Həbsdə olan doğum şöbəsinin sabiq müdiri azadlığa buraxıldı
Ali Məhkəmədə Cəlilabad Rayon Mərkəzi Xəstəxanasının doğum və ginekologiya şöbəsinin müdiri olmuş Nigar Qəhrəmanovanın barəsindəki hökmdən verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Vidadi Cəfərovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti və kassasiya şikayətinə əlavə qismən təmin edilib, Şirvan Apellyasiya Məhkəməsinin çıxardığı qərar dəyişdirilib. Belə ki, Nigar Qəhrəmanovanın 8 il 6 ay müddətinə azadlıqdan məhrumetmə cəzasını çəkməsi Cinayət Məcəlləinin 79.1-ci maddəsinə əsasən, himayəsindəki 2017-ci il təvəllüdlü azyaşlı uşağın 14 yaşına çatmasınadək, yəni 2031-ci il tarixə kimi təxirə salınıb. Qadının üzərinə azyaşlı və digər uşaqlarına qayğı göstərmək və onların tərbiyəsi ilə məşğul olmaq vəzifələri qoyulub. Nigar Qəhrəmanovanın barəsində seçilmiş həbs qətimkan tədbiri ləğv edilib və o, cəzasını çəkdiyi müəssisə üzrə cəzaçəkmə müəssisəsindən dərhal azad olunub. Şirvan Apellyasiya Məhkəməsinin qərarı qalan hissədə dəyişdirilmədən saxlanılıb.
Qeyd: Mətbuatda yayılan məlumaya görə, 42-yaşlı həkimin ittiham olunduğu ölüm hadisələrindən biri 2021-ci ilin iyununda, ikincisi isə həmin ilin sentyabrında baş verib. Birinci halda, qeysəriyyə əməliyyatı ilə əkiz uşaqlar dünyaya gətirən 37 yaşlı Xəyalə Əhmədova bir gün sonra vəfat edib. İkinci halda isə Cəlilabad rayonunun Muğan kənd sakini 19 yaşlı Fatimə Həziyeva əməliyyat yolu ilə övlad dünyaya gətirəndən sonra həyatını itirib. Ekspertiza hər iki ölümdə həkim səhvi olması haqda rəy verib. İddia olunur ki, əməliyyatın gedişi zamanı və əməliyyatdan sonra Xəyalə Əhmədovada baş verən qanaxmanın mənbəyi, mənşəyi və miqdarı düzgün qiymətləndirilməyib. Nəticədə vaxtında lazımi tədbirlər görülməyib. O da qanitirmə səbəbindən ölüb. Həziyevaya gəlincə, ekspertiza belə qənaətə gəlib ki, həkim xəstəlik tarixçəsində onun qan və sidik analizlərinin aparıldığını göstərsə də, əslində bunu etməyib. Yəni, xəstənin durumunu aylar öncə aparılmış müayinələr əsasında qiymətləndirib. Bu ölüm hadisələrindən sonra hər iki qadının ailə üzvləri mama-ginekoloq Qəhrəmanovadan şikayətçi olub. O, cinayət məsuliyyətinə cəlb edilib. Həkim hər iki ananın ölümünə görə səhlənkarlıqda suçlanmaqla yanaşı, həm də onların ailə üzvlərindən rüşvət almaqda ittiham olunub.
Qəhrəmanovaya qarşı Cinayət Məcəlləsinin (CM) 311.3.2 (təkrar rüşvət alma) və 314.2 (səhlənkarlıq, ehtiyatsızlıqdan zərərçəkmişin ölümünə və ya digər ağır nəticələrə səbəb olduqda) maddələri ilə ittiham irəli sürülüb. İddia olunur ki, həkim adları çəkilən qadınların hər biri xəstəxanada əməliyyat olunarkən ailə üzvlərindən 400 manat alıb. Lənkəran Ağır Cinayətlər Məhkəməsi onu hər iki maddə ilə təqsirli bilib və 8 il 6 ay azadlıqdan məhrum edilməsi barədə hökm çıxarıb. Lakin öhdəsində 2017-ci il təvəllüdlü övladı olduğunu və ona tək baxdığını nəzərə alaraq, ona münasibətdə CM-in 79-cu (hamilə qadınlar və azyaşlı uşaqları olan şəxslər tərəfindən cəzanın çəkilməsinin təxirə salınması) maddəsini tətbiq edib. Bu maddə uşaq 14 yaşına çatana qədər cəzanın çəkilməsini təxirə salmağa imkan verir. 2022-ci ilin dekabrında çıxarılmış bu hökmdən prokurorluq da narazı qalıb, həkim də. Həkim rüşvət ittihamı üzrə bəraət, səhlənkarlığa görə isə azadlıqdan məhrumetmə ilə bağlı olmayan alternativ cəza verilməsini istəyib. Prokurorluq isə apellyasiya protestində, əksinə, 79-cu maddənin tətbiqinin ləğvini, onun dərhal həbs edilməsini, üstəlik, müəyyən müddətə vəzifə tutmaq hüququnun məhdudlaşdırılması ilə bağlı əlavə cəza da verilməsini istəyib. Bu iş təkrar Şirvan Apellyasiya Məhkəməsində araşdırılıb və prokurorluğun protesti təmin olunub. Nigar Qəhrəmanovanın cəza müddəti 8 il 6 ay saxlansa da, onun icrasının təxirə salınması məsələsi ləğv edilib. O, mayın 5-də məhkəmə zalında həbs olunub. Apellyasiya məhkəməsi əlavə cəza olaraq ona 2 il də dövlət və yerli özünüidarə orqanlarında rəhbər və ya maddi-məsul vəzifə tutmağı qadağan edib. Daha sonra Nigar Qəhrəmanova kassasiya şikayəti ilə Ali Məhkəməyə müraciət edib.
