"Aktual mövzu" proqramında virtual sorğu sərt tənqid olundu

Tanınmış teleaparıcı Anar Yusifoğlunun aparıcısı olduğu İctimai Televiziyanın "Aktual mövzu" proqramının bu dəfəki qonaqları ictimaiyyətin yaxından tanıdığı şəxslər ekspert qismində iştirak ediblər.

Ölkə.az xəbər verir ki, Anar Yusifoğlunun qonaqları ictimai problemlərin tədqiqi komissiyasının rəhbəri Məhərrəm Zülfüqarlı, Milli QHT forumunun rəhbəri Rauf Zeyni və tanınmış jurnalist Elçin Mirzəbəyli olublar. 1 noyabr parlament seçkiləri ərəfəsində ölkədəki seçki mühiti, namizədlərin seçkilərə hazırlığı, təbliğat-təşviqat kampaniyası, onun metodları və s. proqramda geniş müzakirə olunub.

Anar Yusifoğlunun proqramda qabartdığı problemlər qonaqlar tərəfindən qızğın müzakirə mövzusuna çevrilib. Proqramda tənqid olunan əsas məsələ bəzi namizədlərin seçiciləri pulla əla almaq cəhdləri, namizədliyini verdiyi dairənin ərazisində seçkidən əvvəl "gözdən pərdə asmaq" üçün səki və oturacaq skameykalarını rənglətdirən, bununla da deputat mandatı əldə edə biləcəklərini umanlar sərt tənqid atəşinə tutuldular.

Daha sonra bəzi namizədlərin verdiyi gurultulu vədlərə toxunan tanınmış teleaparıcı məsələnin absurd tərəflərini tamaşaçıların və qonaqların diqqətinə çatdırdı. "Hətta bəzi namizədlər Qarabağı alacağını vəd edir" deyə Anar Yusifoğlu qonaqlara bu məsələlər barədə ictimaiyyətə məlumat verməyin faydasından danışdı. Seçki şüarlarının yazılış qaydaları da proqramda sərt tənqid olundu. Bəzi namizədlərin sanki seçicilərə əmr verirmiş kimi öz təbliğat kağızlarını və rəngli posterlərini tərtib etdikləri diqqətə çatdırıldı.

Proqramda həmçinin internetdə online səsverməyə də münasibət bildirilib. Ekspertlərin hər üçü bu tip sorğuların, online səsvermələrin və ortaya çıxarılan saxta reytinqlərin uğursuzluğundan danışdılar. Müzakirələrin nəticəsində bəlli oldu ki, bu tip piar uğursuzluqdan başqa heç nə ilə nəticələnə bilməz və seçicilərin etimadını qazanaraq deputat seçilmək istəyən şəxs seçici ilə birbaşa təmasda olub onun nəbzini tutmalıdır.

İzləyin...

Ölkə.az