Bakı Sirkinin binası sökülür? - AÇIQLAMA 

Xəbər verdiyimiz kimi, Fövqəladə Hallar Nazirliyinin yoxlamalarından sonra qapadılan müəssisələrdən biri də Bakı Dövlət Sirki olub.

Ölkə.Az xəbər verir ki, yoxlamalar zamanı sirkin binasında müəyyən texniki nasazlıqlar aşkar edildiyindən problemlər aradan qaldırılanadək yanvarın 7-dən müəssisənin fəaliyyəti müvəqqəti dayandırılıb. 

Fövqəladə Hallar Nazirliyinin son günlər müxtəlif bazar və müəssisələrdə keçirdiyi yoxlamalardan sonra yanğın nöqsanların aşkarlandığı bəzi yerlərin bağlanması, ağıllara "Bakı Dövlət Sirki də tamamilə bağlana bilərmi" sualını gətirib.

Bu həm də onunla əlaqələndirilir ki, son zamanlar sirkdə passivlik müşahidə olunur, bəzən şoular başqa məkanda keçirilirdi. 

Digər tərəfdən illərdir, sirkdə əsaslı təmir işlərinin aparılmaması da, sözügedən müəssisənin sökülüb-sökülməyəcəyi barədə düşüncə formalaşdırıb.

Bakı Dövlət Sirkinin mətbuat katibi Gülşanə Mustafayeva Ölkə.Az-a açıqlamasında mövzu ilə bağlı suallara aydınlıq gətirib.

"Tamaşaçıların şouları daha komfortlu şəkildə izləyə bilməsi üçün təmir işləri görülür. Faəliyyəti müvvəqqəti dayandırılıb ki, müəyyən texniki işlər görülsün, ondan sonra istifadəyə verilsin. Texniki işlərə xeyli sayda iş daxildir, onların hamısını sadalamaq mümkünsüzdür. 
Heç yerə getmirik. Sirk təmir olunduqdan sonra fəaliyyətimizi davam etdirəcəyik. Binanın sökülməsi və ya yeni binanın tikintisindən söhbət getmir. Sadəcə, buradakı texniki nasazlıqlar aradan qaldırılacaq", - deyə o söyləyib.

Billurə Yunus