Müdirdən nə vaxt maaş artımı tələb etmək olar?

Bir ildir işləsə də, maaşının eyni qaldığından şikayət edən kadrlar olur. Bu məsələlər müzakirə mövzusu olanda, onlara reaksiya fərqli ola bilir. Onların şikayətdə haqlı olduğunu düşünənlər də var, amma bir qisim “Hələ bir ildir işləyirsən, maaş artımı tezdir”, “İlk 10 il karyeradan pul gözləmək lazım deyil” kimi fikirlər səsləndirənlər də çox olur. O zaman sual yaranır ki, bir il eyni maaşı alırsansa, əməkhaqqı barədə narahatlıq duymamalısan? Ümumiyyətlə, işləməyə başlayandan neçə il sonra pulu düşünmək lazımdır?

Bu barədə Valyuta.az-a danışan HR Hunter şirkətinin qurucusu, İnsan Resursları üzrə konsultant İlkin Mirzəzadə bildirib ki, əgər kimsə karyerasına yeni başlayırsa, yəni, təcrübəçi, kiçik mütəxəssisdirsə, onlar üçün bir il ərzində çətin olacaq:

“Hətta müəyyən yaşa çatmış şəxslər karyerasını dəyişmək istəyirsə, onlara da deyirəm ki, sən fərqli mövqelərdə işləyə, çox yaxşı maaş ala bilərsən, amma burada yenisən buna görə sənə o maaşı verməyəcəklər. Bir il, bəlkə də, olduğun maaşa çatmaq üçün iki il vaxt lazım ola bilər. Bu baxımından karyeranın birinci ili çətin olur və istəklər müəyyən qədər az olmalıdır. Çünki bu şəxs hələ yetişməyib. Hətta bu şəxs sevinməlidir ki, şirkət ona dəstək olur, işə götürür və öyrədir. Bir ildən sonra şəxs görsə ki, peşəkarlaşıb və daha yaxşı səviyyədə bilikləri var, o zaman müəyyən şeylər istəyə bilər. Şirkətin siyasəti buna uyğun formalaşsa, daha yaxşı olar ki, karyera inkişafı və digər məsələlər olsun”. 

Konsultant yeni işə başlayanların müəyyən müddətlik sınaq dövrü keçməli olduğunu vurğulayıb:

“Ümumiyyətlə, yeni işə başlanılan şirkətdə üç ay sınaq dövrü sayılır, minimum altı ay, yaxşı halda bir ildən sonra işçinin nəsə istəməsi düzgündür. Çünki sən artıq yeni şirkətdə işə başlayırsansa, ortaya nəticə qoymalı və özünü yaxşı mənada göstərməlisən. Ortaya nəticə qoyulmamış istəklərin olması düzgün deyil, nəticə əldə etdikdən sonra müəyyən qədər artımlar istəmək olar”.