NİİM İntellektual Nəqliyyat Sistemi (İTS) konqresində iştirak edir
Nəqliyyat Nazirliyi Nəqliyyatı İntellektual İdarəetmə Mərkəzinin baş direktoru Rüfət İmanov oktyabrın 5-də Bordo şəhərində keçirilən Ümumdünya İntellektual Nəqliyyat Sistemi Konqresində iştirak edir.
NİİM-dən Ölkə.Az-a daxil olan məlumata görə, 1994-cü ildən keçirilən Ümumdünya İntellektual Nəqliyyat Sistemi Konqresi bu il 5-9 oktyabr tarixlərində Fransanın Bordo şəhərində təşkil olunub.
Konqres 5 oktyabr tarixində 30 nazirlik nümayəndələrinin iştirakı ilə təşkil olunmuş dəyirmi masa ilə başlayıb. Bu ilki konqresin əsas hədəfi “intellektual mobilliyə doğru - ətraf mühitdən daha səmərəli istifadə”dir.
NİİM nümayəndələri hər il bu tədbirdə iştirak etməklə konqres iştirakçıları ilə Azərbaycanda intellectual nəqliyyat sisteminin inkişafı, əldə edilən uğurlar və tətbiq edilən yeniliklər barədə məlumatlarla bölüşürlər.
İrimiqyaslı tədbir Avropa Komissarlığının, Amerika və Asiya İntellektual Nəqliyyat Sistemi Mərkəzləri, həmçinin, ERTICO- Avropa İntellektual Nəqliyyat Sistemi Mərkəzi tərəfindən təşkil edilib.
Konqresə 100-dən artıq ölkədən 3500 nümayəndə heyəti, 300 sərgi iştirakçısı qatılıb. Konqresdə Azərbaycan, Albaniya, Əlcəzair, Avstraliya, Avstriya, Polşa, Finlandiya, Hindistan, Konqo, Birləşmiş Ərəb Əmirliyi, Lüksemburq, Almaniya, Macarıstan, Malayziya, Sinqapur, İngiltərə, Niderland, Vyetnam, Rumıniya, Belçika və digər ölkələr iştirak edirlər.
Ölkə.Az
