Həftənin icmalı
İtaliyanın məşhur qəzeti Azərbaycandan yazdı
05.10.2015
İtaliyanın məhşur “La nostra Gazetta” qəzetində Azərbaycan-İtaliya münasibətləri haqqında məqalə dərc olunub.
Bakı Neapol Assosiasiyasının vitse-prezidenti Elnur Camalxanov müəllifi olduğu yazıda Azərbaycan-İtaliya əlaqələrinin yaxın tarixi, ölkələr arasında mövcud olan dostluq, ticarət və mədəniyyət əlaqələrinin bu gün yüksək səviyyədə olmasından söz açıb.
Daha bir neçə verilişin bağlanma ehtimalı var
05.10.2015
"Azərbaycanda intellektual təbəqə əyləncəli verilişlərə baxmır"
“Aparılan araşdırmalar göstərir ki, Azərbaycan cəmiyyətinin intellektual kəsiminin böyük bir hissəsi çox təəssüf ki, xəbərlər informasiya proqramından başqa, yerli kanallardakı əyləncəli verilişlərə baxmır. Onlar əsasən, Rusiya və Türkiyə telekanallarında yayımlanan əyləncəli verilişləri izləyirlər”.
Bunu APA-ya Milli Televiziya və Radio Şurasının (MTRŞ) Ekspertiza, Proqramlaşdırma və Analitik şöbəsinin müdiri Təvəkkül Dadaşov deyib.
“Bakı Kart”a yeni vasitə ilə pul yükləmək olacaq
05.10.2015
“Bakı Kart”a pul yükləmək internet vasitəsi ilə də mümkün olacaq
Bunu Trend-ə açıqlamasında “Baku Bus" MMC-nin direktor müavini Vüsal Kərimli deyib.
Onun sözlərinə görə, hazırda “Bakı Kart”da bu istiqamətdə işlər aparılır.
V.Kərimli dayanacaqlarda “Bakı Kart” aparatlarının quraşdırılması məsələsinə də toxunaraq bunun mərhələli şəkildə həyata keçiriləcəyini qeyd edib: “Bütün metro stansiyalarında iki və ya üç ədəd aparat var. Əhalinin daha da rahatlığı üçün aparatlardan dayanacaqlarda da quraşdırılır. Avropada belə aparatlar üç dayanacaqdan birində və ya əsasən insanların toplandığı yerdə var. Biz isə düşünürük ki, tənzimləmə insanların kartdan istifadəsinə vərdiş etmələri ilə bağlı olmalıdır. İnsanlarda bir az sosial məsuliyyət olmalıdır. Düşünməlidirlər ki, ictimai nəqliyyatdan istifadə edirəmsə, kart almalıyam”.
Gələn ildən müəllimlərin maaşları artırılacaq
05.10.2015
Gələn ildən Azərbaycanın 12 rayon və şəhərinin müəllimlərinin maaşları artırılacaq. Bu ilin sonuna kimi Azərbaycanın daha 12 rayon və şəhərində müəllimlərin bilik və bacarıqlarının sınaq qiymətləndirilməsi aparılacaq.
Bunu bu gün keçirilən mətbuat konfransında Təhsil Nazirliyinin İnsan resursları şöbəsinin müdir müavini İlham Nağıyev deyib.
Onun sözlərinə görə, bu ərazilər Gəncə, Sumqayıt, Şirvan, Abşeron, Hacıqabul, İmişli, Masallı, Xaçmaz, Cəlilabad, Saatlı, Qubadlı, Sabirabaddır: "Artıq bununla bağlı Təhsil Nazirliyində layihə hazırlanır. Hazırda texniki işlər aparılır. Buna görə də hansı rayon və ya şəhərdən ilk olaraq, bu işə başlanılacağı hələ müəyyənləşdirilməyib. Amma ilin sonuna kimi adları çəkilən bu ərazilərin hamısında sınaq qiymətləndirilmə aparılacaq. Proses yəxminən 35-40 min müəllimi əhatə edəcək".
Müharibə əlilləri və şəhid ailələrinə mənzillər verildi
05.10.2015
Əmək və Əhalinin Sosial Müdafiəsi Nazirliyinin sifarişi ilə Ağdam və Ağcabədi rayonlarında inşa olunmuş 24 fərdi yaşayış evi müharibə əlilləri və şəhid ailələrinə verilib.
Bu barədə nazirlikdən Ölkə.Az-a bildirilib.
Nazirliyin məlumatına görə, respublikanın bölgələrində inşa etdirilən fərdi yaşayış evlərindən 10 ədədi Ağdam rayonunda, 14 ədədi isə Ağcabədi rayonunda müharibə əlilləri və şəhid ailələrinin istifadəsinə verilib.
Bundan başqa, nazirlikdən bildirilib ki, 2014-cü il yanvar ayının 1-dək yerli icra hakimiyyəti orqanlarında növbəyə dayanmış 5731 nəfər şəxsin və şəhid ailəsinin 2014-2018-ci illər ərzində mərhələlərlə mənzil və ya fərdi evlə təmin edilməsini nəzərdə tutulur.
Azərbaycanda yeni sərnişin gəmisi suya buraxılacaq
05.10.2015
"Azərbaycan Xəzər Dəniz Gəmiçiliyi" QSC tərəfindən Bakı Gəmiqayırma Zavoduna sifariş olunmuş 80 nəfərlik 3 ədəd yeni sərnişin gəmisinin tikintisi davam edir.
Trend-in QSC-yə istinadən verdiyi məlumata görə, hər üç gəminin gövdəsi tam hazırdır, mexanizmlərin və sistemlərin quraşdırılması prosesi gedir. Bu il təhvil verilməsi planlaşdırılan ilk gəmidə yanacaq, yağ və su çənlərinin hidravlik sınaqları uğurla yekunlaşıb, üst tikili əsas göyərtəyə qaynaq olunub, baş mühərriklər də artıq yerinə quraşdırılıb.
Digər iki gəminin gələn il hazır olacağı planlaşdırılır.
Metroda çalışan 200 xəzinədar işlə təmin olunacaq
05.10.2015
Metroda çalışan xəzinədarlar yeni işlə təmin olunacaqlar.
Bunu Bakı Metropoliteninin mətbuat xidmətinin rəhbəri Nəsimi Paşayev bildirib.
Onun sözlərinə görə, xəzinədar 200 nəfərdən çoxdur.
“Onların ixtisaslarına, təhsillərinə, stajlarına uyğun işlər təklif olunur. Onlar metroda buna uyğun işlə təmin olunacaqlar”.
Naxçıvanda hərbi təlimlər başladı
05.10.2015
Azərbaycan Respublikasının Prezidenti, Ali Baş Komandan cənab İlham Əliyevin təsdiq etdiyi Silahlı Qüvvələrin hazırlığı planına əsasən, oktyabrın 5-dən Naxçıvanda Əlahiddə Ümumqoşun Ordusu ilə komanda-qərargah təlimləri başlayıb.
Müdafiə nazirliyinin mətbuat xidmətindən verilən, sentyabrın 6-dan 13-dək keçirilmiş komanda qərargah hərbi oyunlarında icra edilən əməliyyat tapşırıqlarının davamı kimi nəzərdə tutulan bu təlimlərdə Silahlı Qüvvələrin bütün qoşun növlərinin döyüş fəaliyyətlərinin qərargahlar tərəfindən idarə olunması bacarıqları yoxlanılacaq.
Dini Qurumlarla İş üzrə Dövlət Komitəsinə yeni səlahiyyətlər verildi
06.10.2015
Azərbaycanda dini məlumatların yayılması sahəsinə nəzarət gücləndirilir, din sahəsində mütəxəssislərin hazırlanmasına diqqət artırılır.
Bu məsələlər Milli Məclisin bu gün keçirilən plenar iclasında müzakirəyə çıxarılan “Dini etiqad azadlığı haqqında” Qanuna və “Kütləvi informasiya vasitələri haqqında” Qanuna dəyişikliklərdə öz əksini tapıb.
“Dini etiqad azadlığı haqqında” Qanunun 29-cu maddəsinə (Müvafiq icra hakimiyyəti orqanı) edilməsi nəzərdə tutulan əlavəyə görə, bundan sonra müvafiq icra hakimiyyəti orqanı dini mərkəzdən və dini idarələrdən və digər dini qurumlardan dini fəaliyyətə dair məlumatları və maliyyə hesabatları da ala biləcək.
Hemofiliyalı xəstələr tam sağala bilərlər
06.10.2015
Dünyada hemofiliyalı xəstələrin tam sağalmasına nail olmaq üçün gen mühəndisliyi yolu ilə işlər görülməyə başlanılıb.
Bunu Hemofiliyalı Xəstələrin Respublika Assosiasiyasının prezidenti Gülnarə Hüseynova deyib.
Onun sözlərinə görə, artıq Almaniya və İtaliyada müəyyən təcrübə aparılıb. Bu ölkələrdə hemofiliyalı xəstənin geninə təsir edərək gen dəyişikliyi ilə xəstəliyin yüngülləşməyinə və hemofiliyalı xəstənin tam sağalmasına nail olunub.
Azərbaycanda “Tərəqqi” medalınının veriləcəyi sahələrin sayı artırıldı
06.10.2015
Azərbaycanda “Tərəqqi” medalının veriləcəyi sahələrin sayı artırılır.
Bununla bağlı məsələ Milli Məclisin bu gün keçirilən iclasında müzakirəyə çıxarılan “Azərbaycan Respublikasının “Tərəqqi” medalının Əsasnaməsinin və təsvirinin təsdiq edilməsi haqqında” qanuna dəyişiklik edilməsi barədə” qanun layihəsində əksini tapıb.
Dəyişikliyə əsasən, “Tərəqqi” medalının hüquq sahələrində xidmətlərə görə də verilməsi nəzərdə tutulur.
Azərbaycanda polislərə yeni vəzifələr verildi
06.10.2015
Azərbaycanda ictimai qaydanın qorunması və ictimai təhlükəsizliyin təmin edilməsi sahəsində polis əməkdaşlarının yerinə yetirdiyi vəzifələrin miqyası genişləndirilir.
Bununla bağlı məsələ Milli Məclisin bu gün keçirilən iclasında müzakirəyə çıxarılan “Polis haqqında” qanuna dəyişiklikdə əksini tapıb.
“Polis haqqında” qanunun 14-cü maddəsinə (İctimai qaydanın qorunması və ictimai təhlükəsizlin təmin edilməsi sahəsində polis əməkdaşının vəzifələri) yeni əlavə edilən bəndə əsasən, kütləvi idman tədbirlərinin və idman yarışlarının keçirilməsi zamanı idman obyektlərində, tamaşaçılar üçün nəzərdə tutulmuş yerlərdə, eləcə də idman obyektlərinə bitişik ərazilərdə və təxliyə yollarında zorakılığın qarşısını almaq, yarış iştirakçılarının və tamaşaçıların təhlükəsizliyini və ictimai asayişi təmin etmək də polis əməkdaşının vəzifəsi olacaq.
Müəllimlərin sınaq qiymətləndirilməsi yeni üsulla keçiriləcək
06.10.2015
Azərbaycanda müəllimlərin bilik və bacarıqlarının diaqnostik qiymətləndirilməsinin formatı dəyişdiriləcək.
Ölkə.Az xəbər verir ki, Təhsil Nazirliyinin (TN) İnsan resursları şöbəsinin müdir müavini İlham Nağıyev Trend-ə bildirib ki, Bakıda diaqnostik qiymətləri zamanı müəllimlər suallara kağız üzərində cavab veriblər: "Lakin bundan sonra diaqnostik qiymətləndirmənin elektron qaydada keçirilməsi nəzərdə tutulur. Hazırda bununla bağlı texniki işlər görülür".
Özəl tibb fəaliyyəti ilə bağlı yeni qaydalar təsdiq olundu
06.10.2015
Azərbaycanda özəl tibb fəaliyyəti ilə bağlı yeni qaydalar tətbiq olunur.
Bununla bağlı məsələ Milli Məclisin bu gün keçirilən iclasında müzakirəyə çıxarılan “Özəl tibb fəaliyyəti haqqında” qanuna dəyişikliklərdə öz əksini tapıb.
Belə ki, qanunun 4-cü maddəsinə əlavə edilən dəyişikliyə görə, “tibb fəaliyyəti ilə məşğul olan şəxslər tərəfindən özəl tibb fəaliyyəti sahəsində onlara verilmiş xüsusi razılıqda (lisenziya) göstərilən işlər və xidmətlərdən kənar (ilkin tibbi yardım istisna olmaqla) tibb fəaliyyətinin həyata keçirilməsinə yol verilmir”.
Həccdə ölən azərbaycanlıların ailələrinə kompensasiya ödəniləcək
06.10.2015
Builki Həcc ziyarəti zamanı vəfat edən azərbaycanlı zəvvarların ailələrinə kompensasiya ödəniləcək.
Ölkə.Az xəbər verir ki, bu barədə Report-un sorğusuna cavab olaraq Qafqaz Müsəlmanları İdarəsindən (QMİ) məlumat verilib.
QMİ-dən bildirilib ki, dünyasını dəyişən zəvvarların hər birinin ailəsinə 6 min manat məbləğində kompensasiya ödəniləcək:
“Nəzərdə tutulan kompensasiya yaxın günlərdə mərhumların ailələrinə veriləcək”.
MSK treninqlərə başladı
07.10.2015
Azərbaycan Respublikasının Milli Məclisinə 2015-ci il noyabrın 1-nə təyin edilmiş seçkilərlə əlaqədar aşağı seçki komissiyaları üzvlərinin maarifləndirilməsi proqramı çərçivəsində “Trenerlər üçün treninq”lərə başlanılıb.
Mərkəzi Seçki Komissiyasından verilən məlumata görə, cari ildə Milli Məclisə keçiriləcək seçkilərlə əlaqədar 2 mərhələli treninq layihəsi hazırlanıb. Artıq start verilmiş birinci mərhələdə treninqlərin seçki dairələrinin hər birindən 2 nəfərin iştirakı ilə keçirilməsi və 4 gün davam etməsi nəzərdə tutulur.
NİİM İntellektual Nəqliyyat Sistemi (İTS) konqresində iştirak edir
07.10.2015
Nəqliyyat Nazirliyi Nəqliyyatı İntellektual İdarəetmə Mərkəzinin baş direktoru Rüfət İmanov oktyabrın 5-də Bordo şəhərində keçirilən Ümumdünya İntellektual Nəqliyyat Sistemi Konqresində iştirak edir.
NİİM-dən Ölkə.Az-a daxil olan məlumata görə, 1994-cü ildən keçirilən Ümumdünya İntellektual Nəqliyyat Sistemi Konqresi bu il 5-9 oktyabr tarixlərində Fransanın Bordo şəhərində təşkil olunub.
Konqres 5 oktyabr tarixində 30 nazirlik nümayəndələrinin iştirakı ilə təşkil olunmuş dəyirmi masa ilə başlayıb. Bu ilki konqresin əsas hədəfi “intellektual mobilliyə doğru - ətraf mühitdən daha səmərəli istifadə”dir.
Dövlət universitetləri və xəstəxanalarının özəlləşdirilməsi təklif olundu
07.10.2015
Azərbaycanda dövlət universitetləri və xəstəxanalarının özəlləşdirilməsi təklif edilir.
Bu barədə təklifi Milli Məclisdə bir neçə komitənin büdcə müzakirələri zamanı millət vəkili Qüdrət Həsənquliyev səsləndirib.
Deputat qeyd edib ki, bu cür təcrübə dünya ölkələrində tətbiq edilir və səmərəli nəticələr verir.
Q.Həsənquliyev bildirib ki, dövlət universitetləri və xəstəxanaları özəlləşdirilsə, bu dövlət büdcəsinə gəlir gətirər və eyni zamanda, dövlət büdcəsinin yükünü azaldar.
Namizədlər seçkiyə nə qədər pul xərcləyə bilər?
07.10.2015
9-31 oktyabr tarixlərində Milli Məclisə keçiriləcək seçkilərdə namizədliyi qeydə alınan şəxslər təbliğat-təşviqat kampaniyasına başlayacaqlar. Hələlik heç bir namizəd bu kampaniyanı necə təşkil edəcəyini və nə qədər pul xərcləyəcəyini açıqlamayıb.
Əslində namizədin seçki kampaniyasına xərcləyəcəyi pullar cəmiyyətdə maraqla qarşılanır.
Məsələnin hüquqi tərəfi ilə bağlı araşdırma aparılıb.
Seçki Məcəlləsində namizədlərin seçkilərə xərcləyə biləcəkləri vəsaitlər barədə maddələr göstərilib. Seçki Məcəlləsinin 156-cı maddəsinə əsasən, namizədin seçki fondunun yuxarı həddi 500 min manatdan yuxarı ola bilməz.
Siyasi partiyalar üçün isə bu hədd 150 min manat göstərilib. Qanunvericilikdə seçki fondunun minimal həddi göstərilməyib. Yəni namizəd seçkidə pul xərcləməyə də bilər.
Namizədin fonduna yardım etmək istəyən fizki şəxs 3000 manatdan artıq könüllü ianə verə bilməz. Namizədə yardım etmək istəyən hüquqi şəxslər isə maksimum 50 min manat ianə köçürə bilərlər.
İTV-yə 100 min manat cərimə kəsildi
07.10.2015
Milli Televiziya və Radio Şurası (MTRŞ) İctimai Televiziya və Radio Yayımları Şirkətini məhkəməyə verib.
Ölkə.Az-ın APA-ya istinadla məlumatına görə, MTRŞ İTV-də yayımlanan “Qarabağnamə” çoxseriyalı bədii televiziya filminə ayrılan vəsaitin geri qaytarılması barədə iddia tələbi ilə 1 saylı Bakı İnzibati-İqtisad Məhkəməsinə müraciət edib.
Məhkəmə şuranın iddiasını təmin edib. Həmin qərarla razılaşmayan İTV isə apellyasiya şikayəti verib. Şikayət Bakı Apellyasiya Məhkəməsinə təqdim olunub.
Almanlar Azərbaycanda iki yüzə yaxın artefakt aşkar ediblər
07.10.2015
Azərbaycanın Mil-Qarabağ regionunda qazıntılar aparan beynəlxalq Azərbaycan-alman arxeoloji ekspedisiyası iki yüzə yaxın artefakt aşkar edib.
Ekspedisiyanın rəhbəri Almaniyanın Geydelberq Universitetinin professoru Barbara Helvinin məlumatına əsasən, tapıntılar Neolit dövründən orta əsrlərə qədər olan dövrə aiddir.
Əsasən Ağcabədi rayonunun ərazisində yerləşən qədim məskən Kamiltəpədə aparılan qazıntılar zamanı çiy kərpicdən hazırlanmış dairəvi tikili aşkar edilib. Alimlər ehtimal edirlər ki, yan divarlarının hündürlüyü 3 metrə çatan bu tikili Neolit dövrünə aiddir və bu ərazidə qədim gil-kərpic memarlığının yetərincə yüksək səviyyədə olmasının göstəricisidir.
DSMF: Sosial sığorta haqqı vergi deyil
07.10.2015
Bəzi ekspertlər sosial sığorta ilə verginin iqtisadi mahiyyətini ayırmaqda çətinlik çəkirlər.
Bu barədə Saatlıda keçirilən vətəndaş forumunda Dövlət Sosial Müdafiə Fondunun (DSMF) şöbə müdiri Famil Qədimov məlumat verib.
Fond rəsmisi forumda qaldırılan sualları cavablandırarkən sosial sığortanın iqtisadi mahiyyətinə görə vergi deyil, işçinin əməyinin dəyərinin bir hissəsi olduğunu və sosial risklərdən sığortalanma məqsədilə fondlaşdırıldığını diqqətə çatdırıb.
O, vurğulayıb ki, işçinin əməyinin dəyəri təkcə əmək haqqı kimi verilən məbləğlə deyil, işçi qüvvəsinin təkrar istehsalı üçün lazım olan bütün xərclərlə (o cümlədən xəstəlik, əlillik, qocalma, ailə başçısını itirmə hallarında təminatla) ölçülür.
Radara düşən sürücülərin nəzərinə
07.10.2015
Sürət həddini aşan sürücülər haqqında elektron protokollar tərtib edilir və bu “ASAN” ödəniş sistemi ilə onların mobil telefonlarına sms-lə bildirilir. Sms məlumatın gəlməsi üçün mütləq sürücünün mobil nömrəsi yol polisinin məlumat sistemində olmalıdır. Ancaq əksər sürücülərin mobil nömrələri qeydiyyatda yoxdur.
2014-cü ilə qədər avtomobillər qeydiyyata alınarkən sahibinin telefon nömrəsinin yol polisinə verilməsi mütləq deyildi.
Ona görə də xeyli sürücünün mobil telefon nömrəsi yol polisinin məlumat bazasında yoxdur. “ASAN” ödəniş sisteminin tətbiqi ilə mobil nömrənin də qeydiyyata alınması şərt kimi qoyulub. Bu, sürücülərin daha operativ məlumatlandırılması məqsədi daşıyır.
ANS məhkəməyə verildi: 160 min manat qaytarılsın
08.10.2015
Milli Televiziya və Radio Şurası (MTRŞ) ANS Müstəqil Yayım və Media şirkətini məhkəməyə verib.
Ölkə.Az Report-a istinadən xəbər verir ki, ANS-in məhkəməyə verilməsinə səbəb serial çəkilməsi üçün dövlət büdcəsindən ayrılan vəsaitdən düzgün istifadə edilməməsidir.
1 saylı Bakı İnzibati-İqtisadi Məhkəməsinə müraciət edən MTRŞ-in hüquqşünasları bildirib ki, ANS TV Şuraya layihəsini təqdim etdiyi serialı çəkməyib.
"Serial çəkilişi üçün ayrılan 200 min manatın 160 min manatı televiziyaya ödənilmişdi, 40 min manatı isə hələ büdcədədir.
Namiq Həsənov: "Cənab nazir oktyabrın 23-nə qədər məzuniyyətdədir"
08.10.2015
Ziya Məmmədov barədə son və səhih məlumat – rəsmi
Nəqliyyat Nazirliyinin sözçüsü Namiq Həsənov “Yeni Müsavat”a danışdı; “Nazir ölkədə deyil”; “Neçə nazirliyin səlahiyyətləri “Asan Xidmət”ə verildi, bundan heç yazan yoxdur”
Son günlər mətbuat nəqliyyat naziri Ziya Məmmədov barəsində çox yazır. Z.Məmmədovun özünün və yaxın çevrəsinin dövlət rəhbərliyinin gözündən düşdüyü deyilir. Bu iddiaların çoxalmasına prezidentin ötən ay verdiyi bir sərəncam da rəvac verdi. Sentyabrın 18-də dövlət başçısı İlham Əliyev “Dövlət Dəmir Yolları” QSC-nin Nəqliyyat Nazirliyinin tərkibindən çıxarılaraq müstəqil quruma çevrilməsi barədə sərəncam imzaladı. Bundan sonra mətbuat Z.Məmmədovu “portfelsiz nazir” kimi təqdim edərək, bunu onun karyerasının sonu kimi qiymətləndirdi.
Z.Məmmədovun deputat qardaşı Elton Məmmədovun parlament seçkilərində namizədliyini verməməsi, iki gün əvvəl prezident İlham Əliyevin Ucara səfəri zamanı Məmmədovların görünməməsi bu söz-söhbətləri bir qədər də körüklədi.
Nəqliyyat Nazirliyinin İctimaiyyətlə əlaqələr şöbəsinin rəhbəri Namiq Həsənov “Yeni Müsavat”a açıqlamasında son zamanlarda təmsilçisi olduğu qurum barəsində yazılan xəbərlərdən şikayətləndi: “Münasibət bildirmişdim ki, cənab nazir oktyabrın 23-nə qədər məzuniyyətdədir. Belə məlumatlara mövqe sərgiləmirəm. Cənab nazirin son açılış tədbirində iştirak edib-etməməsi səlahiyyətimə aid məsələ deyil. Amma ümumi götürəndə heç bir problem yoxdur. Mən reallıqdan uzaq yazılara münasibət bildirməyi doğru saymıram. Nəqliyyat Nazirliyindən, yaxud nazirdən nə istəyirlər? Kimlərin sifarişini yerinə yetirirlər, bunu da bilmirəm. 13 ildir nazirlikdə işləyirəm. Bu illər ərzində cənab nazirin vəzifədən çıxarılması haqda çox yazılıb. Vəzifə əbədi deyil. Burada fikir bildirilməli bir şey yoxdur”.
Nəqliyyat Nazirliyinin rəsmisi bu ilin iyulunda Z.Məmmədovun məzuniyyətə çıxması ilə bağlı yayılan xəbərlərə də aydınlıq gətirdi: “İyul ayında cənab nazir 10-15 günlük məzuniyyət götürmüşdü, səhhətinə görə. Sadəcə, indiki məzuniyyət əvvəlki illərdən qalıb, üst-üstə toplanıb. Adətən o, belə yazılara reaksiya vermir. Mən də onun işçisiyəm. Bu baxımdan çox reaksiya vermirəm. Çünki mənim işim konkret nazirliklə bağlı məsələlərə münasibət bildirməkdir. Yazılanlar da konkret şəxslə bağlıdır. Nazirliyə heç bir aidiyyəti yoxdur. Cəfəngiyyata münasibət bildirmək çətindir. Jurnalistlərin hər birinin öz yozumu var. Fakta istinadən münasibət bildirmək daha asandır. Ortada fakt yoxdursa, o zaman çox çətin olur. Cənab nazirin ortada olmamasının müəyyən səbəbləri ola bilər. ”Yeni Müsavat"a daim münasibət bildirmişəm. İstərdim ki, yazanlar bu qəzeti oxusunlar. Onsuz da sizin qəzetdən kopya edib, öz saytlarına qoyurlar. Bu müsahibəmi də kopyalayıb, öz mətbuat orqanlarına yerləşdirsinlər. Həmkarları kimi bildirmək istəyirəm ki, jurnalist faktlara əsaslanmalıdır. Yazı fakta əsaslanmırsa, yazı hesab etmirəm".
“Neçə nazirliyin səlahiyyətləri “Asan Xidmət”ə verildi, bundan heç yazan yoxdur”
Nazirliyin sözçüsü yayılan xəbərlərlə əlaqədar Z.Məmmədovun mətbuat konfransı keçirib-keçirməməsi ilə bağlı sualımıza belə cavab verdi: “Cənab nazir hazırda Bakıda deyil. Bakıya gələndə hər halda, fikir bildirər. Mətbuat konfransı keçirmək olar. Ümumiyyətlə, buna ehtiyac görmür. Deyilənlər o qədər şişirdilib ki, yalandan olan yazılara mətbuat konfransı keçirməyin mənası da yoxdur. Sadəcə olaraq, fikir bildirmir. Deyir ki, onsuz da haqqımda daim yazırlar. İş görən adam daim diqqət mərkəzində olur. Əgər ortada konkret bir fakt olsa, ilk növbədə, ”Yeni Müsavat"a açıqlama verərəm. Nazirliklə bağlı heç bir addım atılmır. Səlahiyyətlərin bir hissəsi “Asan xidmət”ə verildi, dərhal mətbuat başqa istiqamətə yozdu. Bundan əvvəl neçə nazirliyin bəzi səlahiyyətləri “Asan xidmət”ə verildi, bundan heç yazan yoxdur.
Bunlar tədricən gedən proseslərdir. Müəyyən nazirliklərin səlahiyyətlərini onsuz da “Asan Xidmət”ə verirlər. O ki qaldı dəmir yolunun nazirlikdən ayrılmasına, bu, cənab prezidentin səlahiyyətində olan məsələdir. Hazırda faktiki olaraq, iş yerimdəyəm, əvvəlki qayda ilə işimi davam etdirirəm. Amma yazılanların hamısını oxuyuram. Baxmayaraq ki, o yazıların böyük hissəsi heç bir fakta söykənmir. “Yeni Müsavat”a da ona görə münasibət bildirirəm ki, qoy əndişələnməsinlər. Ziya müəllim bu gün Azərbaycanın nəqliyyat naziridir. Onu bu vəzifəyə prezident təyin edib. Başqa qərarları da prezident verir. Təyin etməyi də, azad etməyi də. Bu, bizim səlahiyyətimizə aid məsələ deyil. Hər şeyi zaman göstərəcək. Bəlkə işlər daha yaxşıya doğru gedəcək. O zaman bu jurnalistlər nə yazacaqlar, onu bilmirəm".
MTRŞ: Xahiş etdilər ki, ANS TV-də pornoqrafiyanın yayımlanması işıqlandırılmasın
08.10.2015
Milli Televiziya və Radio Şurasının sədri Nuşirəvan Məhərrəmli ANS TV-nin efirində pornoqrafiya yayımlanması ilə bağlı əlində olan faktlar əsasında danışıb.
Ölkə.Az xəbər verir ki, bunu Report-a açıqlamasında Milli Televiziya və Radio Şurasının şöbə müdiri Təvəkkül Dadaşov deyib.
O, bildirib ki, vaxtilə bu problemlə bağlı kanala xəbərdalıq da olunub: "Telekanalın efirində 22 fevral 2013-cü il tarixdə gecə saatlarında yayımlanmış "Killer Co" adlı bədii filmin əsas süjet xətti sırf pornoqrafiya olmasa da, tez-tez erotik və pornoqrafik elementlərə rast gəlinirdi.
Filmdə qızla killer arasında erotik səhnələr yer alır.
Ötən ay 2200-dən çox əcnəbi Azərbaycandan çıxarılıb
08.10.2015
Dövlət Miqrasiya Xidməti tərəfindən 2015-ci ilin sentyabr ayı ərzində miqrasiya sahəsində dövlət siyasətinin həyata keçirilməsi, miqrasiya proseslərinə dövlət nəzarətinin gücləndirilməsi, idarə edilməsi və tənzimlənməsi, o cümlədən qanunsuz miqrasiyanın qarşısının alınması istiqamətində müvafiq tədbirlər həyata keçirilib.
Qurumdan Ölkə.Az-a verilən məlumata görə, ay ərzində 2416 əcnəbi tərəfindən Azərbaycanda olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərinin pozulması halları müəyyən edilib. Onlardan 21-nin Azərbaycan ərazisində müvəqqəti və ya daimi yaşamaq üçün əsas verən sənədləri itirildiyindən yenisi ilə əvəz olunub, 179 nəfərin ölkə ərazisində yaşamaları leqallaşdırılıb, 1719 əcnəbinin Azərbaycan ərazisini 48 saat ərzində tərk etmələri, 497 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.
Azərbaycanın şimal bölgəsində qar yağıb
09.10.2015
Azərbaycanın şimal bölgəsində yaşayış məntəqəsinə ilk dəfə qar yağıb.
Ölkə.Az-ın məlumatına görə, bu barədə Quba Regional Hidrometeorologiya Mərkəzindən məlumat verilib.
Qusar rayonu, Ləzə kəndi ərazisinə 1 sm qalınlığında qar düşüb. Quba rayonun Qırız və Qusar rayonunun Kuzun yaşayış məntəqələrinə isə sulu qar yağıb.
Regionda temperatur 5-8 dərəcə aşağı düşüb. Ən aşağı temperatur Quba rayonu, Xınalıq kəndi ərazisində qeydə alınıb. Burda temperatur mənfi 1,6 dərəcə olub.
Azərbaycana xarici ölkələrdən nə qədər qaçqın gəlib?
09.10.2015
Azərbaycana xarici ölkələrdən gəlmiş qaçqın və sığınacaq axtaran şəxslərin sayı açıqlanıb.
APA-nın məlumatına görə, Nazirlər Kabineti Aparatının qaçqınların, məcburi köçkünlərin və miqrasiya problemləri üzrə şöbəsinin müdiri Qurban Sadıqov BMT-nin Qaçqınlar üzrə Ali Komissarlığı İcraiyyə Komitəsinin 66-cı sessiyasında çıxışı zamanı deyib ki, Azərbaycan digər ölkələrdən gəlmiş 1500-dən artıq qaçqın və sığınacaq axtaran şəxsə ev sahibliyi edir.
"Bu şəxslərin təqribən yarısı Əfqanıstandan Azərbaycana gəlib. Həmin şəxslər üçün davamlı həll yollarının müəyyənləşdirilməsi və tətbiq olunması məqsədilə Azərbaycan Hökuməti BMT Qaçqınlar üzrə Ali Komissarlığı (QAK) ilə sıx əməkdaşlıq şəraitində məqsədyönlü iş aparır.
Xaricdə oxuyan məzunların diplomlarının tanınması asanlaşdırıldı
09.10.2015
Bu gündən etibarən nostrifikasiya prosedurundan keçmək üçün müraciət edən vətəndaşların təhsil sənədlərinə yalnız elektron formatda baxılacaq.
Bu barədə Ölkə.Az-a Təhsil Nazirliyindən (TN) məlumat evrilib.
Nazirlikdən bildirilib ki, həmin sənədlər elektron qaydada yükləndikdən sonra TN sənədlərin formal tələblərə cavab verib-vermədiyini müəyyənləşdirir. Düzgün formatda yüklənmiş sənədlər barədə "İcraata götürülmüşdür" qeydi yazılır.
Evsiz uşaqlar üçün ev tikiləcək — nizamnamə təsdiqləndi
10.10.2015
Azərbaycanda dövlət uşaq müəssisələrinin valideyn himayəsindən məhrum olmuş, yaşayış sahəsi olmayan məzunları üçün Abşeron rayonu, Masazır kəndi, “Duz zavodu” yolu, 2-ci massiv (ev 1) yaşayış evi tikiləcək.
Nazirlər Kabinetindən verilən məlumata görə, artıq “Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Sosial Təminat Xidmətinin nəzdində dövlət uşaq müəssisələrinin valideyn himayəsindən məhrum olmuş məzunları üçün “Məzun evi” Sosial Müəssisəsinin Nizamnaməsi” təsdiqlənib.
Ölkə.az
