Politoloq: \"Yayılan xəbərlər MTN-nin imicinə xələl gətirməməlidir\"

MTN şefinin işdən azad edilməsi ictimaiyyət arasında çoxlu söz-söhbətlərə səbəb olub.

Mediada MTN haqqında dayanmadan müxtəlif məlumatlar yayılmağa başlayıb. Yayılan məlumatların bir çoxu dövlətin əsas güc strukturunun imicinə çox ciddi zərər verir.

Bəzi mənbələrin yazdığı məlumatlar qurumu gözdən salmağa hesablanıb.

MTN haqqında gəzən söz-söhbətləri politoloq Qabil Hüseynli Ölkə.Az-a şərh edib:

"MTN haqqında hər şey yazmaq olmaz. Çünki bu qurum dövlətin bel sütunudur. MTN-nin gözdən salınması ilə dövlətin özünün imicinə ciddi zərər dəyir. Düzdür, əhalinin məlumatlandırılması da vacibdir. Ancaq bu məlumatlandırmada təxəyyülün gücündən istifadə edib versiyalar irəli sürmək olmaz. Bu dövlətçiliyin xeyrinə ola bilməz. Dövlət və hakimiyyət əhalini məlumatlandırmalıdır. Hələ ki, rəsmi məlumat yayılmayıb. Bu səbəbdən də şayələr, versiyalar medianı zəbt edib. MTN-də aparılan əməliyyatlar, nazirin işdən çıxarılması, 12 nəfərin həbs edilməsi və yeni həbslərlə bağlı anonsların verilməsi onu göstərir ki, MTN-də işlər heç də biz istədiyimiz kimi yerində deyilmiş. Orada korrupsiyaya bulaşmış, kəşfiyyatçı adına uyğun olmayan, zabit şərəfini qorumayan təsadüfi adamlar var idi.

Uzun müddət idi ki, MTN işçiləri bir tərəfdən həm anti-terror əməliyyatları aparırdılar, digər tərəfdən də başları sərvət toplamağa qarışmışdı. Başı sərvət toplamağa qarışmış insanların peşəkarcasına xüsusi xidmət orqanlarının vəzifələrini yerinə yetirməsi çox çətin idi. Avroviziya yarışları zamanı Hizbullah terrorçularının ölkəyə sızması və onların zərərsizləşdirilməsi bilavasitə İsrail xüsusi xidmət orqanlarının məlumatları əsasında həyata keçirilmişdi. Bu onu göstərir ki, MTN-nin peşakarlıq səviyyəsi əvvəlki illərə nisbətən müəyyən qədər aşağı düşüb. Sabiq MTN şefinin özü ilə birlikdə daxili işlər sistemindən gətirdiyi və yaxud qohumluq bağı ilə MTN-ə cəlb etdiyi, ancaq kifayət qədər peşakarlıq qabiliyyəti olmayan adamlar nazirliyin imicinə zədə vurmuşdur.

Xüsusi xidmət orqanları dövlətin sağ əlidir. Dövlət məhz bu xüsusi xidmət orqanının verdiyi informasiyalarla öz işini qurur. Bu xüsusi xidmət orqanı dövlətin işində əsas söz sahibidir. Son dövrün hadisələri onu göstərdi ki, MTN-ə böyük etimad göstərilib, ancaq bundan sui-istifadə halları praktikada özünü göstərdi. Dünyada bir neçə sayılıb seçilən xüsusi xidmət orqanı var ki, onların adı dillər əzbəridir. Mossad, M-6, SAİ, FZB, MİT dünyada məşhur olan xüsusi xidmət orqanlarıdır. Azərbaycan kiçik dövlətdir, müharibə vəziyyətindəyik. Bu nöqteyi-nəzərdən də bizdə kəşfiyyat, əks-kəşfiyyat, ölkə daxilində dövlətçiliyin qorunması məsələsi, dövlət üçün lazım olan məxfi informasiyaların toplanması, dünyanın müxtəlif ölkələrində, xüsusilə düşmən ölkədə agentura şəbəkəsinin yaradılması və həmin ölkədən məlumatlar əldə edilməsi çox vacibdir. MTN güclü olacağı təqdirdə dövlətin inkişafı da sürətlənəcək. Bu məsələdə əsas işi kadrlar görəcək".

Qeyd edək ki, vəzifəsindən azad edilmiş Eldar Mahmudov 2004-cü ildən MTN-ə rəhbərlik edirdi.

Səxavət Məmməd
Ölkə.Az