Azərbaycanda həbs olunan qırğızıstanlı oliqarx Bişkekə BELƏ APARILDI - VİDEO

Xəbər verdiyimiz kimi, beynəlxalq axtarışa verilmiş Qırğızıstan gömrük xidmətinin sabiq rəis müavini Rayımbek Matraimov Azərbaycanda həbs edilib.

Rayımbek Matraimov Bakıdan Bişkekə ekstradisiya edilib.

Musavat.com xəbər verir ki, bu barədə "Kaktus.media" nəşri məlumat yayıb.

Matraimovun hökumət təyyarəsi ilə aparıldığı bildirilir. Onunla bərabər “Oşqaz” müəssisəsinin keçmiş direktor müavini Tilek Matraimov da ekstradisiya edilib.

Sosial şəbəkələrdə Matraimovun Bişkekə aparılmasının fotoları yayılıb. Fotolardan birində oliqarx təyyarənin göyərtəsində qandallı vəziyyətdədir. İkinci şəkil isə Bişkek hava limanında çəkilib.

Matraimov ekstradisiya edildikdən sonra dövlət kanalının əməkdaşları ondan şərh istəyiblər. Videoda xüsusi təyinatlı əsgərlərin suallara cavab verməsi üçün onun əllərindən tutaraq başını necə qaldırdığını görə bilərsiniz.

Martın 23-də Qırğızıstanın Milli Təhlükəsizlik Dövlət Komitəsi məlumat yayıb ki, Bişkekdə Qırğızıstan rəhbərliyinə sui-qəsd planlaşdıran transmilli mütəşəkkil cinayətkar qruplaşmanın beş üzvü saxlanılıb. Milli Təhlükəsizlik Dövlət Komitəsi Matraimovun saxlanılanlarla əlaqəsini müəyyən edib.

Komitənin mətbuat xidməti daha sonra axtarışda olan qırğız oliqarxın Bakıda olduğunu bildirib. 

Qeyd edək ki, 2024-cü il yanvarın sonunda Qırğızıstan gömrük xidmətinin sabiq rəis müavini Rayımbek Matraimov MTN tərəfindən axtarışa verilib və onun milyardlarla som dəyərində daşınmaz əmlakı dövlətə keçirilib.