Həftənin icmalı
MTN əməkdaşlarına qadağa qoyuldu
19.10.2015
Əməkdaşlara qoyulan bu qadağanın hələ də davam etdiyi bildirilir.
Milli təhlükəsizlik naziri Eldar Mahmudovun prezidentin sərəncamı ilə işdən azad edilməsindən sonra ölkənin ən nüfuzlu qurumlarından olan MTN-in adı ətrafında çoxsaylı informasiyalar yayılır.
Nazir və müavinləri də daxil olmaqla bir neçə generalın ev dustağı edilməsi, hətta həbs olunmaları barədə xəbərlər rəsmi təsdiqlənməsə də, artıq onların konkret hansı əməllər törətməsi barədə də KİV-də məlumatlar yer alıb.
Nazir ərəb şeyxlərinin Azərbaycanda ov etməklərindən danışdı
19.10.2015
Hesab edirəm ki, hansısa imkanlı adamlar Azərbaycana gəlib burda vəsait xərcləyirlərsə və bu vəsait insanların maliyyə dövriyyəsinə daxil olursa, biz buna sevinməliyik.
Bunu Mədəniyyət və turizm naziri Əbülfəs Qarayev jurnalistlərə yerli mətbuatda Azərbaycanda VİP turizm sahəsinin inkişafı və ərəb şeyxlərinin Aran zonasında ov etməsi üçün Azərbaycana gəlməsi ilə bağlı yazılan məlumatlara münasibət bildirərkən deyib.
Nazirin sözlərinə görə, Azərbaycanda tutizmin bütün növləri, o cümlədən ov turizmi də inkişaf etməlidir:
“Mən burada qanuna zidd hərəkət görmürəm. Bunun cəmiyyətimizə hər hansı mənfi təsirini də görmürəm. Çünki bunlar hamısı dövlət qanunları çərçivəsində olur, bu ova lisenziya, Ekologiya və Təbii Sərvətlər Nazirliyi tərəfidən lazımi icazələr verilir”.
Bakıdakı marşrut avtobuslarına nəzarət gücləndirilir
20.10.2015
Bakıda marşrut avtobuslarına yeni GPS trekerlər quraşdırılacaq
Nəqliyyatı İntellektual İdarəetmə Mərkəzindən (NİİM) Ölkə.Az-a verilən məlumata görə, GPS treker adlanan telematik blok nəqliyyat vasitəsinin olduğu ərazi, hərəkətin sürəti, yanacağın sərfiyyatı, avadanlığın vəziyyəti (mühərrik işə salınıb, qapı açıq qalıb və s.) barədə məlumatı real vaxt rejimində dispetçer mərkəzinə ötürür. Xüsusilə, sürücülük qabiliyyətinə nəzarət sistemi yolda baş vermiş pozuntular (kobud sürücülük, sürət həddinin aşması və s.) haqqında məlumatı toplayır və işçi heyətinin fəaliyyətinin qiymətləndirilməsi sisteminə göndərir. Həmin sistemin köməyi ilə dispetçer istənilən müddət ərzində və müxtəlif səfərlər üzrə sürücülük qabiliyyətinin dəqiq qiymətləndirilməsinə nəzarət edə bilər.
MTN-nin 7 zabiti həbs edildi — RƏSMİ
20.10.2015
Milli Təhlükəsizlik Nazirliyinin ayrı-ayrı vəzifəli şəxsləri tərəfindən vəzifə səlahiyyətlərindən sui-istifadə və yol verilmiş digər qanun pozuntuları faktları üzrə Baş Prokurorluqda Cinayət Məcəlləsinin müvafiq maddələri ilə cinayət işi başlanaraq istintaq-əməliyyat qrupu yaradılıb.
Baş Prokurorluğun mətbuat xidmətindən Ölkə.Az-a bildiriblər ki, həyata keçirilmiş istintaq-əməliyyat tədbirləri ilə nazirliyin bir qrup əməkdaşı tərəfindən xidməti vəzifələrinin icrası ilə əlaqədar qulluq səlahiyyətlərindən sui-istifadə etmə və əməliyyat-axtarış fəaliyyəti haqqında qanunvericiliyin tələblərini pozmaqla sahibkarlıq fəaliyyəti subyektlərinin fəaliyyətinə qanunsuz müdaxilələr edilməsi, ayrı-ayrı şəxslərin hüquq və qanunla qorunan mənafelərinin pozulmasına əsaslı şübhələr müəyyən edilib.
Eldar Mahmudovun müavininin evində axtarış
20.10.2015
Oktyabrın 17-də prezident sərəncamı ilə milli təhlükəsizlik naziri postundan azad olunan Eldar Mahmudovun 1-ci müavini, general-leytenant Hilal Əsədovun evlərində axtarış aparılıb
Ölkə.Az xəbər verir ki, bu barədə Musavat.com-a məlumatlı mənbə bilgi verib.
Bildirilir ki, adətən 2 mülki geyimli şəxsin müşayiət etdiyi H.Əsədov bu dəfə Bakının mərkəzindəki mənzilinə 10-a yaxın şəxslə gəlib. 28 May küçəsi, ev 18 ünvanında aparılan axtarışdan sonra H.Əsədov həmin şəxslərin əhatəsində naməlum istiqamətə aparılıb. Axtarış zamanı mənzildən sənədlər götürülüb. Yada salaq ki, oktyabrın 17-də Baş Prokurorluğun və Baş Dövlət Xüsusi Mühafizə İdarəsinin əməkdaşları MTN-də xüsusi əməliyyat keçirib. Həmin gün prezident İlham Əliyevin sərəncamı ilə Eldar Mahmudov milli təhlükəsizlik naziri vəzifəsindən uzaqlaşdırılıb. Xüsusi əməliyyat zamanı MTN-in əksər rəhbər şəxləri nəzarətə götürülüb, 12 rəhbər şəxs – Hilal Əsədov, Akif Çovdarov, İlqar Əliyev, Natəvan Mirvətova və digəriləri həbs olunublar.
MTN-in 10 zabiti məhkəmə qarşısında
20.10.2015
Baş Prokuror yanında Korrupsiya Qarşı Mübarizə İdarəsi tərəfindən Milli Təhlükəsizlik Nazirliyinin 10 əməkdaşı barəsində həbs qərarının çıxarılması ilə bağlı məhkəməyə təqdimat göndərilib.
Ölkə.Az teleqraf.com-a istinadən xəbər verir ki, həbs qərarının çıxarılması ilə bağlı təqdimat Nəsimi rayon Məhkəməsinə göndərilib. Hazırda həmin şəxslərin barəsində həbs qərarının çıxarılması üçün proses keçirilir.
Sayt yazır ki, artıq Vəkillər Kollegiyasına da 10 vəkilin təcili məhkəməyə çağırılması üçün çağırış göndərilib. Vəkillər Kollegiyasının 14-cü hüquq məsləhətxanasından 10 vəkil həmin təqdimatla bağlı keçirilən məhkəmə prosesinə göndəriliblər.
Nəqliyyat Nazirliyi mətbuatda yayılan əsassız xəbərləri təkzib etdi
20.10.2015
Azərbaycanın Nəqliyyat Nazirliyi bəzi KİV-lərdə əsasız yayılmış məlumatla bağlı açıqlama verib.
Nazirlikdən Ölkə.Az-a verilən məlumata görə, 19 oktyabr 2015-ci il tarixində bəzi KİV-lərdə və saytlarda nəqliyyat müfəttişlərinin hərəkətləri ilə bağlı video görüntü ilə müşayiət olunan xəbərin həmin tarixdə baş verməsi heç bir fakta əsaslanmır, arxiv kadrlardan istifadə edilərək əsassız xəbər yayılıb.
14 oktyabr 2015-ci ildə Azərbaycan Respublikası Prezidentinin müvafiq Fərmanından sonra dərhal bütün struktur bölmələrə telefonoqram göndərilərək, bütün nəzarət funksiyalarının dayandırılması tapşırılıb:
Nazirliyin müvafiq əmri ilə Dövlət Avtomobil Nəqliyyatı Xidmətitərəfindən bu məsələyə ciddi şəkildə nəzarət edilir.
Depressiya əleyhinə bəzi dərmanlar intihara meyilliliyi artırır
21.10.2015
Depressiya əleyhinə istifadə edilən bəzi dərmanlar insanlarda intihara meyilliliyi artırır. Ona görə də depressiya əleyhinə dərmanlardan istifadə edərkən çox ehtiyatlı olmaq lazımdır.
Bunu Azərbaycan Səhiyyə Nazirliyi Psixi Sağlamlıq Mərkəzinin rəhbəri, Azərbaycan Tibb Universitetinin Psixiatriya kafedrasının professoru, tibb elmləri doktoru Fuad İsmayılov deyib.
Hazırda bütün dünyada olduğu kimi, Azərbaycanda da əhalinin 10-15 faizinin depressiyadan əziyyət çəkdiyini deyən F.İsmayılov qeyd edib ki, depressiyaya düşən xəstələrin 20 faizində intihara meyillilik var.
Hacı Məmmədovun dəstəsinin daha bir üzvünə hökm oxundu
21.10.2015
Bakı Apellyasiya Məhkəməsində adam oğurluğu, sifarişli qətllər və digər xüsusilə ağır cinayətlərdə ittiham olunaraq ömürlük azadlıqdan məhrum edilən Daxili İşlər Nazirliyi Baş Cinayətkarlıqla Mübarizə İdarəsinin sabiq baş əməliyyat müvəkkili Hacı Məmmədovun dəstəsinin üzvü olmuş Ədalət Əsədullayevin apellyasiya şikayətinə baxılıb.
APA-nın məlumatına görə, məhkəmə şikayəti təmin etməyib.
Ə. Əsədullayev cəzadan şərti olaraq vaxtından əvvəl azad edilməsi barədə ərizə ilə Xəzər rayon Məhkəməsinə müraciət edib. Lakin iddia təmin olunmayıb.
Qeyd edək ki, Ağır Cinayətlərə Dair İşlər üzrə Məhkəmənin 17 yanvar 2007-ci il tarixli hökmü ilə Ədalət Əsədullayev 12 il müddətinə azadlıqdan məhrum edilib.
Azərbaycanın ikinci peykini Kanada şirkəti inşa edəcək
21.10.2015
Kanadanın SSL şirkəti Azərbaycanın ikinci telekommunikasiya peykini inşa edəcək. Bu barədə "Azərkosmos" ASC-nin məlumatında bildirilir.
Məlumatda qeyd olunur ki, SSL Azerspace-2 layihəsinin peyk sisteminin təchizatçısı seçildi.
Qərargahı Kaliforniyanın Palo Alto şəhərində yerləşən və Kanadanın MDA korporasiyasına məxsus, kommersiya peyklərinin aparıcı təchizatçısı olan “Space Systems/Loral” (SSL) şirkəti “Azərkosmos” ASC tərəfindən Azərbaycanın sayca üçüncü, təyinatına görə isə ikinci telekommunikasiya peykinin istehsalçısı seçilib. Dünyanın peyk xidmətləri üzrə aparıcı şirkəti olan İntelsat ilə “Azərkosmos” ASC-nin uzunmüddətli razılaşmasına əsasən, 45° şərq uzunluğu orbital mövqeyində yerləşəcək Azerspace-2 Afrika, Avropa, Asiya və Yaxın Şərq regionlarını əhatə edəcək.
Ölkə.az Mətbuat Şurasına üzv oldu
21.10.2015
Bu gün Azərbaycan Mətbuat Şurasının iclasında Ölkə.az informasiya portalı quruma üzv qəbul olunub.
Saytımızın əməkdaşının Mətbuat Şurasından verdiyi məlumata görə, qurumun idarə heyətinin bütün üzvlərinin yekdilliklə qəbul etdiyi qərar əsasında Ölkə.az analitik informasiya saytı Şuraya üzv qəbul olunub.
Şuranın iclasında Ölkə.az kollektivinin Azərbaycanın milli və dövlət maraqlarına canla-başla xidmət etdiyi vurğulanıb. Saytın informasiya siyasətinin dövlətçiliyimizin maraqları ilə tam üst-üstə düşdüyü, saytda dərc olunan informasiya və analitik xarakterli materialların dövlətçiliyimizin möhkəmlənməsinə qulluq etdiyi xüsusi qeyd edilib.
Daha sonra Ölkə.az-ın Mətbuat Şurasına üzvlük barədəki müraciəti səsə qoyulub və Şura üzvləri tərəfindən yekdilliklə qəbul edilib.
Bu əlamətdar gün münasibəti ilə saytımızın il yarımlıq fəaliyyəti dövründə bizimlə çalışmış və indi də redaksiyamızda saytımızın inkişafına öz töhfəsini verməkdə davam edən bütün əməkdaşlarımızı təbrik edirik!
BTRİB rəhbəri Beytulla Hüseynov vəzifəsindən çıxarıldı
21.10.2015
Bakı Telefon Rabitəsi İstehsalat Birliyinin (BTRİB) rəhbəri Beytulla Hüseynovun vəzifəsindən azad olunması təsdiqlənib.
Rabitə və Yüksək Texnologiyalar Nazirliyindən bildiriblər ki, B.Hüseynov nazir Əli Abbasovun əmri ilə işdən azad olunub.
Qeyd edək ki, B.Hüseynov sabiq milli təhlükəsizlik naziri Eldar Mahmudovun qohumudur. E.Mahmudov Prezident İlham Əliyevin sərəncamı ilə vəzifəsindən azad edilib.
Vladimir Putin Leyla Əliyevanı mükafatlandırdı
22.10.2015
Rusiya prezidenti Vladimir Putin bu günlərdə “Əcnəbi vətəndaşların Rusiya Federasiyası dövlət mükafatları ilə təltif edilməsi haqqında” fərman imzalayıb.
Fərmana əsasən, Heydər Əliyev Fondunun vitse-prezidenti, Fondun Rusiya nümayəndəliyinin rəhbəri Leyla Əliyeva “Rusiya Federasiyası ilə dostluq və əməkdaşlığın möhkəmləndirilməsinə, iqtisadi əlaqələrin inkişafına, xaricdə rus dili və mədəniyyətinin qorunması və populyarlaşdırılmasına verdiyi böyük töhfəyə görə” Puşkin Medalı ilə mükafatlandırılıb.
Həccdən qayıdan hacılarımız virusa yoluxub
22.10.2015
Bu il Azərbaycandan Həcc ziyarətinə getmiş zəvvarlardan bir çoxunda virus aşkarlanıb.
Ölkə.Az xəbər verir ki, Azərbaycandan olan Həcc missiyasının həkim briqadasının rəhbəri Həci Kitabullah Əkbərov APA-ya bildirib ki, zəvvarlar bu virusa Səudiyyə Ərəbistanında yoluxublar.
Bunun kəskin respiratorlu virus infeksiyası olduğunu deyən K. Əkbərov bildirib ki, xəstəliyin əlamətləri ağır öskürək, asqırma, iştahasızlıq, oynaq-əzələ ağrıları və sairdir.
Allahşükür Paşazadəyə orden verildi — FOTO
22.10.2015
Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə oktyabrın 22-də Rusiya Federasiyası Başqırdıstan Respublikasının paytaxtı Ufa şəhərində keçirilən “XXI əsr təhsil müstəvisində İslamın idealları və dəyərləri” mövzusunda VIII Beynəlxalq elmi-praktik konfransın işində iştirak edib.
QMİ-nin mətbuat xidmətindən verilən məlumata görə, konfransın gedişində A.Paşazadənin Rusiya Mərkəzi Ruhani İdarəsinin ali mükafatı – “Əl-İzzət - Şərəf, Şöhrət və Ləyaqət” ordeni ilə təltif olunduğu barədə fərman elan edilib.
Səhiyyə Nazirliyi intiharların əsas səbəblərini açıqladı
22.10.2015
Ağır və xroniki psixi pozuntular zamanı suisid riski daha yüksəkdir.
Ölkə.Az xəbər verir ki, Səhiyyə Nazirliyinin intiharlarla bağlı yaydığı açıqlamada belə deyilir.
Nazirlikdən bildirilib ki, ağır psixi pozuntular zamanı suisid riskini azaltmaq üçün pasiyentlərin sosial həyata adaptasiyası təşkil olunmalıdır:
"İntihara münasibətdə kütləvi şüurda bəzi stereotiplər mövcuddur. Adətən belə düşünülür ki, intihar edənlər öz əməllərini tamamilə dərk edirlər və onların öz həyatları ilə istədikləri kimi davranmağa tam hüquqları çatır. Ancaq suisidal fikirlərə düşən insanlar eyni zamanda ziddiyyətli hisslər keçirirlər: bir tərəfdən onlar ölüm arzulayırlar, digər tərəfdən yaşamaq istəyirlər.
Jurnalist Rasim Əliyevin işi üzrə ibtidai istintaq tamamlanıb
22.10.2015
Jurnalist Rasim Əliyevin döyülərək öldürülməsi ilə bağlı saxlanılan şəxslərin barələrində olan cinayət işi üzrə ibtidai istintaq tamamlanıb.
Təqsirləndirilən Samir Mustafayevin vəkili Bəxtiyar Hacıyevin APA-ya verdiyi məlumata görə, hazırda vəkillər cinayət işinin materialları ilə tanış olurlar.
Qeyd edək ki, avqustun 8-də Bakı şəhər sakini Əliyev Rasim Məmmədəli oğlu bir qrup naməlum şəxs tərəfindən döyülərək çoxsaylı bədən xəsarətləri ilə Kliniki Tibbi Mərkəzə yerləşdirilib və avqustun 9-da orada ölüb.
Fakt üzrə Bakı şəhər Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma, zərərçəkmiş şəxsin ölümünə səbəb olduqda) maddəsi ilə cinayət işi başlanılaraq prokurorluq və polis əməkdaşlarından ibarət istintaq-əməliyyat qrupu yaradılıb.
Dayanacaqlardakı monitorlar daha dəqiq işləyəcək
22.10.2015
Dayanacaqlardakı Avtobus İnformasiya Terminallarında avtobusların real vaxtda çatma vaxtlarının əks olunması istiqamətində işlər aparılır.
Nəqliyyatı İntellektual İdarəetmə Mərkəzindən Ölkə.Az-a daxil olan məlumata görə, avtobuslarda yeni quraşdırılan izləmə cihazı vasitəsilə toplanan məlumatlar avtomatik olaraq dayanacaqlardakı monitorlara ötürüləcək.
Hazırda bununla bağlı test işləri aparılır. Sərnişinlər dayanacaqda olarkən monitora baxaraq ən yaxın avtobusun (marşrutlar üzrə) neçə dəqiqəyə çatacağı haqqında mütəmadi məlumatlandırılacaq. Çox yaxın müddətdə bütün dayanacaqlardakı monitorlarda avtobusun çatma vaxtı haqda dəqiq məlumatlar yerləşdiriləcək.
Sabiq MTN əməkdaşları ilə bağlı Penitensiar Xidmətdən açıqlama
22.10.2015
Milli Təhlükəsizlik Nazirliyinin (MTN) barələrində həbs qətimkan tədbiri seçilmiş daha 3 əməkdaşının adı məlum olub.
Onlar MTN Monitorinq Mərkəzinin əməkdaşları Anar Şirəliyev, Eşqin Əliyev və Elşad Əzizovdur.
Bu şəxslər də Cinayət Məcəlləsinin 308.2, 309.1 və 302.2-ci maddələri ilə təqsirləndirilən şəxs qismində cəlb olunaraq, həmin maddələrdə nəzərdə tutulan ittiham elan edilməklə məhkəmənin müvafiq qərarları ilə barələrində həbs qətimkan tədbiri seçilib.
Polis Aşura ilə əlaqədar gücləndirilmiş rejimdə işləyəcək
23.10.201
Bakıda Aşura mərasimləri ilə əlaqədar təhlükəsizlik tədbirləri həyata keçiriləcək.
Ölkə.Az xəbər verir ki, bu barədə APA-ya Bakı şəhər Baş Polis İdarəsinin rəis müavini, polis general-mayoru Səhlab Bağırov məlumat verib.
S. Bağırov bildirib ki, paytaxtda və bütün ölkədə Aşura mərasimlərinin keçiriləcəyi yerlərdə ictimai qaydanın qorunması və ictimai təhlükəsizliyin təmin edilməsi ilə əlaqədar Daxili İşlər Nazirliyi rəhbərliyinin xüsusi tapşırığı var: “Hər il olduğu kimi, bu il də Aşura günü ilə əlaqədar ictimai asayişin qorunması məqsədilə oktyabrın 24-ü paytaxt polisi gücləndirilmiş iş rejimində çalışacaq, ictimai asayiş lazımı şəkildə təmin ediləcək”.
Əbülfəs Qarayev şöbə müdirlərini mənimsəməyə görə işdən qovdu
23.10.2015
Mədəniyyət və turizm naziri Əbülfəs Qarayev bir müddət əvvəl nazirliyin bir neçə rayon şöbələrinin müdirlərini vəzifədən kənarlaşdırıb, bəzilərinə isə töhmət verib.
Nazirliyin şöbə müdirlərinin vəzifədən uzaqlaşdırılması işdə ciddi nöqsanlara yol vermələri, kadrların yerləşdirilməsində qanunsuzluq törətmələri ilə izah olunur. Şöbə müdirlərinin işdən çıxarılmasına səbəb olan nöqsanlar isə çox ilgincdir. Belə ki, şöbə müdirlərinin dövlət büdcəsindən ayrılan vəsaitlərin necə silinməsini əks etdirən sənədlər üzə çıxıb.
Vasif Talıbov Naxçıvanda yeni qurum yaradır
23.10.2015
Naxçıvan Muxtar Respublikası (MR) Ali Məclisinin sədri Vasif Talıbov Naxçıvan MR Ədliyyə Nazirliyinin Məhkəmə Ekspertizası Mərkəzinin yaradılması haqqında fərman imzalayıb.
Ölkə.Az “Report”-a istinadən xəbər verir ki, fərman məhkəmə ekspertizası sahəsində idarəetmənin təkmilləşdirilməsi məqsədi ilə verilib.
Sənədə əsasən, Ədliyyə Nazirliyinin Məhkəmə Ekspertizası Mərkəzinin Naxçıvan Filialının əsasında Naxçıvan Muxtar Respublikası Ədliyyə Nazirliyinin Məhkəmə Ekspertizası Mərkəzi yaradılıb.
Fərmanla “Naxçıvan Muxtar Respublikası Ədliyyə Nazirliyinin Məhkəmə Ekspertizası Mərkəzi haqqında Əsasnamə” də təsdiq edilib.
Bakıda xüsusi əməliyyat: 40 radikal islamçı saxlanıldı
23.10.201
Dünən axşam, Bakının Yasamal rayonunda aparılan operativ-əməliyyat tədbirləri nəticəsində xüsusi xidmətin əməkdaşları islam radikalları ilə əlaqədə şübhəli bilinən 42 nəfəri saxlayıblar.
Ölkə.Az haqqin.az-a istinadən xəbər verir ki, bu barədə Yasamal rayon Polis İdarəsindən bildiriblər.
Məlumdur ki, xüsusi xidmət əməkdaşları M.Seyidov 13 ünvanında yerləşən və Fərzəliyev soyadlı şəxsə malik “Farklı Lahmacun” adlı çay evinə daxil olublar.
Bu zaman müəssisədə 40-dan çox adam olub, onlar dini xarakterli tədbir keçiriblər. Toplaşanlar arasında iki yetkinlik yaşına çatmayan şəxs də olub. Bütün saxlanılanları Yasamal Rayon Polis İdarəsinə gətiriblər. Hadisə yerindən tapılmış dini ədəbiyyat da götürülüb.
Nazirlər Kabineti FHN-nin səlahiyyətini əlindən aldı
23.10.2015
Nazirlər Kabinetinin "Azərbaycan Respublikası Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi tərəfindən tikinti işlərinin dayandırılması haqqında Qaydalar"ın təsdiq edilməsi barədə" 2007-ci il 4 oktyabr tarixli 154 nömrəli qərarının ləğv edilməsi barədə 13 oktyabr 2015-ci il tarixli 326 nömrəli qərarı yanlış olaraq Fövqəladə Hallar Nazirliyinin tikinti sahəsində səlahiyyətinin ləğv edilməsi kimi şərh edilib.
Kabinetdən Trend-ə verilən məlumata görə, Nazirlər Kabineti bu qərarı Azərbaycan Prezidentinin "Tikinti işlərinin dayandırılması Qaydası"nın təsdiq edilməsi haqqında" 2015-ci il 22 may tarixli 533 nömrəli fərmanının 2.2-ci bəndinin icrasını təmin etmək məqsədi ilə verilib. Bu Qayda Azərbaycanın Şəhərsalma və Tikinti Məcəlləsinə tələblərinə uyğun olaraq hazırlanıb və Azərbaycan Respublikasının ərazisində həyata keçirilən tikinti, əsaslı təmir, yenidənqurma və bərpa işləri zamanı pozuntuların qarşısının vaxtında alınması, aradan qaldırılması və Məcəllədə nəzərdə tutulmuş hallarda tikinti işlərinin dayandırılması ilə bağlı prosedurları və mexanizmi tənzimləyir, habelə bu sahədə Azərbaycan Fövqəladə Hallar Nazirliyinin səlahiyyətlərini müəyyən edir.
Azərbaycanda 2 telekanalın yayımı dayandırıldı
23.10.2015
Kanal 12 və Zəhra Tv-nin yayımının dayandırılma səbəbi məlum deyil
İki dini kanalın yayımı dayandırılıb.
Ölkə.Az xəbər verir ki, bu barədə AzadXeber.az-a məlumat daxil olub.
Məlumatda qeyd olunur ki, hər iki telekanalın AzerSpace-dəki fəaliyyəti dayanıb. Buna baxmayaraq digər peyklərdə telekanallar yayımlarını davam etdirirlər.
Kanal 12-dən AzadXeber.az-a bildirilib ki, problemin yaranma səbəbi onların özlərinə də bəlli deyil.
"Azərkosmos"dan yayımı dayandırılan telekanallarla bağlı rəsmi açıqlama
23.10.2015
Bu gün Kanal 12 və Zəhra TV-nin AzerSpace-dəki yayımı dayandırılıb.
Məsələ ilə bağlı "Azərkosmos" ASC-dən Ölkə.Az-a bildirilib ki, telekanalların yayımının dayandırılması texniki problemlərlə bağlıdır: “Yaranan texniki problemlərin aradan qaldırılması istiqamətində hazırda işlər aparılır. Yaxın zamanda bu problemlərin həll ediləcəyinə ümid edirik”.
MTRŞ: Efirdə ciddi narahatlıq doğuran hallar azalmaq üzrədir
23.10.2015
“Verilişlərdə, bəzən seriallarda narahatlıq doğuran qeyri-etik ifadələr, qeyri-etik məzmunlu söhbətlər, səhnəciklər aradan qaldırılıb”.
Ölkə.Az xəbər verir ki, bunu APA-ya Milli Televiziya və Radio Şurasının (MTRŞ) Ekspertiza, Proqramlaşdırma və Analitik şöbəsinin müdiri Təvəkkül Dadaşov deyib.
MTRŞ rəsmisi bildirib ki, əvvəlki dövrlə müqayisədə ciddi narahatlıq doğuran hallar getdikcə azalmaq üzrədir: “Xırda-para nöqsanlar olur. O nöqsanlarla da bağlı yayımçılara şifahi şəkildə xəbərdarlıq edilir. Yayımçılar nöqsanların olduğu verilişlərin əsasən prodakşnlar tərəfindən hazırlanmasını əsas gətirirlər. Artıq yayımçılara prodakşnlara tövsiyələr vermək tapşırılıb ki, efir üçün hazırlanan materiallarda nöqsanlara yol verilməsin”.
Şeyxdən xəbərdarlıq: Zəncir vurmayın
23.10.2015
Qafqaz Müsəlmanları İdarəsi (QMİ) sabahki Aşura günü ilə bağlı dindarlara müraciət edib.
QMİ-dən Ölkə.Az-a verilən məlumata görə, Aşura günü nizam-intizamın təmin edilməsi üçün lazımı addımlar atılacaq.
“Aşura mərasimləri məscidlərdə, ibadət ocaqlarında, habelə xüsusi ayrılmış məkanlarda ictimai asayiş qaydalarına riayət olunmaqla keçirilməli, təziyə məclislərində Kərbəla şəhidlərinin şəninə xütbələr oxunmalı, habelə Vətən uğrunda şəhid olanların əziz xatirəsi yad edilməlidir.
Müqəddəs məkanlarda nizam-intizam gözlənilməli,qurşağadək soyunaraq zəncir və ya başqa alətlərlə bədənə xəsarət yetirməklə qan çıxarmaq kimi İslamda bəyənilməyən hərəkətlərə yol verilməməlidir”-deyə qeyd edilib.
Qeyd edək ki, QMİ rəhbəri Allahşükür Paşazadə də çıxışlarında Aşura günü cənzir vurmağın əleyhinə olduğunu bəyan edib.
“Yəni zəncir vurmaq, qan çıxarmaq, küçələrə çıxıb, səs-küy salmaq olmaz. Çünki bu bizim şəriətə uyğun deyil”.
A.Paşazadə Azərbaycan xalqını Aşura günü keçiriləcək qanvermə aksiyasında qan verməyə dəvət edib.
Azərbaycanda Aşura günü qeyd olunur
24.10.2015
Bütün müsəlman dünyasında, eləcə də Azərbaycanda bu gün Aşura günü kimi qeyd olunur.
Qafqaz Müsəlmanları İdarəsi (QMİ) Qazılar Şurasının fətvaslna əsasən, Hicri-qəməri təqvimi ilə yeni Hicri 1437-ci ilin başlanğıcı - Məhərrəm ayının 1-i Miladi təqvimlə 2015-cü il oktyabr ayının 15-nə təsadüf edib.
Məhərrəm ayının 10-u - Aşura günü isə 2015-ci il oktyabr ayının 24-nə - bu günə düşür.
Fətvada deyilir ki, Aşura mərasimləri məscid ərazilərində, ibadət ocaqlarında, habelə müvafiq icra qurumları tərəfindən müəyyən edilmiş xüsusi məkanlarda ictimai asayiş qaydalarına riayət olunmaqla keçirilməlidir. İbadət məkanlarından kənar ərazilərdə kütləvi yürüşlər yalnız müvafiq dövlət qurumlarının icazəsi əsasında təşkil oluna bilər. Təziyə məclislərində Kərbəla şəhidlərinin şəninə xütbələr oxunmaqla Vətənimiz uğrunda şəhid olanların əziz xatirəsi də yad edilməlidir. Təziyə keçirilən məkanlarda nizam-intizam gözlənilməlidir. Qurşağadək soyunaraq sinə vurmaq, zəncirlə və ya başqa alətlərlə qan çıxarmaq şəriətə uyğun deyil və qınağa səbəb olur. Əzadarlar özlərinə və başqalarına xəsarət yetirməməlidirlər.
Sabah Azərbaycanda yay vaxtı ləğv ediləcək
24.10.2015
Sabah Azərbaycanda yay vaxtı ləğv ediləcək.
Nazirlər Kabinetinin “Azərbaycan Respublikası ərazisində yay vaxtının tətbiq edilməsi haqqında” 17 mart 1997-ci il tarixli, 21 nömrəli qərarına əsasən hər il mart ayının son bazar günü əqrəblərin bir saat qabağa çəkilməsi ilə yay vaxtına keçilir.
Azərbaycanda polislərə görünməmiş səlahiyyət
24.10.2015
Bir neçə gün öncə Daxili İşlər Nazirliyinə telefon danışıqlarını gizli dinləmək səlahiyyəti verilib.
Bu qərarla bağlı qanunvericiliyə də dəyişiklik edilib. Artıq polis əməkdaşları da cinayətdə şübhəli bilinən şəxslərin telefon danışıqlarını izləyə, telefon siqnalları əsasında onların yerini təyin edə biləcək.
MTN-nin daha bir idarə rəisi vəzifəsindən azad edildi
24.10.2015
Milli Təhlükəsizlik Nazirliyinin (MTN) doqquz yüksək vəzifəli əməkdaşının işdən azad olunması ilə bağlı xəbər vermişdik.
Ölkə.Az xəbər verir ki, Trend-ə daxil olan məlumata görə, MTN-nin daha bir idarə rəisi, polkovnik Nazim Lətifov vəzifəsindən azad edilib və sərəncama götürülüb.
Əldə etdiyimiz informasiyaya görə, MTN-də kadr islahatları davam etdiriləcək.
Xatırladaq ki, oktyabrın 20-də Baş Prokurorluq Milli Təhlükəsizlik Nazirliyinin yüksək rütbəli zabitlərinin həbsi ilə bağlı məlumat yayıb. Məlumatda deyilir ki, Milli Təhlükəsizlik Nazirliyinin (MTN) ayrı-ayrı vəzifəli şəxsləri tərəfindən vəzifə səlahiyyətlərindən sui-istifadə və yol verilmiş digər qanun pozuntuları faktları üzrə Baş Prokurorluqda Cinayət Məcəlləsinin müvafiq maddələri ilə cinayət işi başlanaraq istintaq-əməliyyat qrupu yaradılıb.
Şeyx: “Sünni-şiə birliyində problem yoxdur”
24.10.2015
"Azərbaycan həmişə Aşura gününü qeyd edib. Sovet dövründə buna imkan yaradılmırdı, amma müxtəlif vasitələrlə xalqımız bu günü qeyd edirdilər".
Ölkə.Az "Report"a istinadən xəbər verir ki, bunu Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə deyib. O bildirib ki, Azərbaycan müstəqillik əldə etdikdən sonra bütün bu məsələlər öz həllini tapıb: "Hazırda ölkədə dini tolerantlıq mövcuddur. Din-dövlət münasibətləri qaydasındadır. Din-dövlət münasibətləri Azərbaycanda olduğu qədər digər dünya ölkələrində yoxdur. Ölkəmizdə sünni-şiə birliyi var. Bu münasibətlərdə heç bir problem yoxdur".
Şeyx qeyd edib ki, Azərbaycan bu günləri qeyd etməklə yanaşı, Qarabağ uğrunda şəhid olanları da unutmur.
Azərbaycanın ikinci peyk proqramının dəyəri açıqlanıb
24.10.2015
Azərbaycanın ikinci peyk proqramının dəyəri 191,36 milyon dollar təşkil edəcək.
Ölkə.Az Azərbaycan Respublikası Satınalmalar üzrə Dövlət Agentiliyinin saytına istinadən məlumat veriri ki, bu vəsait "Azerspace-2/Intelsat 38" ikinci geostasionar peykin tikintisinə və yeni yerüstü peyk avadanlığının aınmasına sərf ediləcək.
"Azerspace-2/Intelsat 38" peykinin orbitə 2017-ci ildə çıxarılması nəzərdə tutulur. Yeni peykin xidmət zonasının Avropa, Asiya, Yaxın Şərq və Afrika ölkələrini əhatə edəcəyi qeyd olunur.
Azərbaycanın ilk peyki "Azerspace/Africasat-1a" 2013-cü il fevralın 1-də orbitə çıxarılıb.
Vergilər Nazirliyinin baş idarə rəisi işdən çıxarıldı
24.10.2015
Azərbaycan Vergilər Nazirliyinin baş idarə rəisi işdən çıxarılıb.
Ölkə.Az xəbər verir ki, APA-nın əldə etdiyi məlumata görə, Vergilər Nazirliyinin cinayət xarakterli vergi hüquqpozmalarının təhlili və vergi borclarının alınması işinin təşkili baş idarəsinin rəisi Vidadi Məmmədov vəzifəsindən azad edilib.
Hazırda Vergilər Nazirliyinin cinayət xarakterli vergi hüquqpozmalarının təhlili və vergi borclarının alınması işinin təşkili baş idarəsinin rəisi vəzifəsini Ramiz Ağayev icra edir.
Nazirliyin ictimaiyyətlə əlaqələr mərkəzindən məlumat almaq mümkün olmayıb.
Ölkə.az
