Mədət Quliyev: əməliyyat müvəkkilliyindən MTN-ə gedən yol

Son illər daxili işlər orqanlarında ictimaiyyətə adı ən tanış olan bu şəxsin karyerası bu gün cəmiyyəti ən çox maraqlandıran məsələlərdən biridir.

Ölkə.az həyatını hüquq-mühafizə orqanlarında xidmətdə keçirmiş general Mədət Quliyev haqqında oxuculara geniş məlumat verir.

Mədət Quliyev — Azərbaycanın Milli Qəhrəmanı, Azərbaycan Respublikası Ədliyyə Nazirinin müavini, Penitensiar Xidmətin rəisi, ədliyyə general-leytenantı.

General Mədət Qəzənfər oğlu Quliyev 27 sentyabr 1958-ci ildə Azərbaycan Respublikasının Gəncə şəhərində doğulub. Orta təhsilini Gəncədə başa vuran Quliyev 1980-ci ildə Azərbaycan Dövlət Bədən Tərbiyyəsi İnstitutunu, 1997-ci ildə DİN-in Polis Akademiyasını bitirib. 1980-1982-ci illərdə SSRİ Silahlı Qüvvələrin sıralarında həqiqi hərbi xidmət keçib. 1983-cü ildən isə Azərbaycan daxili işlər orqanlarında müxtəlif vəzifələrdə xidmət edib.

Əsasən cinayət-axtarış və mütəşəkkil cinayətkarlıqla mübarizə strukturlarında xidmət aparıb. 1992-1994-cü illərdə DİN-nin Terrorizim və Banditizmlə mübarizə şöbəsinin rəisi, 1994-1995-ci illərdə DİN-in Mütəşəkkil Cinayətkarlıqla Mübarizə İdarəsinin Yevlax-Qazax Regional Şöbəsinin rəisi, 1995-1996-cı illərdə DİN-nin Mütəşəkkil Cinaytəkarlıqla Mübarizə İdarəsinin reketlə mübarizə şöbəsinin rəisi, 1996-2001-ci illərdə Azərbaycan Respublikası DİN-in Mütəşəkkil Cinaytəkarlıqla Mübarizə İdarəsinin rəis müavini, 2001-2002-ci illərdə həmin İdarənin rəisi, 2002-2004-cü illərdə DİN-nin Narkotiklərlə Mübarizə Baş İdarəsinin rəisi, 2004-2006-cı illərdə Azərbaycan Respublikasında İnterpolun Milli Mərkəzi Bürosunun rəisi, 2006-2011-ci illərdə DİN-in Baş Mühafizə İdarəsinin rəisi vəzifələrində çalışıb. Demək olar ki, bütün ömrünü polis sistemində xidmətə həsr etmiş Mədət Quliyev Qarabağ müharibəsi illərində dəfələrlə polis batalyonlarının başında cəbhənin müxtəlif istiqamətlərində düşmənlə mübarizə aparıb. Döyüş keçmiş Mədət Quliyev cəbhədə göstərdiyi şücaətlərə görə Azərbaycanın Milli Qəhrəmanı adına layiq görülüb.

Azərbaycan Respublikası Prezidentinin 30.06.2005-ci il tarixli 866 nömrəli Sərəncamı ilə isə ona polis general-mayoru rütbəsi verilib. Azərbaycan Respublikasının Konstitutsiya dövlət quruluşunun müdafiəsində cinayətkarlıqla amansız mübarizədə, dövlətlərarası axtarışda olan residivist cinayətkarların saxlanılmasında və zərərsizləşdirilməsində şəxsən iştirakına, transmilli cinayətkarlığa qarşı mübarizədə xüsusi xidmətlərinə görə müxtəlif mükafatlara layiq görülüb.

Azərbaycan Respublikası Prezidentinin 14.02.2011-ci il tarixli Sərəncamı ilə Ədliyyə Nazirinin müavini, Penitensiar xidmətin rəisi vəzifəsinə təyin edilib.

Azərbaycan Respublikası Prezidentinin 20.11.2012-ci il tarixli Sərəncamı ilə ona ədliyyə general-leytenantı ali xüsusi rütbəsi verilib.

Prezidentin bu gün, 20.10.2015-ci ildə verdiyi sərəncamla isə daxili xidmət general-leytenantı Mədət Quliyev milli təhlükəsizlik nazirinin müavini təyin edilib.

MTN ətrafında baş verən proseslər, ölkənin elitar xüsusi xidmət orqanının rəhbərliyinin korrupsiya qalmaqalı ilə vəzifədən uzaqlaşdırılması və prezidentin heç kəsin gözləmədiyi halda general-leytenant Mədət Quliyevi Milli Təhlükəsizlik Nazirliyinə müvəqqəti rəhbər göndərməsi gündəmin ən qızğın müzakirə olunan məsələsidir. Mədət Quliyevin milli təhlükəsizlik nazirinin birinci müavini təyin edilməsi onu tanıyan böyük əksəriyyət tərəfindən müsbət qarşılandı. Çalışdığı və rəhbərlik etdiyi bütün sahələrdə xüsusi nizam-intizamı ilə seçilən generalın ən kritik sahə, penitensiar sistemə rəhbər təyin edilməsi qısa bir müddət ərzində bu sahəni Avropa standartları səviyyəsinə qaldırdı. Müxtəlif Qərb institutlarının ölkəmiz haqqında yaydığı yalan, böhtan xarakterli materiallar, Azərbaycan həbsxanalarındakı özbaşınalıq haqqında uydurduqları xəbərlər qısa müddət ərzində ifşa olundu. Beynəlxalq ekspertlərin dəfələrlə təftiş və müşahidə üçün ziyarət etdikləri Azərbaycandakı təcridxana, islah-əmək müəssisələri, cəzaçəkmə müəssislərindəki real vəziyyət daha sonra bu beynəlxalq təşkilatları fakt qarşısında qoydu. Artıq illərdir ki, Azərbaycandakı cəzaçəkmə müəssisləri məhbuslar üçün yaradılmış yüksək həyat standartlarına görə postsovet məkanının ölkələrinə nümunə kimi göstərilir.

Ölkə.az