\"Yollarımız azdır, çox tikməliyik\"

“Mövcud qanunda mülkiyyətçilərinə görə avtomobil yolları dövlət, bələdiyyə və özəl yollar kimi təsnif edilir. Bəli, biz ölkə olaraq liberal iqtisadiyyat modelini dəstəkləyirik, dövlətin yükünü azaltmaq üçün özəl sektora geniş yer veririk və dövlət əmlakının idarə edilməsini də bu cür qurumlara həvalə edə bilirik. Bu baxımdan qanuna edilən dəyişiklikdə maddə 19-1 ödənişli avtomobil yolları, 19-3 ödənişli avtomibil yollarından istifadə olunması və 19-4 ödənişli avtomobil yollarından ödənişli əsaslarla istifadə olunmasına xitam verilməsi və ya dayandırılması maddələrinə edilən müvafiq dəyişiklikləri məqbul hesab edirəm. Lakin 19-2 ödənişli avtomobil yollarının yaradılması barədə qərarların qəbul edilməsi maddəsi isə yeni redaksiyada hesab edirəm ki, indiki şəraitdə bir qədər çətinlik yarada bilər. Belə ki, yeni dəyişikliyə görə avtomagistraldan ödənişli yol kimi istifadə edilməsi, habelə ödənişli avtomagistralın tikilməsi barədə qərarı müvafiq icra hakimiyyəti orqanının müəyyən etdiyi orqan (qurum) qəbul edir".

Ölkə.Az xəbər verir ki, bunu deputat İltizam Yusifov parlamentdə çıxışı zamanı deyib.

Onun sözlərinə görə, avtomobil yolları strateji obyektdir və hər bir ölkənin təhlükəsizlik infrastrukturunun əsas elementi hesab olunur. "Elə mövcud “Avtomobil yolları haqqında” qanunda avtomobil yollarının təyinatı maddəsində (Maddə 2) göstərilir ki, avtomobil yolları Azərbaycan Respublikasının ərazisində habelə dövlətin təhlükəsizliyinin və müdafiə qabiliyyətinin gücləndirilməsinə xidmət edir. Hətta mövcud qanuna görə ödənişi avtomobil yollarının yaradılması, dövlət büdcəsinin, habelə yerli və xarici investorların vəsaitləri hesabına maliyyələşdirilsə də, mən hesab edirəm ki, 19-2 maddəsində avtomagistraldan ödənişli yol kimi istifadə edilməsi, əsasən də ödənişli avtomagistralın tikilməsi barədə qərarı müvafiq icra hakimiyyəti orqanı, yəni hökumətin özü qəbul etməsi daha düzgün olardı. Müvafiq icra hakimiyyəti orqanının təyin etdiyi orqan isə bu barədə təklif verə bilər", - o qeyd edib.

Deputat daha bir məsələyə də toxunub: “1-ci oxunuşda yolların dar olması və tıxaclarla bağlı məsələ səsləndi. Onu deyim ki, Azərbaycanda, əsasən də Bakı şəhərində tıxacların yaranma səbəbi yolların dar olması və ya “Avtomobil yolları haqqında” qanunla əlaqəli deyil. Qanunda problem yoxdur. Sadəcə, yollarımız azdır. 1 km yola düşən avtomobil sayı, yəni sıxlıq yüksəkdir. Bunun üçün də biz dövlət, özəl və bələdiyyə avtomobil yollarını çox tikməli, infrastruktur layihələrinin tikintisini davam etdirməliyik. Bilirsiniz ki, ölkə başçısı cənab ilham Əliyev son 20 ildə məhz yol infrastrukturunun genişləndirilməsinə xüsusi diqqət verib. Yadınızdadır, müstəqillikdən əvvəl, o cümlədən Şuşa işğalda olunanda Şuşaya cəmi bir yol var idi. Bunun da nəticəsini gördük. Bu gün Şuşa azad ediləndən sonra artıq ora bir neçə istiqamətdə - Zəfər yolu və digər yollar çəkilir.

Tıxaclar isə ayrı problemdir. Bunun həlli də mümkündür. Bunun üçün yol hərəkətinin təşkili təkmilləşdirilməlidir və yol hərəkəti haqqında yeni qanun qəbul olunmalıdır".

Mürtəza
Ölkə.Az