Ciddi addımlar atmalıyıq, zəhərləyirlər – Deputatdan ÇAĞIRIŞ

Etibarlı su təchizatı Azərbaycan üçün həyati əhəmiyyət kəsb etdiyindən bu məsələyə ciddi yanaşmaq lazımdır.

Ölkə.Az xəbər verir ki, bunu deputat Asim Mollazadə Milli Məclisdə təşkil olunan “Ölkənin su təsərrüfatı: problemlər və yeni çağırışlar” mövzusunda dinləmədə çıxışı zamanı deyib.

Onun sözlərinə görə, artıq dünyanın bir çox bölgələrində, xüsusən də Orta Asiyada su çatışmazlığı faciələrə yol açıb. “Nəticədə Aral dənizi səhraya çevrilib. Odur ki, sudan qənaətlə istifadə həyati bir məsələdir. Bu gün su itkisinə təkcə suvarma sahəsində yol verilmir. Eyni zamanda içməli suyun verilməsində də ciddi itkilərə yol verilir”, - deputat bildirib.

O əlavə edib ki, su itkilərinə daha çox böyük şəhərlərdə yol verilir: “Rəsmi məlumatlara görə. təkcə Bakıda 48 faiz su itkisinə yol verilir, lakin digər məlumatlara görə bu itki 60-70 faiz civarındadır. Bu, çox böyük itkidir. 

Bunun qarşısını almaq üçün ciddi adımlar atmalıyıq”, - o qeyd edib.

Deputat eyni zamanda əlavə edib ki, Azərbaycanın su ehtiyatı kənardan formalaşdığından onun keyfiyyəti ilə bağlı məsələlər beynəlxalq aləmdə qaldırılıb, onun həllinə nail olmaq lazımdır: “Ermənistan Azərbaycanın bir sıra çaylarını zəhərləyir. AŞPA-da bununla bağlı sənəd qəbul edilib və bu məsələyə yenidən qayıdılmalıdır. Gürcüstan da Kür çayını yetərincə çirkləndirir”.

Deputat eyni zamanda onu da bildirib ki, əhaliyə verilən suyun keyfiyyətində ciddi problmelər var. “Suyun keyfiyyətinin aşağı olması infeksion və hepatit xəstəliyinin yayılmasına şərait yardır”, - o qeyd edib.

Mürtəza