Az qaldı: Köhnə maşınlar metalloma gedir
Artıq neçə müddətdir ki, ili köhnə, ekoloji cəhətdən zərərli sayılan avtomobillərin sahibləri səksəkə içindədir. Bəziləri avtomobillərinin məcburi şəkildə əlindən alınacağını düşünür, bəziləri isə icbari utilizasiyadan ehtiyatlanır. “Kasıbın maşını olmayacaq” deyənlər də az deyil.
Ötən həftə isə mətbuatda köhnə nəqliyyat vasitələrinin dövriyyələrinin məhdudlaşdırılması üçün təkliflərin hazırlanacağı ilə bağlı xəbərlər yayıldı. Belə ki, təkliflər Azərbaycanda istismarı ekoloji cəhətdən zərərli sayılan fiziki və mənəvi cəhətdən köhnəlmiş nəqliyyat vasitələrinin ətraf mühitə təsirinin qiymətləndirilməsi, onlardan istifadənin və dövriyyələrinin məhdudlaşdırılması məqsədi daşıyacaq.
Layihə Biznes mühiti və beynəlxalq reytinqlər üzrə Komissiyasının ekoloji təmiz və təhlükəsiz nəqliyyat vasitələrinin dövriyyəsinin stimullaşdırılması və infrastrukturunun təkmilləşdirilməsi üzrə 2024-cü il üçün Yol Xəritəsində əksini tapıb.
Bəs görəsən təkliflər necə hazırlanacaq? Köhnə avtomobil sahiblərinə güzəştlər nəzərdə tutulacaqmı?
Mövzu ilə bağlı Yenisabah.az-a danışan nəqliyyat məsələləri üzrə ekspert Aslan Əsədov bildirib ki, Azərbaycanda utilizasiya prosesi nisbətən gecikib:
“Bu mövzu çox aktual və insanları düşündürən bir mövzudur. Çünki utilizasiya prosesi qonşu ölkələrin bir çoxunda artıq uzun müddətdir tətbiq olunur. Bu keçmiş MDB və Avropa regionunda yerləşən nisbətən daha gənc respublikalara şamil olunur. Sözügedən ölkələr bu prosesi daha tez həyata keçirməyə çalışır”.
Ekspert bu ildən etibarən utilizasiyanın daha sürətlə davam edəcəyini bildirib:
“Azərbaycana gəldikdə, burada əsas məqam ondan ibarətdir ki, utilizasiya prosesinin başlanması çoxdankı hadisədir. Çünki burada müəyyən iqtisadi, siyasi məsələlər oldu ki, bu proses ləngidi. Ona görə də bu ildən etibarən utilizasiyanın sürətlə və davamlı formada davam edəcəyinə əminəm. Ölkəmizin bu prosesin davamlı olması üçün yetərincə iqtisadi gücü var. Ancaq nisbətən mərhələli şəkildə və dövləti daha çox xərcə salmadan həyata keçirmək daha uyğundur”.
