Gömrük mafiyası və narkotrafik

Dünya mediasının gündəmini sarsıdan növbəti xəbər Azərbaycanla bağlı oldu

Suriya, İraq, Ukrayna və son Qəzza böhranını kölgədə qoyan növbəti kriminal xəbər, böyük İpək Yolunun heç də "ipək yolu" olmadığını, Asiyanı Avropaya birləşdirən nəqliyyat dəhlizinin beynəlxalq mafiya tərəfindən daha hansı məqsədlər üçün istifadə olunduğunu bir daha bütün dünyaya göstərdi.

Azərbaycandan Türkiyəyə gedən yük maşınında, Gürcüstan ərazisini keçərkən tutulan 3 tonluq təmiz heroin əsrin ən iri narkotik tranzitlərindən biri sayıla bilər.

Gürcüstan mediasında dərc olunan materialda yükün Azərbaycandan daxil olmasına baxmayaraq ölkənin əlaqədar dövlət orqanlarından hadisə ilə bağlı heç bir açıqlamanın verilmədiyi bildirilir. Bu beynəlxalq qalmaqalın fonunda bizimkilər yenə məsələ gündəmdən düşənə qədər susmağa üstünlük verirlər.

Hadisədən sonra bütün diqqətlər ölkə sərhədlərini nəzarıədə saxlayan orqanlara yönəldi. MTN məsələ ilə bağlı DGK və DSX-yə müraciət etməyi məsləhət gördü. Yəni milli kəşfiyyat orqanımız məsələdən xəbərsizdir. MTN-nin açıqlamasında sanki "nəyimizə lazım, indi ki sərhəd qoşunları bizə tabe deyil. Qoy kim məsuldursa o da cavab versin" fikri səslənirdi. Dövlət sərhəd xidmətində məsələdən xəbərsiz olduqlarını bildirdilər. DSX-dəki mötəbət mənbə isə xidmət rəhbərliyinin bu qalamqalla bağlı heç bir açıqlama verməmək haqda xidmətin bütün zabit heyətinə ciddi tapşırıq verdiyini bildirir.

Məntiqlə yüklər üzərində nəzarət DSX tərəfindən həyata keçirilmədiyindən bu xidmətin qalmaqalda cavabdeh tərəf kimi adının hallanması əslində düzgün deyil. Azərbaycana daxil olan və ölkədən çıxan bütün mallar üzərində nəzarət yalnız Dövlət gömrük komitəsinə aiddir. İstənilən yükün açılması, yoxlanması, rüsuma tabe tutulması, mal sahibinə heç bir arayış verilmədən hətta müsadirə belə edilməsi "haqqı" yalnız Gömrük orqanlarına məxsusdur. Əgər bu qədər heroin Azərbaycandan qonşu dövlətin ərazisinə keçibsə, deməli bu məsələ ilə bağlı bütün məsuliyyət DGK rəhbərliyinin üzərinə düşür.

Gömrük Komitəsi isə məsələ ilə bağlı ümumiyyətlə heç bir münasibət bildirmədi. Qəbir sükutuna qərq olmuş DGK rəhbərliyi isə Azərbaycanı hansı beynəlxalq kriminal qalmaqalın içərisinə soxduğunu və ölkəmizin imicinə hansı zərbələri vurduğunu təsəvvür belə etmir.

Bu, ölkədə "gömrük mafiyasının" özbaşınalığının hansı həddə çatdığını və ölkəmizin gələcəyinə hansı zərbələri vura biləcəyini bir daha göz önünə sərir. Ölkənin təhlükəsizliyindən cavabdeh olan orqanların məsələ ilə bağlı mövqeyi isə güc strukturları arasında çox ciddi problemlərin olduğundan xəbər verir.

Mövzuya qayıdacağıq...

Olke.az-ın Monitorinq şöbəsi