Qusarda QAT-a yer verilmədi

İyulun 18-də QAT sədri Akif Nağı, sədr müavini İlqar Əli, qurumun Ali Məclisinin üzləri Paşa Dadaşov və Etibar Əbülqasımovun Quba-Qusar zonasına səfəri zamanı insident yaranıb.

Bu barədə “Musavat.com”-a QAT sədri Akif Nağı məlumat verib. Onun dediyinə görə, səfərdə məqsəd Qusar və Qubada QAT-ın yerli şöbəsi, əlilərlə, şəhid ailələri ilə görüş keçirmək, onların problemlərinin həlli istiqamətində müvafiq qurumlar qarşısında məsələ qaldırmaq olub. “Biz Qusara çatanda QAT-ın yerli təşkilatının sədri Səmaya Bədəlova bizə məlumat verdi ki, yerli rəhbərlik görüş üçün yer verməyib. Bu səbəbdən biz Qarabağ döyüşçüsü olmuş bu fədakar xanımın evində yığışmaq istədik, lakin oranı da polislər mühasirəyə aldı.

Bundan sonra Qusar və Quba rayonları arasındakı Digah kəndində toplaşdıq ki, görüşümüzü keçirək. Lakin 40 dəqiqə ərzində iclasımızı keçirməkdəydik ki, rəis müavininin rəhbərlik etdiyi Quba polisi kəndə gəldi. Onlar çox aqressiv şəkildə “dərhal rayonu tərk edin, görüş üçün icazəniz olmalıdır” deyə, bizim qarşımızda tələb qoydular və tədbiri pozdular. Biz bundan sonra qarşıdurmadan qaçmaq üçün Qusara gedib icra başçısı ilə görüşmək istədik”. 

A.Nağının sözlərinə görə, nə üçünsə bundan sonra onlara qarşı münasibət dəyişib: “İcra hakimiyyətinə getdik, başçı məzuniyyətdə olduğundan 1-ci müavin Şahid fərəcovla görüşdük, sözümüzü dedik. Müavin dedi ki, burda hər cür qruplaşmalar var, ona görə narahat oluruq.

Biz də görüşdə şəhid ailələri və əlilərin problemlərini qaldırdıq, onların həllini istədik. Söz verdilər ki, bu problemləri aradan qaldıracaqlar. Biz də məsələlər həllini tapmayacağı halda ölkə rəhbərliyi qarşısında məsələ qaldırılacağı barədə xəbərdarlıq etdik”.

Olke.az