Tələbə adı qazanan JURNALİST ÖVLADLARI
Ali təhsil müəssisələrinə yerləşdirmənin nəticələri açıqlanıb.
Bu barədə Dövlət İmtahan Mərkəzindən bildirilib.
Tələbə adını qazananlar arasında jurnalist övladları da az deyil.
Tanınmış televiziya jurnalisti Rauf Rəcəbovun oğlu artıq tələbə adına sahibdir:
“Bu gün tələbə adını qazanan abuturiyentləri, valideyinlərini, müəllimlərini böyük fəxarət və sevinc hissi ilə təbrik edirəm. Bu gün tələbə adını qazananlar sırasında övladım Ramal Rəcəbzadə də var. O, ailə ənənələrinə sadiq qalaraq babası, əmisi və atası kimi idarəetmə məktəbini seçdi. Dövlət İdarəşilik Akademiyasının tələbəsi statusuna yiyələndi. Yolun açıq olsun övladım. Hər zaman uğurlarına sevinək!”
Kənd Təssərüfatı Nazirliyinin tabeliyində Aqrar Tədqiqatlar Mərkəzinin İnformasiya və Operativ Təhlil bölməsinin müdiri Valeh İsmayılovun oğlu Murad İsmayılov Fransız-Azərbaycan Universitetinin Geofizika mühəndisliyi fakultəsinə qəbul olub.
Yenisabah.az-ın baş redaktoru Elnur Məmmədli və APA-nın redaktoru Nigar Abbasovanın övladları Bakı Dövlət Universiteti, komputer elmləri ixtisasına qəbul olub.
“Evimizin ilk tələbəsi! Bakı Dövlət Universiteti, komputer elmləri, əyani. Dövlət sifarişli! Təbrik edirəm, gözəl qızım”,- deyə E.Məmmədli sevincini sosial şəbəkə hesabında bölüşüb.
Jurnalist Elçin Rüstəmlinin qızı da Bakı Dövlət Universiteti, Hüquq fakültəsini qazanıb:
“Allaha çox şükür! Çox sağ ol qızım! Aysu Rüstəmli: BDU Hüquq fakültəsi, əyani dövlət sifarişli. Tələbə adını qazanan bütün gənclərimizi, onların ailə üzlərini təbrik edirəm”,-deyə E.Rüstəmli yazıb.
Bizimyol.info-nun əməkdaşı İradə Cəlilovanın oğlu Həydərəli Əlizadə də tələbə adını qazananalardandır. O, Azərbaycan Dillər Universitetinin Alman dili və Ədəbiyyatı fakultəsinə qəbul olunub.
Xalqqəzeti.az-ın əməkdaşı Səxavət Həmidin qızı bizim gələcək həmkarımız olacaq. Belə ki, o, Bakı Dövlət Universitetinin Jurnalistika fakültəsinin tələbəsi adını qazanıb:
“Nəhayət ki, səbirsizliklə gözlədiyimiz şad xəbər gəldi. Gözəl və ağıllı qızım Sara öz istəyi, şəxsi seçimi ilə Bakı Dövlət Universitetinin Jurnalistika fakültəsinə (əyani, dövlət sifarişi) qəbul olundu. Öz övladım da daxil olmaqla tələbə adı qazanmış bütün balaları ürəkdən təbrik edirəm. Onlara gələcək tələbə həyatlarında, dərslərində uğurlar arzulayıram”,- o, sosial şəbəkə hesabında qızı daxil tələbə adı qazanan hər kəsi edib.
TNS İnformasiya Agentliyinin baş redaktoru Gülşən Hacıyevanın oğlu Ərən Allahverdi Ankara Universitetinin Siyasal Bilgiler Fakultəsinin Siyaset bilimi Ve Kamu yönetimi ixtisasına (30% İngilizce) qəbul olub.
Missiya Media Qrupunun baş redaktoruNicat Dağların oğlu Prezident yanında İdarəçilik Akademiyasının Davamlı İnkişafın İdarə olunması fakultəsinə qəbul olunub.
“Şükür Allaha, nəhayət ki, cavablar çıxdı. Mirsamir arzusuna çatdı. Prezident yanında İdarəçilik Akademiyasının Davamlı İnkişafın İdarə olunması fakultəsinə (dövlət sifarişli) qəbul oldu. Nə istəyirdi, haranı istəyirdi, ora da qisməti oldu. Şükür ki, Allah ikinci dəfə tələbə atası olmaq səadəti qismət elədi!”,- deyə “Facebook” hesabında bunu bölüşüb.
Konkret.az saytının baş redaktoru Fadil Paşayev və yoldaşı Sevinc Paşeyavanın qızı Azərbaycan Dillər Universitetinin Koreya dili tərcüməçiliyi fakültəsini qazanıb.
QHT.az saytının baş redaktoru Cəsarət Hüseynzadənin qızı artıq Dövlət Gömrük Komitəsinin Akademiyası, Hüquqşünaslıq ixtisasının tələbəsidir:
“Təbrik edirəm gözəl balam! Yolun açıq olsun! Dövlət Gömrük Komitəsinin Akademiyası, Hüquqşünaslıq, Əyani”,-deyə o, qızını təbrik edib.
“Space”TV-nin idman departamentinin şöbə müdiri Tural Xudiyevin oğlu Kamil Bakı Slavyan Universitetin Tərcümə (rus dili üzrə) ixtisasına qəbul olunub.
Avtosfer.az saytının baş direktoru Elməddin Muradlının oğlu Azərbaycan Dövlət Neft və Sənaye Universitetinin Kompüter mühəndisliyi fakültəsinin tələbəsi adını qazanıb.
E.Muradlı özü isə Azərbaycan Texniki Universitetinin Logistika və nəqliyyat texnologiyaları fakültəsinə qəbul olaraq ikinci təhsilini alacaq.
“Ata-bala tələbə olduq. Bu gün həyatımda çox əlamətdar bir gündür. Böyük oğlum Turqut Muradlı Azərbaycan Dövlət Neft və Sənaye Universitetinin Kompüter mühəndisliyi fakültəsinin tələbəsi adını qazandı. Dövlət sifarişli ixtisasa yiyələnib dövlətimizə xidmət edəcək.
Mən özüm də dinc durmayıb ikinci ali təhsil üçün müraciət etdim. Sınaqdan uğurla keçərək Azərbaycan Texniki Universitetinin Logistika və nəqliyyat texnologiyaları fakültəsinə qəbul oldum.
Övladları ali məktəbə qəbul olan bütün valideynləri təbrik edirəm!”
DİA.az-ın baş redaktoru Məhəmməd Ərsoyun oğlu Bakı Mühəndislik Universitetinin tələbəsi adını qazanıb:
“Gözəl oğlum Sevindik... Tələbə adın mübarək... Bakı Mühəndislik Universiteti... Buna da şükür”.
24media.az-ın baş redaktoru Anzulə Pərvizqızının oğlu Mexatronika və Robototexnika mühəndisliyi fakultəsinə qəbul olunub:
“Oğlum tələbə oldu Öz seçimi- Mexatronika və Robototexnika mühəndisliyi. (Nə çətin addır belə) Qəbul olmaq əsasdır, amma uğurlu kadr kimi Vətənə xidmət etmək üçün hər zaman çalışmaq lazımdır.Mən tələbə anası edən Yaradana sonsuz şükürlər olsun”.
Azərbaycan qəzetinin Baş redaktorun müavini İxtiyar Hüseynlinin oğlu UNEC-in biznesin idarə edilməsi fakültəsinə daxil olub.
“Sevincimiz hədsizdir... Kərim UNEC-in biznesin idarə edilməsi fakültəsinə daxil oldu. Bundan öncə də SAT və İELTS nəticələrinə əsasən, Bakıda ADA və Belçikada Ku Leuven universitetlərinin eyni adlı fakültələrinə qəbul olmuşdu. Seçimimiz "The Times Higher Education” reytinqinə görə, dünyanın 45-ci universiteti elan edilən, 599 yaşlı KU LEUVEN oldu”.
İctimai Televiziyanın böyük redaktoru Rasim İsmayılovun oğlu Azərbaycan Texniki Universitetin Logistika ixtisasına qəbul olub:
"Dünənin totuş-motuşları artıq tələbə oldu. Bu da Texniki Universitetdə oxuyub (logistika) Lenin olacaq. Bütün balaların yolu işıqlı olsun!"
Əmək və Əhalinin Sosial Müdafiəsi Nazirliyinin internet resursu olan DOST TV-nin əməkdaşı Jurnalist Rumiyyə Miraslanın da oğlu tələbə adını qazananlar sırasındadır.
“Mia.az” saytının rəhbəri Fazil Əhmədin oğlu Fərid Əhmədov ali təhsilini Türkiyədə alacaq. YÖS imtahanlarında uğutlu nəticə qazanan həmkarımızın övladı İstanbulda - Hüquq fakültəsində oxuyacaq.
“Report” İnformasiya Agentliyinin redaktoru Araz Zeynalovun qızı Röya Zeynallı Azərbaycan Dillər Universitetində (ingilis-koreya dili) təhsil alacaq.
Jurnalist Elman Cəfərli də qızının tələbə olmağına sevinir. “Ayan Bakı Dövlət Universitetinin Beynəlxalq münasibətlər fakültəsinə (dövlət sifarişi üzrə, ingilis dilində) daxil oldu. Ali məktəbə qəbul olunan bütün övladları təbrik edirəm!”, - deyə həmkarımız sevincini bölüşüb.
Jurnalist Cəmaləddin Quliyevin oğlu da tələbə adını qazanıb. Həmkarımızın övladı Bakı Dövlət Universitetində ali təhsil alacaq.
Toplum TV-nin təsisçisi Ələsgər Məmmədlinin qızı Məltəm Bakı Mühəndislik Universitetinə (BMU) qəbul olunub. O, 3 il Bakıda, 1 il isə Cənubi Koreyada İNHA universitetində dövlət sifarişli ilə oxuyacaq. Bununla da iki təhsil və iki diplom almış olacaq.
“Report” İnformasiya Agentliyinin baş redaktor müavini Emil Quliyevin qızı Sara Ada Universitetinə qəbul olunub.
Qeyd edək ki, Ali təhsil müəssisələrinin müsabiqəsində 82883 nəfər iştirak edib. Onlardan 55656 nəfəri (o cümlədən 7287 subbakalavr) ali təhsil müəssisələrinə qəbul olunub. 27117 (o cümlədən 1579 subbakalavr) nəfər dövlət sifarişi əsasında, 28539 (o cümlədən 5708 subbakalavr) nəfər isə ödənişli əsaslarla təhsil almaq hüququ əldə edib. /bakıvaxtı.az
