Beynəlxalq şirkətdə çalışan Rəhimova Prezidentə məktub yazdı

Kosta Rikada yaşayan və hazırda “Roche” beynəlxalq şirkətində çalışan soydaşımız Solmaz Rəhimova dövlət başçısına məktub ünvanlayıb.

Ölkə.Az-ın məlumatına görə, məktubda bu gün Azərbaycanda strateji məqsədlərə nail olmaq üçün böyük addımlar atıldığını, iqtisadiyyatın inkişafına, infrastrukturun təkmilləşdirilməsinə, energetika sektorunda  nailiyyətlər əldə olunmasına, əhalinin rifahının yaxşılaşdırılmasına töhfələr verildiyini qeyd edib.

Diaspor nümayəndəsi Azərbaycanın regional əməkdaşlıq və diplomatik səylərinin, beynəlxalq arenada daha səmərəli və effektiv fəal iştirakçıya çevrilməsinin əhəmiyyətini vurğulayıb, diqqəti İkinci Qarabağ müharibəsində qazanılan zəfərə yönəldib.  
Solmaz Rəhimova qeyd edib ki, dövlət başçısının beynəlxalq ictimaiyyətə verdiyi mesajlar və sülh prosesi çərçivəsində atdığı addımlar  ölkəmizin adil və davamlı sülhü dəstəkləməsi yolundakı əzmini əks etdirir. 

“Azərbaycanın mədəni zənginliyi və tarixi mirası, ölkənin qlobal səviyyədə bir iştirakçı kimi tanınmasında əhəmiyyətli rol oynayır. Mədəni diplomatiya və turizm sahəsindəki inkişaf Azərbaycanın dünyada daha çox diqqət mərkəzində olmasına kömək edir. Azərbaycan daxili və xarici çətinliklərin öhdəsindən uğurla gəlir. Bu prosesdə göstərilən fəaliyyət, ölkənin gələcəyi üçün dəyərli imkanlar yaradır”, - deyə diaspor nümayəndəsi bildirib.