Deputat: “Bir neçə yaxın dostum o araqlara görə həyatını itirib”

“Azərbaycan araq istehsalında bu qədər məşhurdursa, niyə ölkədən kənara çıxa bilmirik? Vaxtilə Azərbaycanın “Ağdam” şərabı var idi. Deyirdilər, “Ağdam” şərabı ilə Rusiyanı işğal edəcəyik”.

Ölkə.Az xəbər verir ki, bunu Milli Məclisin bu gün keçirilən iclasında deputat Sabir Rüstəmxanlı “Tütün və tütün məmulatı haqqında” və “Qida təhlükəsizliyi haqqında” qanunlarına təklif edilən dəyişikliyin müzakirəsində deyib.

Deputat bildirib ki, indi də Azərbaycanın yaxşı şərabları var: “Amma idxal yoxdur. Kənara çıxara bilmirik. Deməli, ya bunun keyfiyyəti aşağıdır, ya da iş düzgün qurulmayıb. Rayonlara gedəndə marketlərə baxırsan, qəşəng adlı araqları qoyublar, amma qiyməti 3 manat, 4 manat. Baxanda bilinir ki, saxtadır. Bəs buna lisenziyanı kim verib? Mənim bir neçə cavan dostum saxta araqdan rəhmətə getdi”.

O eyni zamanda əlavə edib ki, mətbuat köşkləri təyinatı üzrə istifadə olunmur.

Deputat bildirib ki, Bakının küçələrində qəzet köşklərində siqaret satılmasına hamı göz yumur: “Bu köşklərdə hər şey satılır: siqaret, saqqız. Halbuki bunlar qəzet, mətbuat köşkləridir. Təyinatı üzrə istifadə olunmursa, bu köşklər niyə var?”

Mürtəza
Ölkə.Az