Cavanşir körpüsünün sökülməsi ilə əlaqədar bəzi parking sahələri ləğv edilir? - AÇIQLAMA (YENİLƏNİB)

Cavanşir körpüsünün sökülməsi və təmir işləri ilə əlaqədar bu gündən nəqliyyatın hərəkəti yenidən təşkil edilir.

Bu barədə “Ölkə.az” Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinə (AYNA) istinadən xəbər verir.

Bildirilir ki, müvəqqəti sxemə əsasən, E1 və 125 nömrəli avtobus marşrutlarının hərəkəti alternativ küçələrlə həyata keçirilir. Belə ki, E1 nömrəli ekspres avtobusu “28 May” və Puşkin küçələrindən, 125 nömrəli avtobus isə Rəşid Behbudov, Süleyman Rəhimov küçələri və Azadlıq prospektindən keçməklə öz xətləri ilə hərəkətlərini davam etdirir.

Körpünün sökülməsi ilə əlaqədar nəqliyyat vasitələrinin alternativ keçələrlə mərkəz istiqamətində rahat və maneəsiz hərəkətini təmin etmək üçün “28 May”, Nizami, Üzeyir Hacıbəyli, Kövkəb Səfərəliyeva, Sabit Orucov, Yeryomenko və Firuz Qəmbərov küçələrində mövcud olan bəzi parklanma yerləri müvəqqəti ləğv olunur.

***
Bir neçə gündür Bakının Xətai rayonunda yerləşən Cavanşir körpüsünün sökülməsi və təmir işləri ilə əlaqədar bağlanacağı barədə məlumatlar paylaşılır. Rəqəmsal İnkişaf və Nəqliyyat Nazirliyinin Mətbuat xidmətindən verilən məlumata görə, Cavanşir körpüsü üzərində nəqliyyatın hərəkəti bu gündən saat 17:00-dan etibarən məhdudlaşdırılacaq.

Oxu.Az xəbər verir ki, Cavanşir körpüsü üzərindən hərəkət edən nəqliyyat vasitələrinin rahat və maneəsiz hərəkətini təmin etmək məqsədilə yol infrastrukturu və nəqliyyat axını təhlil edilib, hərəkətin müvəqqəti təşkilinə dair sxem hazırlanıb.

Səhər saatlarından paytaxtın Kövkəb Səfərəliyeva, Dilarə Əliyeva və 28 May küçələri yol kənarında park edilən avtomobillərdən təmizlənir. Nəqliyyatın hərəkətini tənzimləmək məqsədilə sözügedən ərazilərdə DYP əməkdaşları da xidmət aparırlar.