İcra başçısına yaxın olan 35 yaşlı müəllimənin deputatlığa gedən yolu

Ölkə.az Milli Məclisə keçirilmiş seçkilərdə ilk dəfə millət vəkili adını qazanmış şəxslərlə bağlı silsilə yazıları təqdim edir.

İkinci qəhrəmanımız ilk dəfə Milli Məclis üzvü seçilən Əliyeva Sona Sakit qızıdır.

S.Əliyeva 1980-ci ildə anadan olub, ixtisasca biologiya müəllimidir. Ancaq sonradan Şəmkir rayon təhsil şöbəsində metodist işləyib. 2012-ci ildə ilin ən yaxşı müəllimi mükafatına layiq görülüb.

S.Əliyeva həmçinin Azərbaycanın əməkdar müəllimidir. 2013-cü ildən Şəmkir Rayon İcra Hakimiyyəti başçısının müavinidir. Maraq üçün qeyd edək ki, xanım deputat Şəmkirin icra başçısı Alimpaşa Məmmədova yaxın şəxslərdən hesab edilir.

Xatırladaq ki, MSK-nın açıqladığı rəqəmlərdə 99 saylı Şəmkir kənd seçki dairəsindən Sona Əliyevanın 17 min 162 səs (72,8 faiz) qazandığı qeyd olunur.

İntiqam Valehoğlu
Ölkə.az