Zorakılıq, bullinq, özbaşınalıq: Polis məktəbləri nəzarətə götürür?
Ötən axşam sosial şəbəkələrdə Bakıdakı 156 nömrəli məktəbin XI sinif şagirdinin məktəbdən kənarda 2023-cü ildə IX sinifdən məzun olmuş qıza qarşı uyğunsuz və qeyri-etik davranışına dair yayılan görüntülər cəmiyyətdə narazılıqla qarşılanıb.
Bu kimi məsələlərdə əsas hədəf valideynlər göstərilir. Bəs müəllim və təhsil ocağı analoji hallarda məsuliyyət daşıyırmı?
Bununla bağlı təhsil eksperti Cahid İmanlı “Yeni Sabah”a açıqlama verib. Bildirib ki, şagirdlər vaxtının əksər hissəsi məktəbdə keçir, bu səbəbdən uşaqlarda tərbiyəni məktəb formalaşdırmalıdır:
“Sosial şəbəkələr, ətraf mühit, ailə və digər amillər nə qədər təsirli olsa da, bunu minimuma endirəcək qədər məktəbin də rolu olmalıdır. Həmin hadisə kənarda yaşansa da, burada məktəbin, həmçinin təhsil sisteminin, müəllimlərin, valideynin, cəmiyyətin, ümumiyyətlə, hər birimizin müəyyən dərəcədə günahı var. Uşaq məktəbdən kənarda belə özünü düzgün aparmırsa, bu o deməkdir ki, onun tərbiyəsində müəyyən boşluqlar var. Burada məsuliyyət nə qədər məktəbin üzərinə düşürsə, bir o qədər də valideynin də rolu mühüm əhəmiyyət kəsb edir. Məktəb təkcə təhsil yox, eyni zamanda tərbiyə ocağıdır. Ona görə də bu məkanda təhlükəsiz mühit yaratmaq lazımdır. Ehtiyac görülərsə, məktəbin həyəti və ya ətrafında polis nəzarəti yaradılmalıdır”.
Ekspert məktəblərdə şagirdlərə təsir mexanizminin olmamasından gileylənir:
“11 illik təhsil müddəti az deyil. Bu vaxt əsnasında şagirdlərin davranış forması yaradılmalıdır. Harada olmağından asılı olmayaraq şagird necə davranmaq lazım olduğunu öyrənməlidir. Şagirdlərə mənfi təsir edəcək uşaqlar müəyyənləşdirilməli, lazım gələrsə, məktəbdən kənarlaşdırılmalı, bu məsələ üzərində xüsusi tədbirlər görülməlidir. Pis nümunə olan şagirdləri islah etmək, bu mümkün olmadıqda isə çətin tərbiyə olunan uşaqlar üçün olan məktəblərə yollamaq lazımdır. Ancaq hazırda təhsil ocaqlarında şagirdlərə təsir edəcək bir mexanizm yoxdur.
Davamiyyət bir kənara, təhsil müəssisələrində nizam-intizam yaratmaq, məktəb nizamnaməsi, məktəbdaxili qanunlarla onu formalaşdırmaq mümkün deyil. Gündəm olan hadisəyə oxşar halların harada yaşanmasının elə də mahiyyəti yoxdur. Əsas odur ki, onlar məktəblidir, belə hadisələr də onlara yaraşmır”.
