Rüstəm Behrudi həbs olunan qohumu barədə: \"Sərhədi keçəndə məndən soruşmamışdı ki...\"

Tanınmış şair Rüstəm Behrudi Dövlət Sərhəd Xidməti əməkdaşları tərəfindən Gürcüstan istiqamətində pozmağa cəhd göstərərkən saxlanılan bacısının həyat yoldaşı Səməd Sadıqov barədə danışıb.

Şair Ölkə.Az-ın əməkdaşı ilə söhbətində bildirib ki, qohumunun iş həyatından xəbərsizdir:

"Bəli, o adam mənim bacımın yoldaşıdır. Ancaq onun nə işlə məşğul olduğundan xəbərsizəm. İş həyatı ilə heç bir bağlılığım yoxdur. Qanun çərçivəsində nə bacarsam kömək edəcəyəm. Amma əgər saytlarda yazıldığı kimi qeyri-qanunu sərhədi keçibsə, ona necə kömək etmək olar? Qanun çərçivəsində tədbir görüləcək. Sərhədi keçəndə məndən gəlib soruşmayıb ki, keçim, ya keçməyim. Ona görə də özünün problemidir".

Qeyd edək ki, criminal.az-ın xəbərində Səməd Sadıqovun oktyabrın 11-də Dövlət Sərhəd Xidməti əməkdaşlarının keçirdikləri əməliyyat-axtarış tədbirləri nəticəsində Balakən rayonu Mazımçay kəndi ərazisindəki zastavanın xidməti sahəsindən dövlət sərhədini Azərbaycandan Gürcüstan istiqamətində pozmağa cəhd göstərərkən saxlanıldığı bildirilirdi.

S.Sadıqovun dövlət banklarına olan külli miqdarda borcu olub və ödəməkdən yayınmaq məqsədilə ölkəni qeyri-qanuni yolla tərk etmək niyyətində olub. O, həm də televiziya direktorudur. S.Sadıqov "CityTV" televiziyasının təsisçisi və direktorudur. Eyni zamanda "Powerful" şirkətinin Azərbaycan üzrə marketinq direktoru vəzifəsində çalışır.

İntiqam VALEHOĞLU
Ölkə.az