Həftənin icmalı
Qarabağla bağlı beynəlxalq qalmaqal: 20 milyon dollara kənd salınır
12.10.2015
Azərbaycanın işğal altındakı Dağlıq Qarabağ ərazisində beynəlxalq şirkətlərin iştirakı ilə yeni ekokənd salınacaq.
Ölkə.Az Modern.az-a istinadən xəbər verir ki, Əsgəran rayonunun Həsənriz (ermənicə Norqyux) kəndinin yaxınlığında yaradılacaq mərkəz aqrar, təhsil və turizm sahələrində müəssisələrin cəmləşdiyi kompleks rolunu oynayacaq.
Oktyabrın 11-də Xankəndidə təqdimatı keçirilən layihəni Rusiyada yaşayan erməni biznesmeni Ruben Vardanyanın təsisçisi olduğu təşkilat maliyyələşdirəcək.
Bunun üçün biznesmen 20 milyon dollar vəsait ayırıb.
Mikayıl Cabbarov: Müəllimlərin maaşında əhəmiyyətli artım olacaq
13.10.2015
Bu il müəllimlərin tam şəffaf və elektronlaşdırılmış qaydada keçirilən işə qəbulu müsabiqəsində 3068 nəfər işlə təmin olunmuşdur.
Bunu Azərbaycan prezidenti İlham Əliyevin sədrliyi ilə keçirilən Nazirlər Kabinetinin 2015-ci ilin 9 ayının sosial-iqtisadi inkişafının yekunları və qarşıda duran vəzifələrə həsr olunmuş iclasında təhsil naziri Mikayıl Cabbarov deyib.
O qeyd edib ki, cari ilin 9 ayında Təhsil Nazirliyi tərəfindən 6 məktəb binası tikilib istifadəyə verilib, 2 kollec, 1 ali təhsil müəssisəsinin tədris korpusları əsaslı təmir edilib, 27 təhsil müəssisəsində isə əsaslı tikinti və təmir işləri davam etməkdədir.
Oqtay Şirəliyev: Son 10 ildə Azərbaycanda 586 səhiyyə müəssisəsi tikilib
13.10.2015
"Dünyadakı maliyyə böhranına baxmayaraq, Azərbaycan dövləti səhiyyə sahəsində öz vətəndaşları qarşısında götürdüyü bütün öhdəlikləri yerinə yetirir".
Bunu Səhiyyə naziri Oqtay Şirəliyev oktyabrın 12-də Nazirlər Kabinetinin 2015-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasda çıxışı zaman deyib.
Nazir qeyd edib ki, son 10 ildə Azərbaycanda 586 səhiyyə müəssisəsi tikilib, əsaslı təmir olunub, müasir avadanlıqla təchiz edilib. Təkcə bu ilin 9 ayı ərzində 10-dan çox yeni tikilmiş və əsaslı təmir olunmuş tibb ocağı istifadəyə verilib. O cümlədən onların üçündə – Mingəçevir, Göyçay və Ucar mərkəzi xəstəxanalarının açılışında dövlətimizin başçısı şəxsən iştirak edib və öz xeyir-duasını verib.
Azərbaycanda İslam Bankçılığı özünü doğrultmadı
13.10.2015
Bank məlumat yaydı.
Azərbaycan Beynəlxalq Bankının (ABB) İslam bankçılığı departamenti ləğv edilib.
Ölkə.Az xəbər verir ki, bu barədə APA-ya bankdakı mənbə bildirib.
Bildirilir ki, departamentin fəaliyyəti ABB rəhbərliyinin qərarı ilə dayandırılıb.
“Departamentin direktoru Behnam Qurbanzadə və departamentin digər əməkdaşları işdən kənarlaşdırılıblar” - deyə mənbə qeyd edib.
İnformasiyanı bankdan təsdiqləyiblər.
Kredit almaq istəyən tələbələr üçün şad xəbər — yeni fond yaradılır
13.10.2015
Azərbaycanda ali məktəblərin kredit ala bilməsi üçün yeni fond yaradılır.
Trend-in məlumatına görə, Azərbaycanın təhsil naziri Mikayıl Cabbarov Nazirlər Kabinetinin Azərbaycan Prezidenti İlham Əliyevin iştirakı ilə keçirilən iclasında deyib ki, cari ilin sonunadək Təhsil Nazirliyinin təşəbbüsü və tabeliyində olan 11 ali təhsil müəssisəsinin iştirakı ilə dövlət büdcəsindən vəsait cəlb edilmədən Maarifçi Fondu yaradılacaqdır. Həmin Fond vasitəsilə tələbələrə uzunmüddətli təhsil kredit və qrantlarının verilməsinə başlanılacaqdır.
QMİ sədri: “Ölkədə azanın eyni vaxtda verilməsi milli-mənəvi birliyimiz üçün zəruridir”
13.10.2015
"Azərbaycanda 1437-ci hicri ilinin təqvimi ölkədəki şiə və sünni təriqətlərinin nümayəndələrinin birgə məsləhəti ilə yerli coğrafiyaya uyğun hazırlanıb"
Qafqaz Müsəlmanları İdarəsində (QMİ) Məhərrəm ayının başlanması ilə bağlı tədbir keçirilib.
APA-nın məlumatına görə, QMİ sədri Şeyxülislam Hacı Allahşükür Paşazadənin rəhbərliyi ilə keçən tədbirdə Dini Qurumlarla İş üzrə Dövlət Komitəsinin sədri Mübariz Qurbanlı və komitənin bölgələrdəki nümayəndələri, QMİ Qazılar Şurası və Elmi-Dini Şurasının üzvləri, İdarənin yerlərdəki səlahiyyətli nümayəndələri, Bakı İslam Universitetinin müəllim-tələbə heyəti, iştirak ediblər.
Oqtay Əsədov: "Bəzi investisiya layihələri təxirə salınıb"
13.10.2015
"Amma bu, önəmli investisiya layihələrinin icrasına təsir göstərməyəcək"
"Gələn ilin dövlət büdcəsinin azalması Dövlət Neft Fondundan transfertlərin azalmasının nəticəsidir".
APA-nın məlumatına görə, bunu Milli Məclisin bu gün keçirilən 2016-cı il üçün büdcə zərfinin müzakirəsi zamanı spiker Oqtay Əsədov bildirib.
O. Əsədov deyib ki, cari il büdcəyə Dövlət Neft Fondundan 10,4 mlrd. manat transfert edildiyi halda, gələn il bu rəqəmin 6 mlrd. manat təşkil edəcəyi proqnozlaşdırılır.
Spiker əlavə edib ki, bəzi əvvəl başlanılan investisiya layihələri müəyyən müddətə təxirə salınıb, amma bu, önəmli investisiya layihələrinin icrasına təsir göstərməyəcək.
Dövlət Xidməti: 9 ay ərzində 22,5 min nəfər işlə təmin olunub
13.10.2015
Əmək və Əhalinin Sosial Müdafiəsi Nazirliyi (ƏƏSMN) yanında Dövlət Məşğulluq Xidməti (DMX) ölkəmizdə daim artan məşğulluq imkanlarından səmərəli istifadə olunmaqla işsiz və işaxtaran vətəndaşların məşğulluğunun təmin olunması istiqamətində cari ilin yanvar-sentyabr aylarında da məqsədyönlü tədbirlər həyata keçirib.
Nazirliyin İctimaiyyətlə əlaqələr şöbəsindən verilən məlumata görə, hesabat dövründə DMX tərəfindən ümumilikdə 22 470 nəfər işsiz və işaxtaran vətəndaş münasib iş yerləri ilə təmin edilib. Bu dövrdə məşğulluq orqanlarında qeydiyyata alınmış və xüsusi peşə hazırlığı olmayan işaxtaran və işsiz vətəndaşlardan 1200 nəfərə yaxını idarə, müəssisə və təşkilatlarla bağlanmış müqavilələr əsasında haqqı ödənilən ictimai işlərə cəlb olunub. İşsiz və işaxtaran vətəndaşların əmək bazarına çıxışının asanlaşdırılması və məşğulluq imkanlarının artırılması üçün onların peşə bacarıqlarının inkişaf etdirilməsi diqqətdə saxlanılıb.
Nazir: 2019-cu ilə kimi Azərbaycan iqtisadiyyatı azalacaq
13.10.2015
“Pessimist variant kimi isə 40 dollar nəzərdə tutulur”.
2016-cı ilin dövlət büdcəsinin gəlirləri 14 milyard 566 milyon manat nəzərdə tutulub ki, bu da 2015-ci illə müqayisədə 4 milyard 872 milyon manat az vəsait deməkdir.
Bu sözləri Milli Məclisin 2016-cı ilin dövlət büdcəsi zərfinə həsr olunmuş plenar iclasında maliyyə naziri Samir Şərifov deyib.
Nazir, 2015-ci illə müqayisdə 2016-cı il dövlət büdcəsinin gəlirlərinin və xərclərinin azalmasının səbəblərini dünyada baş verən qlobal proseslər, həmçinin neftin qiymətinin kəskin şəkildə aşağı düşməsi ilə əlaqələndirib.
MTRŞ ANS-i 25 min manat cərimələdi
13.10.2015
Bu gün Milli Televiziya və Radio Şurasının (MTRŞ) növbəti iclası keçirilib.
MTRŞ-dan Ölkə.Az-a verilən məlumata görə, iclasda ATV və ANS televiziyası tərəfindən “Televiziya və radio yayımı haqqında” qanununun tələblərinin pozulması faktı üzrə inzibati icraata və inzibati xətalara dair işə baxılıb.
İclasda Azad Azərbaycan Teleradio Kompaniyası tərəfindən “Televiziya və radio yayımı haqqında” qanunun 32-ci maddəsinin və “Uşaqların və yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlar üçün xüsusi Qaydalar”ın 3.7-ci bəndin tələblərinin pozulması ilə bağlı “ATV” telekanalının efirində 10 oktyabr 2015-ci il tarixdə saat 11.31- 12.31 arasında yayımlanan “SOY” Prodakşn tərəfindən hazırlanan “Qayınanamız” teleserialında qeyri-etik məzmunlu ifadələrdən istifadə edilməsi ilə əlaqədar olaraq “Qayınanamız” serialının yayımının 14 oktyabr 2015-ci il tarixdən etibarən 1 (bir) ay müddətinə dayandırılması barədə qərar qəbul edilib.
İntizamsız sürücülər NİİM-in hədəfində
13.10.2015
NİİM avtobus, taksi və ya avtomobil sürücülərinin qayda pozuntularında qarşı mübarizəyə başalyıb.
Nəqliyyatın İntellektual İdarəetmə Mərkəzindən Ölkə.Az-a verilən məlumata görə. bununla bağlı mərkzəin saytında (www.niim.az) “ictimai qınaq” bölməsi artıq aktivdir.
“Hörmətli vətəndaşlar! www.niim.az saytında “ictimai qınaq” bölməsi artıq aktivdir. Qayda pozuntularında qarşı mübarizədə sizin də dəstəyiniz çox vacibdir.
Azərbaycanda ilk dəfə Beynəlxalq Çay Festivalı keçiriləcək
13.10.2015
Azərbaycanda ilk dəfə Beynəlxalq Çay Festivalı keçiriləcək.
Ölkə.Az Trend-ə istinadən xəbər verir ki, oktyabrın 20-də Azərbaycan Milli Kulinariya Mərkəzi və Azərbaycan Milli Kulinariya Assosiasiyası Beynəlxalq Kulinariya Günü ilə əlaqədar tədbir keçirəcək.
Tədbir çərçivəsində ilk dəfə olaraq “Beynəlxalq Çay Festivalı” keçiriləcək.
Festivalda Azərbaycanda fəaliyyət göstərən diplomatik nümayəndəliklər öz ölkələrinin ənənələrinə uyğun çay süfrəsi nümayiş etdirəcək. Tədbirdə Yaponiya, Cənubi Koreya, Çin, İran, Hindistan, Türkiyə və s. kimi ölkələrin çay mərasimləri göstəriləcək.
Baxımsız uşaqlar üçün sığınacaq yaradılır
14.10.2015
Azərbaycanda ilk dəfə olaraq, Əmək və Əhalinin Sosial Müdafiəsi Nazirliyi yanında baxımsız uşaqlar üçün sığınacaq müəssisəsi yaradılır.
Bunu Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva deyib.
O, hesab edir ki, bu müəssisə istifadəyə verildikdən sonra baxımsız uşaqlarla işləmək daha rahat olacaq, onların valideynlərini müəyyən məsuliyyətlərə cəlb etmək imkanları artacaq.
Azərbaycanda GMO bitkilər və yeyinti məhsulları məhv ediləcək
14.10.2015
Azərbaycanda genetik modifikasiya olunmuş bitkilər və genetik modifikasiya olunmuş bitkilərin genetik materiallarından istifadə edilərək istehsal olunan yeyinti məhsulları məhv ediləcək.
Nazirlər Kabinetindən Trend-ə verilən məlumata görə, bununla əlaqədar Azərbaycan Respublikası Nazirlər Kabinetinin 2005-ci il 12 fevral tarixli 27 nömrəli qərarı ilə təsdiq edilmiş “İstifadəyə yararsız yeyinti məhsullarının götürülməsi, zərərsizləşdirilməsi və ya məhv edilməsi Qaydaları”nda dəyişikliklər edilib.
Yeni dəyişikliklərə əsasən, İqtisadiyyat və Sənaye Nazirliyi, Səhiyyə Nazirliyi, Azərbaycan Respublikasının Kənd Təsərrüfatı Nazirliyi, Azərbaycan Respublikasının Ekologiya və Təbii Sərvətlər Nazirliyi, Azərbaycan Respublikasının Dövlət Gömrük Komitəsi və Azərbaycan Respublikasının Standartlaşdırma, Metrologiya və Patent üzrə Dövlət Komitəsi öz səlahiyyətlərini həyata keçirən zaman müvafiq müayinə və ekspertizanın nəticələrinə görə həm də genetik modifikasiya olunmuş bitkilərin, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarının və ya genetik modifikasiya olunmuş bitkilərin genetik materiallarından istifadə edilərək istehsal olunmuş yeyinti məhsullarının götürülməsi, zərərsizləşdirilməsi və ya məhv edilməsini müəyyən edir.
Bakıda avtobuslar və operativ nəqliyyat vasitələri üçün xüsusi zolaqlar ayrıldı
14.10.2015
Nazirlər Kabinetinin Yol Hərəkəti Təhlükəsizliyi Komissiyasının “Bakı şəhərində nəqliyyatın hərəkətinin təkmilləşdirilməsi üzrə əlavə tədbirlər haqqında” 23 iyul 2015-ci il tarixli qərarına əsasən Bakıda sərnişin daşımalarını yerinə yetirən avtobuslar və operativ nəqliyyat vasitələri üçün xüsusi zolaqların ayrılmasına başlanılıb.
APA-nın məlumatına görə, Daxili İşlər Nazirliyi və Bakı Şəhər İcra Hakimiyyəti paytaxtda müntəzəm sərnişin daşımalarını yerinə yetirən avtobusların və operativ nəqliyyat vasitələrinin xüsusi zolaqla hərəkətinin təmin edilməsi məqsədi ilə müvafiq avtomobil yollarının siyahısını müəyyənləşdirib, bu zolaqlarda göstərilən növ nəqliyyat vasitələrinin hərəkətinin təşkili ilə bağlı təklifləri Yol Hərəkəti Təhlükəsizliyi Komissiyasına təqdim edib.
Azərbaycanda gələn ilin yaşayış minimumu açıqlandı — 136 manat
14.10.2015
Azərbaycanda 2016-cı il üçün yaşayış minimumu 136 manat məbləğində proqnozlaşdırılıb.
Bu barədə məsələ Milli Məclisin plenar iclasında müzakirə edilən “Azərbaycan Respublikasında 2016-cı il üçün yaşayış minimumu haqqında” qanun layihəsində öz əksini tapıb.
Qeyd olunub ki, 2016-cı il dövlət büdcəsi zərfində ölkəmizdə 2016-cı il üçün yaşayış minimumunun 136 manat olacağı proqnozlaşdırılıb.
Məhərrəm ayı başladı
15.10.2015
Bu gündən Məhərrəm ayı başlayıb.
APA-nın məlumatına görə, Qafqaz Müsəlmanları İdarəsi Qazılar Şurasının Məhərrəm ayı ilə bağlı fətvasında bildirilir ki, Hicri-qəməri təqvimi ilə 1436-cı il başa çatır, yeni Hicri 1437-ci ilin başlanğıcı – Məhərrəm ayının 1-i Miladi təqvimlə 2015-cü il oktyabr ayının 15-nə təsadüf edir.
Məhərrəm ayının 10-u - Aşura günü 2015-ci il oktyabr ayının 24-nə təsadüf edir.
Azərbaycan əhalisinin sayı açıqlandı
15.10.2015
Azərbaycan əhalisinin sayı ilin əvvəlindən 73 min nəfər və ya 0,8% artaraq bu il sentyabr ayının 1-i vəziyyətinə 9 milyon 666 min nəfərə çatıb.
Ölkə.Az-ın Dövlət Statistika Komitəsinə istinadən verdiyi məlumata görə, əhalinin sıxlığı bir kvadrat kilometrə 112 nəfərdir.
Əhalinin 53,1 faizi şəhər, 46,9 faizi isə kənd sakinləridir.
Əhalinin 49,8 faizini kişilər, 50,2 faizini isə qadınlar təşkil edir. Hazırda orta hesabla hər 1000 kişiyə 1009 qadın düşür.
Azərbaycanda taksi xidməti ilə bağlı yeni qaydalar tətbiq olunur
15.10.2015
Azərbaycanda taksi minik avtomobilləri ilə bağlı xüsusi qaydalar tətbiq olunur, taksi sürücüləri üçün xüsusi hazırlıq mərkəzləri yaradılacaq və ayrıca lisenziya kartları tətbiq olunacaq.
Milli Məclisdən Ölkə.Az-a verilən məlumata görə, bununla bağlı Azərbaycan Prezidentinin təqdimatı ilə “Avtomobil nəqliyyatı haqqında” qanuna dəyişiklik və əlavələr təklif edilir.
Qanuna təklif olunan 14.2.8-1 maddəsinə görə, yük və sərnişin daşıma avtomobilləri üçün lisenziyanın verilməsi üçün tələb olunan şərtlər sırasına taksi minik avtomobilləri üçün şərt əlavə olunur və belə adlanır: “Taksi minik avtomobilləri ilə sərnişin daşınması üçün nəzərdə tutulmuş avtonəqliyyat vasitəsinin təchiz olunduğu taksometrin metroloji yoxlamadan keçməsini təsdiq edən, müvafiq icra hakimiyyəti orqanı tərəfindən akkreditasiya olunan qurumlar tərəfindən verilmiş yoxlama haqqında şəhadətnamə”.
Kamran Həsənlinin verilişi bağlandı
15.10.2015
ANS telekanalında ötən gün keçirilən yaradıcılıq iclası daha bir verilişin yayımının dayandırılması ilə nəticələnib.
Ölkə.Az publika.az-a istinadən xəbər verir ki, Kamran Həsənlinin “Axşam-axşam” verilişi efirdən yığışdırılıb. Əldə etdiyimiz məlumata görə, aparıcı ilə ANS telekanalı yollarını ayırmaq qərarına gəlib.
Xatırladaq ki, Kamran Həsənli son bir il ərzində 3 layihə dəyişib. Əvvəlcə “Günəbaxan”, daha sonra isə “Rövşanə ilə bazar səhəri” verilişində aparıcılıq edib. Yeni mövsümdən o, ANS telekanalında “Axşam-axşam” adlı veriliş aparırdı.
Azərbaycanda 60-dan çox üçəm doğuldu
15.10.2015
Bu ilin 8 ayında Azərbaycanda 63 üçəm doğulub.
Ölkə.Az xəbər verir ki, bu barədə Dövlət Statistika Komitəsininin (DSK) məlumatında deyilib.
DSK-dan bildirilib ki, cari ilin 8 ayı ərzində ölkədə 109 min körpə doğulub və əhalinin hər 1000 nəfərinə hesabı ilə bu göstərici 17,2 təşkil edib. Doğulan körpələrin 53,2%-ni oğlan, 46,8%-ni qız uşaqları təşkil edir. Doğulan körpələrdən 1970-i əkiz, 63-ü isə üçəmdir.
Avtomobili qanunsuz idarə edənlərə qarşı cəzalar sərtləşdirilir
15.10.2015
Nəqliyyat vasitələrinin idarəetmə hüququ olmayan şəxslər tərəfindən idarə edilməsi qaydalarının pozulmasına görə cəzalar sərtləşdirilir.
Milli Məclisdən Ölkə.Az-a verilən məlumata görə, bu məsələ parlamentin oktyabrın 20-də keçiriləcək iclasının gündəliyinə daxil edilən İnzibati Xətalar Məcəlləsinin 152-ci maddəsinə təklif edilən əlavələrdə öz əksini tapıb.
Əlavələrə görə, ümumi istifadədə olan nəqliyyat vasitələrini idarə etmək hüququ olmadan belə nəqliyyat vasitəsinin sərnişin daşımaqla idarə edilməsinə görə 15 gündən bir ayadək müddətə inzibati həbs tətbiq olunacaq. Digər əlavəyə əsasən, nəzərdə tutulmuş xətanın il ərzində inzibati tənbeh almış şəxs tərəfindən təkrar törədilməsinə görə bir aydan iki ayadək müddətə inzibati həbs tətbiq olunacaq.
Qanunsuz ov edən ərəb saxlanıldı
15.10.2015
Oktyabrın 14-də Ağgöl Milli Parkının ərazisində ov etmək istəyən Suriya vətəndaşı İmad Alabarsan Hlayıl və Azərbaycan vətəndaşı Ramil Ağayev Milli Parkın mühafizə işçiləri tərəfindən saxlanılıb.
Ekologiya və Təbii Sərvətlər Nazirliyinin mətbuat xidmətindən Ölkə.Az-a verilən xəbərə görə, qanun pozucularının 10-PE-901 dövlət nömrə nişanlı, “Niva” markalı avtomobilinə keçirilən baxış zamanı oradan 1 ədəd binokl, quş saxlamaq üçün səbət və ov vasitələri müəyyən olunaraq götürülüb.
Faktla bağlı qanunvericiliyin tələblərinə uyğun akt və protokol tərtib edilərək qanunsuz ov alətləri müsadirə olunub.
Azərbaycan Türkiyədən 40 yüngül mühərrikli təyyarə alacaq
16.10.2015
“İlk sifarişlər artıq alınıb”.
Azərbaycan Türkiyə istehsalı olan səkkiz yerlik 40 təyyarə sifariş edib, bu barədə Bolu bələdiyyəsinin rəhbəri Ələddin Yılmaz bildirib.
Ölkə.Az bu barədə Oxu.Az-a istinadən xəbər verir.
Ələddin Yılmaz jurnalistlərə tezliklə Bolu vilayətində təyyarələrin istehsal ediləcəyi müəssisənin inşaatına başlanılacağını bəyan edib.
“Yerli müəssisədə istehsal ediləcək təyyarələrin ilk sifarişi alınıb. 40 təyyarədən ibarət ilkin partiyanı Azərbaycan sifariş edib”, - bələdiyyə rəhbəri bildirib.
Sıxlığın qarşısını almaq üçün daha bir yenilik
16.10.2015
Bakı yollarındakı avtomobillərin sıxlığı ilə bağlı aylıq statistika açıqlanacaq.
Ölkə.Az xəbər verir ki, bunu Trend-ə açıqlamasında Nəqliyyatı İntellektual İdarəetmə Mərkəzinin İctimaiyyətlə əlaqələr şöbəsinin rəhbəri Şəfa Mehmanqızı deyib.
Ş.Mehmanqızı bildirib ki, hazırda statistika hazırlanır və yaxın günlərdə ictimaiyyətə təqdim olunacaq: “Statistikanı açıqlamaqda məqsəd insanları hansı yollarda daha çox sıxlığın olması barədə məlumatlandırmaqdır. İstəyirik ki, əhali ay və ya gün ərzində, günün istənilən zamanında yollarda nə qədər avtomobilin keçdiyini bilsin. Düşünürük ki, ictimaiyyət hansı yolda avtomobil yükünün daha çox olduğunu biləcəyi təqdirdə, alternativ yollardan da istifadə edə bilər. Nəticədə, sıxlıq olan yolların avtomobil yükü az da olsa, azalmış olar”.
Nəqliyyatı İntellektual İdarəetmə Mərkəzinin rəsmisi bildirib ki, paytaxt yollarındakı tıxacların aradan qaldırılması üçün qurum müxtəlif tədbirlər həyata keçirsə də, sıxlığı tam aradan qaldırmaq mümkün deyil: “Sıxlıqdan şikayət edənlər bilməlidirlər ki, ildən-ilə paytaxtda avtomobillərin sayı artır. Bu səbəbdən tıxacların qarşısını qısa zamanda almaq çətindir”.
Müəllimlərin diaqnostik qiymətləndirilməsi qaydaları təsdiqləndi
16.10.2015
Azərbaycanda “Ümumi təhsil müəssisələrində işləyən müəllimlərin bilik və bacarıqlarının diaqnostik qiymətləndirilməsinin aparılması qaydaları” təsdiqlənib.
Təhsil Nazirliyindən (TN) verilən məlumata görə, diaqnostik qiymətləndirilmənin məqsədi müəllimlərin bilik və bacarıq səviyyəsinin test üsulu ilə müəyyənləşdirib üzə çıxarılmasıdır.
Diaqnostik qiymətləndirilmə TN tərəfindən mərkəzləşdirilmiş qaydada proqram təminatı tətbiq olunmaqla test üsulu ilə həyata keçirilir. Diaqnostik qiymətləndirilmə ümumi təhsil müəssisələrinin tədris planlarında nəzərdə tutulan fənlər üzrə təşkil edilir.
Bakıda avtobus çatışmazlığı olmayacaq
16.10.2015
Bakıda avtobus çatışmazlığını aradan qaldırmaq üçün islahatlara başlanılıb.
Ölkə.Az xəbər verir ki, bunu Trend-ə açıqlamasında Nəqliyyatı İntellektual İdarəetmə Mərkəzinin İctimaiyyətlə əlaqələr şöbəsinin rəhbəri Şəfa Mehmanqızı deyib.
Ş.Mehmanqızı bildirib ki, problemin aradan qaldırılması üçün yeni avtobuslar alınacaq. Qurum rəsmisi hesab edir ki, yaxın zamanlarda Bakıda avtobus çatışmazlığı aradan qaldırılacaq: "Bu məsələ ilə bağlı çox ciddi işlər aparılır. Yaxın müddətdə həm şəhər ətrafında, həm də şəhərin mərkəzində avtobus çatışmazlığı ilə bağlı sərnişinlərin narazılığına son qoyulacaq".
Azərbaycan ixrac xərclərini azaldacaq
16.10.2015
Azərbaycan Respublikasının Prezidenti cənab İlham Əliyevin qeyri-neft məhsullarının ixracının artırılmasına dair verdiyi tapşırığın icrası olaraq, İqtisadiyyat və Sənaye Nazirliyi dünən keçirilmiş geniş kollegiya iclasında ixracın stimullaşdırılması üçün təkliflər paketinin hazırlanması barədə qərar qəbul edib.
Nazirliyin mətbuat xidmətindən Trend-ə verilən məlumata görə, eyni zamanda, iclasda nazirlik ixrac xərclərinin azaldılması məqsədilə qeyri-neft məhsullarına mənşə sertifikatının verilməsi üçün ekspertiza xidmətlərinə görə tariflərin 30%-dək azaldılması barədə Tarif (qiymət) Şurasına müraciət etməyi qərara alıb.
Azərbaycanda vergi cərimələri artırılır
16.10.2015
“İndiki kimi 800 manat deyil, 4000 manatadək cərimə olunması təklif edilir”.
Yeni dəyişiklik büdcə təşkilatlarında işləyən 500 mindən çox insanı əhatə edəcək. Ticarət və ictimai iaşə fəaliyyəti ilə məşğul olan şəxslərin vergi hüquqpozmalarına görə maliyyə sanksiyalarının artırılması təklif olunur.
Oxu.Az xəbər verir ki, bunu Vergi Məcəlləsinə dəyişikliklərlə bağlı qanun layihəsinin müzakirəsi zamanı vergilər naziri Fazil Məmmədov bildirib.
Nazirin sözlərinə görə, dəyişikliyə əsasən, təqvim ili ərzində hüquqpozulmasına birinci dəfə yol verildikdə 400 manat məbləğində maliyyə sanskiyası tətbiq olunurdusa, dəyişikliyə əsasən bu məbləğ 2000 manat olacaq.
Aksiz markasız malların nağd alqı-satqısı cinayət məsuliyyəti yaradacaq
17.10.2015
Azərbaycanda aksiz markalanmalı olan malların belə marka olmadan nağd qaydada alqı-satqısı cinayət məsuliyyəti yaradacaq.
Milli Məclisdən verilən məlumata görə, bununla bağlı Cinayət Məcəlləsinin 2013-1.-ci maddəsinə əlavələr təklif edilir.
Əlavəyə görə, aksiz markası ilə markalanmalı olan məhsulları (malları) belə marka olmadan “xeyli miqdarda satma, satış məqsədi ilə saxlama, istehsal binasının hüdudlarından kənara çıxarma və ya idxal etmə” sırasına “belə məhsulların nağd qaydada alqı-satqısı” məsuliyyəti də əlavə edilir. Xatırladaq ki, bu maddəyə uyğun olaraq əmlakı müsadirə olunmaqla min manatdan üç min manatadək miqdarda cərimə və ya bir ilədək müddətə islah işləri və ya iki ilədək müddətə azadlıqdan məhrumetmə cəzasl müəyyən olunur.
Layihə Milli Məclisin oktyabrın 20-də keçiriləcək iclasında müzakirəyə çıxarılacaq.
Azərbaycanda 20 mindən çox əcnəbi qanunvericiliyi pozdu
17.10.2015
Bu gün Dövlət Miqrasiya Xidmətində 2015-ci ilin 9 ayının yekunlarına həsr olunmuş xidməti müşavirə keçirilib.
Xidmət rəisi əcnəbilərin və vətəndaşlığı olmayan şəxslərin rahatlıqlarının təmin edilməsi baxımından miqrasiya qanunvericiliyinin təkmilləşdirilməsi istiqamətində həyata keçirilmiş fəaliyyəti vurğulayıb.
Vətəndaşlıq məsələlərinin həllində iştirak edən Xidmətə, həmçinin vətəndaşlıq mənsubiyyətinin müəyyənləşdirilməsi ilə bağlı səlahiyyət verildiyi və bu istiqamətdə görülən işlər qeyd olunub. Bildirilib ki, ölkəmizdə vətəndaşsızlıq hallarının aradan qaldırılması üçün əsaslı fəaliyyət planı hazırlanıb.
Ölkə.Az
