Qar yağıb, 10 dərəcəyədək şaxta olub - FAKTİKİ HAVA - YENİLƏNİB
Yanvarın 24-ü saat 15:00-a olan məlumatına əsasən ölkə ərazisində yağıntılı hava şəraiti davam edir.
"Ölkə.az" xəbər verir ki, bu barədə Milli Hidrometeorologiya Xidməti məlumat yayıb.
Belə ki, Bakıda və Abşeron yarımadasında, Qarabağ və Şərqi Zərgəzurda, Naxçıvan Muxtar Respublikasında, Gəncə-Qazax, Balakən-Şəki, Quba-Qusar, Mərkəzi Aran, Lənkəran-Astara bölgəsində qar yağır.
Havanın minimal temperaturu Bakıda və Abşeron yarımadasında 1 dərəcəyədək isti, Naxçıvan Muxtar Respublikasında 2-6 dərəcə şaxta, Aran rayonlarında 1 dərəcə şaxtadan 2 dərəcəyədək isti, dağlıq rayonlarda 6, yüksək dağlıq ərazilərdə isə 10 dərəcəyədək şaxtadır.
Ölkə ərazisində müşahidə olunan yağıntılı və qarlı hava şəraiti axşam saatlarından tədricən kəsilsə də, şaxtalı hava şəraiti 25-i gecə və səhər saatlarınadək davam edəcək.
Bəzi yolların buz bağlayacağı ehtimalı var
***
Güclü qar yağması ilə Cəlilabad rayonunda nəqliyyatın hərəkətində və elektrik təchizatında problemlər yaranıb.
"Report"un məlumatına görə, Cəlilabadın dağlıq kəndlərində qarın hündürlüyü 50 sm-ə çatıb. Avtomobil yollarında nəqliyyatın hərəkəti çətinləşib.
Elektrik xətləri qırıldığından Cəlilabad şəhərinin bəzi hissələrində və bir neçə kəndə elektrik enerjisinin verilişi kəsilib.
Analoji hava şəraiti Biləsuvar rayonunda da müşahidə olunur. Belə ki, kənd yollarında nəqliyyatın hərəkəti çətinləşib. Biləsuvarın mərkəzi hissəsində və bəzi kəndlərdə elektrik enerjisinin verilişi dayanıb. Eyni zamanda, güclü qar və külək rabitə dirəklərini aşırıb və xətləri qırıb. Bir neçə yerdə qarın ağırlığına dözməyən ağac aşıb. Rayon ərazisində qarın hündürlüyü 20 sm-ə çatır.
Hazırda hər iki rayonda müvafiq orqanlar tərəfindən yollar qar örtüyündən təmizlənir. Həmçinin, elektrik enerjisinin bərpası üçün qəza briqadaları işlər aparırlar.
"Report"un Şimal-qərb bürosu isə xəbər verir ki, güclü qar səbəbindən Qax rayonunun Sarıbaş kəndi ilə əlaqə kəsilib. Hazırda yolun açılması istiqamətində işlər aparılır.
Sakinlərin dediyinə görə, Sarıbaş kəndində yağan qarın qalınlığı 40-50 sm-ə çatır.
Qeyd edək ki, Sarıbaş kəndi Qax rayonunun ən ucqar dağ kəndidir.
***
Dünən gecə saatlarından başlayan qar yağışı hələdə davam edir.
APA xəbər verir ki, gece saatlarından Şamaxı - İsmayıllı avtomobil yolunun Muğanlı dolaylarında və digər istiqamətlərdə yollar buz bağlayıb.
DYP əməkdaşları tərəfindən sürücülərə xəbərdarlıq edilib və zərurət yaranmadığı təqdirdə yola çıxmamaları tövsiyə olunub. Ərazidə yolların bəzi hissələrinin qardan təmizlənməsinə baxmayaraq gediş-gəlişin təhlükəli olduğu deyilir.
Qarın yağması rayonlarda dağətəyi kəndlərə gediş-gəlişdə də problemlər yaradıb. Şamaxı, İsmayıllı və Qəbələ rayonlarının dağətəyi kəndlərində qarın hündürlüyü 35-40 sm-ə çatıb.
Hazırda kənd yollarının təmizlənmə işləri davam edir.
