Bakı üzrə “kupçaların” paylanılması davam edir

Əmlak Məsələləri Dövlət Komitəsinin (ƏMDK) regionlarda və paytaxtda keçirdiyi “Kütləvi çıxarış” kampaniyasından Qazax və Tovuz sakinləri faydalanıb.

Bu barədə ƏMDK-dan Ölkə.Az-a bildirilib.

“Eyni gündə paralel olaraq 2 rayonda keçirilən sosial kampaniyada 180-ə yaxın vətəndaş iştirak edib. Belə ki, “bir pəncərə” prinsipi əsasında 110-a yaxın vətəndaşa dövlət reyestrindən çıxarışlar birbaşa onların ünvanlarında təqdim olunub. 70-dən çox rayon sakini isə ilkin mülkiyyət sənədlərini çıxarışla əvəz olunması üçün təhvil verib”, - deyə komitədən qeyd edilib.

ƏMDK-dan bildirilib ki, kampaniya çərçivəsində daşınmaz əmlak və torpaq sahələri ilə bağlı əvvəlki illərdə verilən aktlar və digər ilkin sənədlər qəbul edilir:

“Kampaniya çərçivəsində vətəndaşlara həyətyanı torpaq sahələri, mənzillər, fərdi həyət evi və digər mülkiyyət barədə müxtəlif vaxtlarda verilmiş aktlar, şəhadətnamələr, qeydiyyat vəsiqələri və digər sənədlər kütləvi qaydada çıxarışlarla əvəz olunur.

Eyni zamanda, daşınmaz əmlak və torpaq sahələri ilə bağlı əvvəlki illərdə verilən aktlar və digər ilkin sənədlər qəbul edilir”.

Bundan başqa, komitədən qeyd edilib ki, kampaniya çərçivəsində bir neçə ahıl və fiziki məhdudiyyətli sakinə birbaşa öz evlərindəcə xidmət göstərilib.

Komitədən qeyd edilib ki, kütləvi çıxarış kampaniyası hazırda Bakının bütün rayonları üzrə davam etdirilir:

Ötən ayın sonundan etibarən “Kütləvi çıxarış” kampaniyası artıq Bakı şəhərində də keçirilməyə başlayıb. Artıq Səbail və Sabunçu rayonlarında yerləşən bir neçə çoxmərtəbəli binadakı mənzil sahibləri kampaniyadan faydalana bilib. Kampaniya regionlarla yanaşı, Bakı şəhərinin bütün rayonları üzrə hazırda da davam etdirilir.

Ölkə.Az