Kəmaləddin Heydərov növbəti naziri hədəfə götürdü
Bu dəfə "fövqəlnazirin" qəzəbinə kabinetin ən "fağır" üzvü Elmar Məmmədyarov düçar oldu
Yüksək intellekt səviyyəsinə, rəhbərlik etdiyi sahəni gözəl bilməsinə, fəaliyyəti dövründə nümayiş etdirdiyi siyasi etika və mədənyyətə görə Azərbaycan hökumətinin ən layiqli nazirlərindən biri parlamentdəki "Heydərov fraksiyasının" hədəfinə götürülüb.
Kəmaləddin Heydərovun parlamentdəki nümayəndələrindən biri, onun media qrupuna nəzarət edən Qüdrət Həsənquliyev Azərbaycanın XİN başçısı Elmar Məmmədyarovu tənqid atəşinə tutub. Qeyd edirk ki, tənqidin səbəbi heç də Məmmədyarovun diplomatik fəaliyyəti deyil. Cənab Həsənquliyev XİN başçısını "yersiz gülməkdə", "pis poza verməkdə", "çiyinlərini yellətməkdə" ittiham edib. Həsənquliyevin Məmmədyarovla bağlı səsləndirdiyi fikirləri olduğu kimi sizə təqdim edirik:
"Mən prezident seçkilərində də söyləmişdim, təəssüf ki, xarici işlər naziri bu hökumətiun tərkibində ən bacarıqsız nazirlərdən biridir. Bu gün də bunu bir daha təkrar edirəm ki, onun davranışından tutmuş verdiyi açıqlamalara və səfirlikləri idarəetmə qabiliyyətinə qədər heç nə yerində deyil. Məsələn, o erməni həmkarı Nalbəndyanla yan-yana duranda düşmən ölkə diplomatı çox ciddi görkəm alır, elə poza verir ki, sanki Ermənistanın torpaqları işğal altındadır, amma bizim nazir gülür və səbəbsiz yerə çiyinlərini yellədir. Hər halda onun davranışları qıraqdan müşahidə edən heç kimə yaxşı görsənmir. Yəni bu adamın sifətinin ifadəsindən tutmuş açıqlamalarınadək heç nə yerində deyil. Bu, ölkənin xarici siyasət idarəsinin başında duran şəxslə bağlı mənim mövqeyimdir və şəxsi mənada da onunla heç bir problemim yoxdur. Sadəcə olaraq söyləmək istəyirəm ki, onu Bakıda başqa bir işə keçirmək olar. Amma bu sahədə hökumətin ən uğursuz nazirlərindən biri kimi o əvəzlənməlidir".
Cənab Qüdrət Həsənquliyev Elmar Məmmədyarovun yerinə kimin daha layiq olduğu haqda isə heç bir fikir söyləməyib. Deməli nazir olmaq, həm də xarici işlər naziri olmaq üçün heç də şəxsi keyfiyyətlər, sadəlik, alicənablıq, ürəyiaçıqlıq əsas kriteriyalar deyilmiş. Deməli, Qüdrət Həsənquliyevin ağlı ilə nazir hökmən həm də oliqarx olmalı, şirkətlər qrupuna, otellər zincirinə, general paqonlarına, offşor zonalarda yatan milyardlara, dünyanın böyük şəhərlərinin hamısında villalara, saraylara, qanunsuz silahlı dəstələrə, media-holdinqə, həm də parlamentdə şəxsi fraksiyaya malik olmalıdır. Bundan başqa, nazir mütləq özünün rəhbərlik etdiyi nazirlkdən başqa bir neçə digər nazirliyə və dövlət komitəsinə də nəzarət etməlidir. Yoxsa Elmar Məmmdəyarov kimi?..
Bundan başqa Həsənquliyev xaricdəki səfirlərimizin böyük bir hissəsinin də elə nazir kimi, nazir xasiyyətdə olduğunu bildirərək onaların da geri çağırılmasını tələb edib. O, bildirib ki, səfirlərimiz çalışdıqları ölkələrin mediasında Azərbaycanı tanıtdırmaq üçün heç bir iş görmürlər. Yerli diaspor təşkilatlarının rəhbərləri ilə səfilərimizin münasibətlərinin münaqişə həddində olduğunu iddia edən Qüdrət Həsənquliyev diplomatik korpusun daxilində təmizlənmə aparılmasını təklif edib.
Ölkənin ən iri media qrupları olan "Jalə mediasının" işlərini idarə edən bir şəxs kimi görəsən Həsənquliyev özü indiyədək Azərbaycanın dünyada tanıdılması üçün hansı işləri görüb? Nəzarət etdiyi informasiya orqanlarının yaydığı dezinformasiya və Kəmaləddin Heydərovun qəzəbinə tuş gəlmiş ayrı-ayrı dövlət məmurlarına qarşı aparılan qarayaxma kampaniyası ilə ölkəmizdə ictimai birliyi, vətəndaş həmrəyliyini təhlükə altında qoyan nəhəng bir media-holdinqin baş meneceri kimi Qüdrət Həsənquliyev hansı işləri görüb? Hər halda gördükləri işlər bu KİV-lərin səhifələrindədir və heç bir işin görülmədiyi də göz önündədir.
Həsənquliyev bir şeyi də unudur ki, diplomatik korpus və diaspor təşkilatları şəxsən prezidentin nəzarəti altında olan strukturlardır və bütün səfirləri şəxsən dövlət başçısı özü təyin edir. Hər bir səfir və ya konsul təyinatından əvvəl ciddi suratdə yoxlanılır, təlimatlandırılır, prezdentlə görüşüb əsas tapşırıqları ondan aldıqdan sonra vəzifəsinin icrasına başlayır. Qüdrət Həsənquliyev hələ də dərk etmir ki, səfir təyin etmək gömrük postuna rəis və ya FHN manqasına başçı təyin etmək deyil. Bu işin öz incəliyi var və bunun üçün bütün dünyada qəbul olunmuş qaydalar mövcuddur. Diplomatik korpusdakı kadr siyasətinin yarıtmaz olduğunu iddia etməklə Həsənquliyev və onun "dirijoru" dolayı yolla həm də ölkə başçısını bu sahəyə nəzarət edə bilməməkdə ittiham etmiş olurlar.
Həmçinin diaspor təşkilatlarımızın rəhbərləri Nazim İbrahimovun rəhbərlik etdiyi Xaricdə yaşayan soydaşlarımızla iş üzrə dövlət komitəsi ilə sıx əlaqədə çalışırlar. Bütün diaspor təşkilatlarımızın rəhbərləri Nazim İbrahimovla əlaqəli çalışırlar və onar haqqında rəyi prezidentə məhz komitə sədri özü bildirir. Həsənquliyevin bəyanatından da göründüyü kimi fövqəlnazirin hədəfində yalnız Elmar Məmmədyarov yox, həm də Nazim İbrahimov var. Məsələnin kökünə nəzər salsaq görərik ki, əslində Heydərovun əsas zərbəsi İbrahimova endirilib.
Elmar Məmmədyarovla heç bir şəxsi probleminin olmadığını bildirən fövqəlnazirin parlament fraksiyasının üzvü Həsənquliyev ona Bakıda "başqa bir iş" verməyi təklif edib. Maraqlıdır, görəsən fövqəlnazirin məlum səbəblərdən Həsənquliyevə göstərdiyi lütfü olmasaydı indi o haralarda idi və nə "işlə məşğul" olurdu?
Olke.az-ın Monitorinq şöbəsi
