Demokratik və şəffaf seçkilər üçün bütün şərait mövcuddur

Artıq bu gündən etibarən ölkə ərazisində 7 fevralda keçiriləcək növbədənkənar prezident seçkiləri ilə bağlı rəsmi seçki öncəsi təbliğat kampaniyasına start verilib. Qeydə alınan namizədlər qanunvericiliyin tələbinə uyğun olaraq öz təbliğat kampaniyasına başlayıb.

Ölkədəki seçki öncəsi təbliğat kampaniyası ilə bağlı Ölkə.Az-a açıqlama verən Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva bildirib ki, Azərbaycanda azad, demokratik və şəffaf seçkilərin keçirilməsi üçün bütün şərait mövcuddur: "Ölkəmizdə ictimai-siyasi sabitlik hökm sürür və bu, seçkilərin normal keçirilməsi üçün vacib şərtlərdən biridir. Azərbaycanda azad və şəffaf seçkilərin keçirilməsi üçün mükəmməl qanunvericilik bazası mövcuddur. Seçki Məcəlləsi, bu sahəni əhatə edən qanun və qərarların mövcudluğu ölkəmizdə beynəlxalq standartlara uyğun seçki qanunvericiliyinin olduğunu təsdiq edir, zərurət yarandıqca seçki qanunvericiliyi təkmilləşdirilir ki, bu da seçkilərin ölkəmizdə daha şəffaf keçirilməsinə xidmət edir”.

Deputat əlavə edib bildirib ki, Azərbaycan dövlətinin 7 fevral seçkilərinin də azad və şəffaf keçirilməsi üçün güclü siyasi iradəsi mövcuddur: "Bu seçkilərdə ölkə vətəndaşları, seçicilər sərbəst şəkildə seçki məntəqələrinə gəlib istədikləri namizədə səs verəcəklər. Hesab edirəm ki, bu seçkilər Azərbaycanın demokratik inkişaf yolunda növbəti bir nailiyyəti olacaq. Mərkəzi Seçki Komissiyası, aşağı seçki komissiyaları prezident seçkiləri ilə əlaqədar üzərinə düşən vəzifələri layiqincə yerinə yetirirlər. Həmçinin seçki proseslərinin uğurlu təşkili və həyata keçirilməsi üçün maddi-texniki təminat məsələləri yüksək səviyyədə həllini tapıb. Eyni zamanda, seçkilərə beynəlxalq səviyyədə də maraq böyükdür. Çoxsaylı beynəlxalq müşahidəçilərin prosesi izləmək üçün müraciət etməsi də bunu təsdiqləyir".

Millət vəkilinin sözlərinə görə, ölkəmizdə seçki əhvali-ruhiyyəsi yüksəkdir. "7 nəfərin seçki marafonuna qoşulması və fəal seçki öncəsi kampaniyanın aparılmasından xəbər verir", - o qeyd edib.

Mürtəza
Ölkə.Az