Məhkəmə alimlə bağlı çıxarılan qərarı ləğv etdi

Bakı Apellyasiya Məhkəməsində Elmlər Akademiyasının tarixçi alimi Aydın Əlizadə barəsindəki xüsusi ittiham qaydasında verilən apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Elmar Rəhimovun sədrliyi ilə keçirilən prosesdə qərar elan olunub.

Qərara əsasən, məhkəmənin gəldiyi nəticələr işin faktiki hallarına uyğun olmadığı üçün birinci instansiya məhkəməsinin qərarı ləğv edilib. 

Qeyd edək ki, əvvəlcə tarixçi alim A.Əlizadə bir müddət əvvələ kimi işlədiyi Fəlsəfə və Sosiologiya İnstitutunun Multikulturalizm və tolerantlıq fəlsəfəsi şöbəsinin müdiri Xatirə Quliyevadan şikayət edib. O, Quliyevanın onu əsassız işdən çıxardığını, barəsində böhtan xarakterli yazı dərc etdiyini, saxtakarlıqla professor adı almaq üçün müraciət etdiyini iddia edib.

Lakin Səbail Rayon Məhkəməsi alimin şikayətini əsaslı hesab etməyib. Bundan sonra qarşı tərəf xüsusi ittihamçı kimi eyni məhkəməyə müraciət edib. 

X.Quliyeva şikayətində yazır ki, A.Əlizadə yazdığı "Multikulturalizmin Qədim Dünyada Təzahürləri: Qədim Urartu və İran” adlı məqaləsində erməni mövqeyindən çıxış edib. Şöbə müdiri iddia edib ki, həmin məqalə dövlətçilik əleyhinə olduğu üçün A.Əlizadəni işdən çıxarıb. Məhz bundan sonra A.Əlizadə onun haqda nüfuzdan salmağa yönələn sözlər işlədib, feysbuk səhifəsində status paylaşıb. 

Hakim proses iştirakçılarını dinləyib, iş materiallarını araşdırdıqdan sonra belə qənaətə gəlib ki, şikayət kifayət qədər dəlil və sübutlarla əsaslandırılmayıb.

Qərara əsasən A.Əlizadənin Cinayət Məcəlləsinin 147-ci (böhtan) və 148-ci (təhqir) maddələri ilə cinayət məsuliyyətinə cəlb edilməsinə dair şikayət icraata götürülməyib.

Xatırladaq ki, Fəlsəfə və Sosiologiya İnstitutu Azərbaycan Milli Elmlər Akademiyasının tərkibindədir.