QAT bəyanat yaydı

Bəyanatda deyilir ki, QAT-ın Goranboy rayon şöbəsinin sədr müavini Y.Namazoğluna qarşı polis əməkdaşları tərəfindən zor tətbiq olunması, ona qarşı haqsızlıq edilməsi qətiyyətlə pislənilir: “Ona qarşı bu haqsızlıqlardan sonra məhkəmənin qərarı ilə 200 manat cərimə olunması, üstəlik prokurorluqda cinayət işinin davam etdirilməsi yolverilməzdir. Yusif  Namazoğlu Qarabağ müharibəsində fəal iştirak edib, bu gün də Qarabağ Azadlıq Təşkilatının sıralarında Qarabağ uğrunda mübarizəsini davam etdirir. O, rayonda tanınan ictimaiyyətçi, ziyalı, fədakar bir insandı, həmişə əlinin zəhməti ilə yaşayıb. O, həmçinin gənclərin hərbi vətənpərvərlik tərbiyəsi işində çalışır, vətənpərvər gənclərin yetişdirilməsində xidmət göstərir. Belə bir insana qarşı hüquq-mühafizə  orqanları tərəfindən təzyiq və haqsızlıqların edilməsi ümumi işimizə zərbə vurur”. QAT bəyan edir ki, ona qarşı bu təzyiqlərin Goranboy və Xocalı rayon hüquq-mühafizə orqanları tərəfindən edilməsi heç cür başa düşülən deyil: “Bu rayonların hər ikisi birbaşa erməni təcavüzü ilə üz-üzə olub, qurbanlar verib, erməni dəhşətlərini öz üzərlərində hiss ediblər. Bu rayonların hüquq-mühafizə orqanlarında çalışanların əksəriyyəti Qarabağ müharibəsinin odu-alovundan keçib. Ona görə də onların digər Qarabağ döyüşçüsünə, Qarabağ Azadlıq Təşkilatının üzvünə qarşı haqsızlıq etməsi, təzyiq göstərməsi məntiqsizlikdən başqa bir şey deyildir. Biz bir daha Yusif Namazoğluna qarşı zor tətbiqini və haqsızlığı pisləyir və hesab edirik ki, Goranboy rayon məhkəməsi, Xocalı polis idarəsi və prokurorluğu işə ədalətlə yanaşmalı, Yusif Namazoğlunun millət və vətən qarşısında xidmətlərini nəzərə almalı, düzgün və obyektiv qərarlar çıxarmalıdırlar”.