Qamət Süleymanov: "Ən-Nusra Rusiyaya qarşı Talibanla birləşə bilər"

Rusiyanın Suriya əməliyatları Bəşər Əsər əleyhdarlarını birləşdirir.

Ən-Nusra qruplaşması ilə Talibanın birləşəcəyi gözlənilir. Hətta Ən-Nusra lideri Abdullah əl-Müheysini Taliban liderinə müraciət edərək bildirib ki, "Siz ruslara unutmayacaqları bir dərs verdiniz. İndi isə ruslar Suriyadakı mücahidlərə hücum etdilər. Biz də onlara Suriyada unutmayacaqları böyük sürpriz hazırladıq. İşğalçı ruslara müsəlmanların tək bədən, tək vücud olduğunu göstərəcəyik!".

Bundan əlavə bir neçə gün öncə də xəbər yayıldı ki, 50 sünni alimi Rusiyaya qarşı cihad elan edib.

ABŞ-ın Əfqanstan və İraqa girib qırğınlar törətdiyi halda birləşməyən müsəlmanların, Rusiyanın müdaxiləsindən sonra birləmək istəməsi düşündürücü gəlir.

Baş verən prosesləri sələfilərin lideri Qamət Süleymanov Ölkə.Az-a şərh edib.

"50 müsəlman aliminin Rusiyaya qarşı cihad elan etməsi xəbəri yalandır. Suriyada cihad elan olunsaydı, əvvəlcədən bunu edərdilər. Qaldı Ən-Nusranın Talibanla Rusiyaya qarşı birləşməsinə, bu mümkündür. Ona görə ki, hər iki qruplaşma bir-birinə yaxın fikirlidir. Sadəcə müəyyən yerlərdə fərqləri var. Rusiyanın Suriyaya girməsi orada bəzi müxalif qolları birləşdirə bilər.

Əgər diqqət yetirsək görərik ki, ABŞ və Rusiyanın siyasətində fərq var. Rusiya Suriya müxalifətini terrorçu kimi görür, ancaq ABŞ bütün müxalifəti terrorçu kimi görümür. Əksinə, müxalifətin bir çox qollarına pula və silahla kömək edir. Fərq bundadır. ABŞ ancaq İŞİD-i bombalayır. Ən-Nusraya toxunmur. Rusiya isə fərq qoymur. Rusiya bütün müxalifətə bir gözlə baxır. Kim Bəşər Əsədə qarşıdırsa, onların hamısı Rusiya üçün terrorçudur".

Qeyd edək ki, Rusiya Suriyada ancaq İŞİD-i bombaladığını bildirir.

Səxavət Məmməd
Ölkə.Az