"Rəhbərliyin yeridir, saxlamaq olmaz qaqa!"

Bu sözləri Bakıda avtomobil idarə edən bir çoxlarımız eşitmişik...

"Parkomat" aparatı quraşdırılmış və qanuni parklanmanın icazə verildiyi yerlərdə bəzən su qabı, təkər, stul, dəmir nişan və başqa bu kimi əşyaların qoyularaq dayanacaq üçün nəzərdə tutulmuş yerin "məşğul" edildiyini tez-tez görürük. Bəzən elə gün boyu bu əşyalar orada öz pullu müdirlərinin bahalı avtomobillərini gözləyirlər. Ya da onların yerini formalı "parkovşik"lər alır: "Qaqa zanitdir"...

Belə hadisələrdən biri ilə bu gün yenə rastlaşdım. Həmişə "lənət şeytana" deyib ötüşdürürdüm, ancaq bu gün artıq yazmaq qərarına gəldim...

Bu gün Xaqani küçəsində "Xalq Bank"ın qarşısı və Azərbaycan Bəstəkarlar İttifaqının yanında "parkomat"ların boy-boy düzüldüyü küçədə mən boş yerlər olduğu halda avtomobilimi saxlaya bilmədim. Əşyalar və dayanacağa nəzarət edən işçilər ağız-ağıza verib xorla dedilər ki, qardaş nə danışırsan, burada saxlamaq olmaz, rəhbərliyin yeridir, icazə vermirlər başqa maşın saxlamağa.

Nə illah etdimsə mümkün olmadı. Əsəblərimi öz maşınımın təkərinə təpik ilişdirməklə bir təhər cilovlayıb oradan ayrıldım... Ancaq nə edək ki, biz Bakıda yaşayırıq, Bakıda maşın sürürük, Bakıda maşınımızı park etmək məcburiyyətindəyik və deməli Bakıda hər gün əsəblərimiz korlanmalıdır!

Ancaq qanunun mənə icazə verdiyi səlahiyyəti, hələ-hələ maşın park etmə kimi adi bir şeyi başqaları bu şəkildə əlimdən alırsa daha deməyə söz tapa bilmirəm. Yəqin o "rəhbər kəslər" qanundan da alidirlər. Nə deyim...