Beynəlxalq Banka bomba “qoyan” şəxs ruhi xəstə çıxdı

Bu gün Bakı Ağır Cinayətlər Məhkəməsində terrorçuluq barədə yalan məlumat verməkdə təqsirləndirilən Hidayət İslam oğlu Vəliyevin cinayət işi üzrə məhkəmə prosesi başa çatıb.

Ölkə.Az xəbər verir ki, Virtualaz.org saytının əldə etdiyi məlumata görə, prosesə hakim Rauf Əliyev sədrlik edib.

Prosesdə Hidayət Vəliyevin anlaqsız olması üzə çıxıb. Buna görə də o, törətdiyi cinayət məsuliyyətindən azad edilib. Məhkəmə onun barəsində ümumi tipli psixatriya stasionarlarında məcburi tibbi müalicə təyin edib.

Qeyd edək ki, hadisə bu il baş verib. H.Vəliyev Daxili İşlər Nazirliyinin “102” xidməti-zəng mərkəzi sisteminə zəng edərək Azərbaycan Beynəlxalq Bankının ofisinə bomba qoyulması barədə məlumat verib. Daha sonra onun verdiyi məlumatın yanlış olduğu aşkarlanıb.

İbtidai istintaq zamanı H.Vəliyevin hadisəni anlaqsız vəziyyətdə törətdiyi müəyyənləşib. H.Vəliyev Cinayət Məcəlləsinin 216-cı (terrorçuluq barədə bilə-bilə yalan məlumat vermə) maddəsi ilə ittiham olunub.

Ölkə.Az