Azərbaycan bazarında "Cola" müharibəsi
"Pepsi" "Coca-Cola"nı Azərbaycan bazarından çıxarır
Ölkənin iqtsadi gücünün artması ilə bərabər, yerli şirkətlər arasında gedən bazar müharibəsi də qızışmaqdadır.
Emal sənayesinin inkişafı, istehsal edilən mal həcminin artması, müstəqil biznesmenlərə və əlində ciddi inzibati rıçaqlar olan bəzi nazirlər və yüksək vəzifəli dövlət məmurlarına məxsus istehsal müəssisələri arasındakı rəqabəti ciddi şəkildə artırıb.
Təxminən eyni vaxta Azərbaycan bazarına qədəm qoyan "Pepsi" və "Coca-Cola" şirkətləri aradan keçən müddət ərzində öz sərmayələrini artıraraq bazarda tək qalmaq uğurunda mübarizəyə girşiblər.
Adı çəkilən hər iki alkoqlsuz içki istehsalçısının daxili bazardakı illik dövriyyəsi haqqında əldə etdiyimiz dəqiq məlumatlardan sonra, bu bazar uğurunda gedən müharibənin əsas səbəbi aydın oldu. İllik dövriyyəsi 200 milyon manat olan "Coca-Cola" Azərbaycanda ən çox qazanan şirkərlərdən biri hesab olunur. ƏDV və şirkətin digər xərclərini çıxdıqda adı çəkilən məbləğin 70%-dən çoxunun təmiz olduğunu görərik. "Pepsi"nin Azərbaycan bazarındakı illik dövriyyəsi isə 30 milyon manat təşkil edir.
Xatırladırıq ki, "Coca-Cola" Azərbaycan bazarına sırf ABŞ şirkəti kimi daxil olub və fəaliyyəti də dünyanın bütün ölkələrindəki kimi qurulub. "Pepsi"nin istehsal lisenziyası isə Azərbaycanın ərzaq bazarında çox böyük paya sahib olan "Gilan Holdinq"ə məxsus "Benkons MMC"yə aiddir. Əvvəlki yazılarımızda "Benkons MMC" haqqında oxucularımıza məlumat vermişdik. Ölkəyə idxal olunan əksər ərzaq mallarının gətirilməsi və satışı monopoliyasına malik olan "Benkons MMC" Azərbaycanın daxili ərzaq məhsulları bazarında xüsusi çəkisi olan firmalardan birincisidir.
İllərdir "Coca-Cola"nı alkolqolsuz içki bazarından sağlam rəqabətlə sıxışdırmağın mümkün olmadığını görən "Gilan qrupu" artıq taktikasını dəyişərək satış onu bazarından çıxarmağa başlayıb.
Əldə etdiyimiz məlumatlarda bir çox supermarket şəbəkələrindən ("Neptun" və "Rahat market") artıq "Coca-Cola"nın soyuducularının götürüldüyü bildirilir. Bu satış firmaları heç bir ciddi səbəb gətirmədən "Coca-Cola" ilə ticarət əmədaşlıqlarını dayandırdıqlarını bəyan edərək ondan mal almaqdan imtina ediblər.
Apardığımız araşdırmaların nəticəsində əldə etdiyimiz informasya isə daxili bazardakı rəqabətin artıq tamamilə başqa müstəviyə keçdiyini göstərir.
Əldə etdiyimiz məlumata görə, "Neptun" və "Rahat"supermarket şəbəkələri çox ciddi təzyiqlər nəticəsidə "Coca-cola"dan imtina ediblər. Bu şəbəkələrlə sıx əlaqəsi olan mötəbər məbənin verdiyi məlumata görə, "Coca-Cola"dan imtina etməyən ticarət markaları ölkəyə mal gətirərkən gömrük orqanlarında "ağır rüsumlarla" üzləşirlər (bu supermarket şəbəkələri satdıqları malların bir hssəsini xarici ölkələrdən tədarük etdiklərinə görə gömrüklə işləmək məcburiyyətindədir). Mənbə bildirir ki, "Coca-Cola" ilə əməkdaşlığın dayandırılması şəbəkə rəhbərləri qarşısında şərt kimi qoyulub və şərtə əməl etməyənlərin ölkəyə gətirdikləri mallar müxtəlif bəhanələrlə gömrük məntəqələrində yubadılır və onlara "xüsusi ağır rüsumlar" tətbiq olunur (bu "rüsum növü" müxtəlif firmaları və fərdi qaydada biznes fəaliyyəti ilə məşğul olan iş adamlarını "ram etmək" üçün nəzərdə tutulmuş reket metodudur. Həmçinin ölkəyə inhisar altında olan mal çeşidini idxal edən firma və fərdi iş adamlarına qarşı da bu "rüsum növü" tətbiq olunur).
Məlumatdan göründüyü kimi "Gilan Holdinq" və arxasında dayanan oliqarx qruplaşması "Coca-Cola"nı da Azərbaycan bazarından çıxarmaqda qərarlıdır. İqtisadiyyat üzərində inhisarı məhz bu metodlarla həyata keçirmiş "Gilan qrupu"nun bu dəfəki hədəfi bütövlükdə Azərbaycanı inhisar almaqdır.
Adı çəkilən şirkət və qurumların mövqeyini dərc etməyə hazırıq (Redaksiya)
Olke.az-ın Monitorinq şöbəsi
