Regionlarda iş yerləri açmaq lazımdır – Deputatlar Bakını “propka”dan qurtarmağa səsləyir
Deputatlar tıxac probleminin həlli üçün Respublikanın müxtəlif bölgələrinə sürət qatarlarının təşkil olunmasını təklif edirlər.
Ölkə.Az-ın xəbər verir ki, deputat Naqif Həmzəyev parlamentdə dinləmələr zamanı çıxışında tıxacın aradan qaldırmaq üçün şəhərətrafı və şəhərlərarası sürət qatarların təşkilini təklif edib.
“Əgər sürət qatarı təşkil olunarsa, o zaman insanlar avtomobilə deyil qatarlarla işə gəlib gedər. Bu da tıxacın aradan qaldırılmasına yardım edə bilər”, - deputat qeyd edib.
Deputat İltizam Yusifov isə təklif edib ki, Respublikanın bütün bölgələrinə sürət qatarı təşkil edilməlidir: “Sürət qatarlarının hərəkət qrafiki elə təşkil edilməlidir ki, insanların səhər Bakıya işə gəlib evə qayıtması mümkün olsun. Belə olarsa, tələbə və ya işçi səhər rayondan Bakıya və dərsə gəlib axşam da evinə dönər. Bu da tıxacın həllinə yardım edər. Əgər istək olarsa, tıxac problemini həll etmək olar”, - deputat bildirib.
O eyni zamanda metro tikintisinin sürətləndirilməsini təklif edib.
Digər parlament üzvü Aydın Hüseynov Ələtə sürət qatarının təşkil olunmasını təklif edib.
Millət vəkili Müşfiq Cəfərov tıxac problemini həlli üçün sürət qatarı ilə Sumqayıt-Bakı və Bakı daxilində metrobusların təşkilini təklif edib.
N.Həmzəyev eyni zamanda ölkə daxilində şəhərlərarası aviareyslərin, xüsusən də Bakı-Gəncə aviareysinin bərpa olunmasını təklif edib. Bildirib ki, bununla bağlı dəfələrlə məsələ qaldırsa da, ancaq özü deyib özü eşidib.
Deputat Vahid Əhmədov isə deyib ki, tıxac problemini həll etmək üçün regionlarda iş yerləri açmaq lazımdır. Bu olmadıqca mövcud problemi həll etmək qeyri-mümkündür.
Mürtəza
Ölkə.Az
