Kəmaləddin Heydərov paytaxtı "qaz blokadasına" alır

Xətai rayonu Süleyman Vəzirov küç.17 ünvanda yerləşən üç ildir ki, istifadəyə verilmiş 4 yaşayış binasına təbii qaz verilmir.

Qeyd edirik ki, binalar 17 mərtəbəlidir və demək olar ki, bütün mənzillərdə sakinlər məskunlaşıblar.

Sakinlərin məskunlaşmasına baxmayaraq Fövqəladə hallar nazirliyinin təyin etdiyi "şapka" ucbatından tikinti şirkəti və "Azəriqaz" QSC binalara üç ildir qaz çəkə bilmir.

Xatırladırıq ki, FHN-nin icazəsi və rəyi olmadan heç bir yaşayış binası və ictimai iyaşə obyekti istifadəyə verilə bilməz. Bu obyektlərə qaz, su, işıq verilməsinə belə FHN icazə verməlidir. Binanın və obyektin yerləşdiyi əraziyə uyğun olaraq FHN tərəfindən müəyyən edilmiş və dövri olaraq dəyişən "şapka" məbləği şəhərin mərkəzi hissəslərində bəzən kvadrat metrə görə 1000 manata çatır.

Haqqında danışdığımız "İdeal inşaat" şirkətinin tikdiyi binalar da fövqəlnazirin müfəttişlərinin maneəsinə rast gələn yüzlərlə binadan sadəcə dürdüdür. Redaksiyamıza binanının sakinlərindən daxil olan məlumatda bildirilir ki, bütün instansiyaların yoxlamasından müvəfəqiyyətlə keçən binalar yalnız FHN-nin "standartlarına" cavab verə bilməyiblər. Təbii, başçısının da "yüksək standartlı nazir" olduğu bir nazirliyin standartları "çox yüksəkdir" və ona uymaq hər firmanın, hər binanın işi deyil. 

Sakinlər bildirirlər ki, artıq elektrik enerjisinə pulları çatmadığından hətta mənzillərin çoxunda işıq belə yoxdur. "XXI əsrdə, dünyaya qaz, işıq satan bir ölkənin paytaxtında Afrikada kimi yaşamaq utancvericibir şeydir", deyə sakinlər üç ildir davam edən və sonu bilinməyən FHN özbaşınalığına üsyan edirlər.

Müraciətlərində Kəmaləddin müəllimin onlara niyə cəhənnəm əzabı verdiyini bilmək istəyən sakinlər redaksiyamızdan xahiş etdilər ki, onların səsini ictimaiyyətə çatdıraq. Bəlkə Kəmaləddin müəllim də eşidib insafa gələ və evlərinə qaz verilməsinə icazə verə. Artıq üç ildir çəkdikləri zülümün sona çatacağına ümid edən bina sakinləri problemin həll olunacağı təqdirdə Ramazan bayramının fitrə zəkatını FHN işçilərinə verəcəklərini bildirdilər.

Bütü bunlar isə ölkənin bütövlükdə qazlaşdırılması proqramını təsdiqləyən prezident ucqar rayonlarımızdakı dağ kəndlərinə belə qaz çəkilməsi haqda göstəriş verməsinə baxmayaraq, paytaxtın mərkəzində dövlət başçısının qərarları, fərmanları və göstərişləri FHN kimi nazirliklər tərəfindən qulaqardına vurularaq kobud şəkildə pozuluması deməkdir

Ölkə.az