Elza Seyidcahan: "Polis deyib ki, videonu bizə göndər, öz telefonundan da sil"

Əməkdar artist Elza Seyidcahan Şabranda Bayraq Günü ilə bağlı keçirdiyi aksiya zamanı saxlanılmış gənc barədə danışıb.

Sənətçi Ölkə.az-a açıqlamasında bildirib ki, bu, 21 yaşlı Qurbanov Elvin Xanbala oğludur:

"İndi rayondakı yaxınlarıma zəng vurub maraqlandım. Bu Qurbanov Elvin Xanbala oğludur. Şabranda bayraq meydanında çox gözəl tədbirimiz oldu, bayrağın qarşısına çiçəklər qoydum. Bayrağımızın tarixini özündə əks etdirən bukletləri hədiyyə olaraq insanlara paylayırdıq. Həmin bukletdə möhtərəm prezidentimizin və Ulu Öndərimizin fotosu da əks olunmuşdu. Ümumiyyətlə, hansı ölkədə olsam da, bütün milli bayramları Siyəzəndə qeyd edirəm. Həmin oğlanı çəkdiyi videoya görə saxlayıblar. Deyiblər ki, telefonundakı videonu bizə göndər və öz telefonundan sil. Əgər başqa problem olsaydı, mən işi belə qoymazdım. Artıq həmin gənc sərbəst buraxılıb. Deputat Tahir Süleymanovun səlahiyyətli nümayəndəsi Etibar Heydərov seçki başlayandan hər gün polisləri çağırıb bizə hədə-qorxu gəlir. Amma sevinirəm ki, polislərimiz qayda-qanunları çox gözəl bilirlər. Hətta bukletləri onlara verdim, oxudular".

Xatırladaq ki, Elza Seyidcahanın keçirdiyi aksiya zamanı əməkdar artistlə Etibar Hüseynov arasında qarşıdurma yaranmış, bir nəfər gənc polis tərəfindən saxlanılmışdı.

İntiqam VALEHOĞLU
Ölkə.az