfiyyətli günəbaxan tumları lazım idi. Tanışımın vasitəsi ilə Gəncə şəhərində yaşayan Elşən Məmmədovla tanış oldum. Elşən Məmmədova dedim ki, günəbaxan tumu biznesi ilə məşğul olmaq istəyirəm. Həmin tumun reklam çarxında da Hüseyn Dəryanı çəkmək istəyirəm. Elşən Məmmədov dedi ki, reklam rolikini hazırla, bütün işlərini gör, sənə 200 min manat dəyərində nisyə günəbaxan tumu verəcəm, satıb pulumu qaytararsan. Həmin zaman elə oldu ki, maddi problemim olduğu üçün bu ideyanı həyata keçirə bilmədim...

Fəlakətin gətirdiyi fəlakət...

Günabaxan tumu biznesinə başlamaq ideyası beynimdən çıxmırdı. Bir gün TV-də "Bozbaş pictures"ə baxanda oradakı obrazlardan biri Fəlakətin "əla, əla, əla" dediyini eşitdim. Beynimə ideya gəldi ki, günəbaxan tumunun adın qoyum "Əla Tum", reklam çarxında da, Şəmi, Şöşü, Fəlakəti çəkim. Bu ideya ilə yenidən Elşən Məmmədovun yanına gəldim. Elşən Məmmədov 15 ildən çox idi ki, günəbaxan tumlarının biznesi il məşğul olurdu. Üç il əvvəlki söhbət yenidən təkrarlandı. Elşən Məmmədov bildirdi ki, "get reklam rolikini çəkdir, hər şeyi qaydasına sal, mən sənə 200 min manatlıq nisyə mal verəcəm ki, işə başlayasan". Bu biznesə Elşən Məmmədovun sözünə arxayın olub girişdim. Reklam roliki çəkilməzdən əvvəl Elşən Məmmədov mənə bildirdi ki, "Azərsun"un bazasında 180 ton günəbaxan tumum var, onu götürüb, işə başla. Mən də bildirdim ki, o yaş maldı, həm də işlərimi tam yekunlaşdırım sonra başlayaram.

Reklam çarxını çəkdirdim, günəbaxan tumunun paketlərini hazırlatdım. Elşən Məmmədova göstərdim və çox bəyəndi. Elşən Məmmədov dedi ki, "Azərsun"un anbarında olan 180 ton malı satmışam. "Tık-Tık" tumlarını istehsal edən Şaiq, Mais qardaşlarının anbarında 10 ton malım var, onu götür, istehsala başla, mən də Krasnodara zəng edib səni 200 min manat dəyərində günəbaxan tumu ilə təmin edəcəm. Elşən Məmmədov bildirdi ki, Krasnodardan günəbaxan tumunu nisyə götürə bilirəm, ancaq nəqliyyat puluna 10 min manat pul vermək lazımdır. Gəncədə Elşən Məmmədova 5 min manat pul verdim, dedim ki, 5 min manatı da 2-3 günə göndərəcəm. Və razılaşdıq...

Bakıya gəldim, Şaiq, Mais qardaşlarına yaxınlaşıb 10 ton günəbaxan tumunu istəyəndə onlar malı mənə vermədilər. Dedilər ki, Elşən Məmmədov bizə deyib ki, mal anbardan çıxmasın. Ancaq Elşən mənim yanımda onlara demişdi və onlar da razılaşmışdı. Şaiq və Mais qardaşları ilə belə bir danışığımız da o olmuşdu ki, məndə günəbaxan tumunu qovuran və paketləyən aparat olmadığı üçün Şaiqlə danışmışdım ki, günəbaxan tumunun 40 qramlığını 1 qəpikdən, 100 qramlığını isə 2 qəpikdən paketləyəcəklər. Elşən Məmmədova zəng edib dedim ki, sənin sözünə arxayın olub 30 min manat pul xərcləmişəm, özünə də 5 min manat pul vermişəm. Malı niyə görə götürə bilmərəm? Elə oldu ki, telefonda Elşən Məmmədovla danışığımız alınmadı. Yenidən Gəncə şəhərinə getməli oldum. Görüş zamanı Elşən Məmmədov bildirdi ki, qorxdum həmin malı aparıb satarsan. Onların bu arqumenti tamamilə yalnış idi. Əgər satmalı olsaydım, elə 180 ton malı verəndə gedib götürüb satardım.

Bu məsələ alınmayandan sonra başqa biznes təklifləri gəldi. Aylıq gəliri 40-50 min manatlıq iş təklif olundu. Bu təklif gəldikdən sonra günəbaxan biznesi ilə məşğul olan şəxslərə bildirdim ki, "Əla Tum" ideyasına 30 min manat xərc çəkmişəm, xərcin sənədləri də var. Bu ideyamı 10 min manata satıram. Elşən Məmmədov yenidən üzə çıxdı və dedi ki, bu ideyanı alıram. Elşən Məmmədova bildirdim ki, sən məni 20 min manat ziyana salmısan, sənə inanmıram. Elşən Məmmədov mənə dedi ki, 90 MR 799 nömrəli X5 maşınım var. Onu sənə verim, oktyabr ayının əvvəlində 5 min manat, oktyabr ayının sonunda isə digər 5 min manatı qaytaranda maşını mənə geri qaytararsan. Həmin X5 Elşən Məmmədovun arvadının sinif yoldaşının adına çıxdı. Notariusda maşını mənim adıma keçirən zaman məlum oldu ki, maşın sahibinin şəxsiyyət vəsiqəsinin vaxtı keçib. Elşən Məmmədov mənə bildirdi ki, 3-4 günə şəxsiyyət vəsiqəsi dəyişdiriləcək və maşın sənin adına keçəcək.

Tumlara növbəti şərik...

Elşən Məmmədov bildirdi ki, "Əla Tum"larını Rahib Səfərov adlı şəxslə şərikli işlədəcəyik. Ona görə də, məni onunla tanış etdi. Rahib Səfərovun ofisi Samux rayonunda "Qoşqar un zavodun"da yeləşir. Rahib Səfərov bildirdi ki, niyə görə 30 min manat xərc çəkdiyin halda "Əla Tum" ideyasını 10 min manata satırsan? Dedim, Elşən Məmmədov məni aldatdı. Günəbaxan tumu vermədi, ona görə də başqa bir işə girişirəm, təcili pul lazımdır. Elşən Məmmədov mənə bildirdi ki, Rahib Səfərov Bakıya gələcək, "Əla Tum"larını Rahibin adına sənədləşdirin. Rahib Səfərov Bakıya gələndə dedi ki, sənədlər qaynımın adına keçiriləcək. Səbəbini soruşanda bildirdi ki, mən Gəncədə tanınmış adamam. Vergi bir yandan boğazıma çökəcək, icra başçısı gəlib deyəcək ki, filan küçəni təmir elətdir, bu işi gör, o işi gör. Qaynımla aramda yalançı icarə müqaviləsi bağlayacam, gələn də olsa deyəcəm ki, obyektimi icarəyə vermişəm.

Bakıya gələndə Rahib məndən soruşdu ki, Elşən sənə 10 min manat pul verib? Dedim, mənə pul verməyib. Rahib dedi ki, sənin 10 min manatın verilmədiyi halda o pulu mən verəcəm. Elşən mənim pulumu vermədi. Belə olan halda Rahibə zəng vurdub dedim ki, ideyamı, paketləri və karopkaları gəlirəm aparmağa. Sənədləşmənin çox hissəsi Rahibin qaynı Səfərov Raqib Siyavuş oğlunun adına keçmişdi. Artıq "Əla tumları"ının paketinin arxasındakı ştirx-kod, vöen, telefon nömrəsi və paketə də dəyişiklik edilmişdi. Elşən pulumu vermədikdə Rahib bildirdi ki, "Əla tumları"nın qazancına 50% Elşənlə şərikəm. Mənim qazancımın 50%-nə də sən şərik ol. Mən də dedim ki, yazılı rəsmi sənəd olsa, razı olaram. Rahib bildirdi ki, qələmlə bir kağıza yaz, komputerdə yazdırıb, möhür vurdurub gətirim. Dediyi kimi də oldu. Möhürlü sənədə yazıldı ki, "Əla Tumları"nın aylıq mənə çatası gəliri 40-60 min civarında olacaq. 8 ay keçməyinə baxmayaraq mənə nə öz pulumu, nə də sənəddəki pulu veriblər.

Məndə səs yazısı var, Rahib deyib ki, iş yoluna düşən kimi bizi bu sahədən kənarlaşdıracaq. Məsələ ilə bağlı Mustafayev Azər DİN, Baş Prokrorluq, MTN-ə müraciət edib, ancaq müraciətləri cavabsız qalıb.