Antiterror şəhidinin atası: “Deyirdi, adam şəhid ola, adı bu küçəyə verilə”

Bu gün ötən ilin sentyabrında Müdafiə Nazirliyinin Qarabağda keçirdiyi antiterror əməliyyatları zamanı şəhid olan kəşfiyyatçı leytenant Elxan Ələkbər oğlu Məmmədlinin doğulduğu gündür.

Ölkə.Az xatırladır ki, Elxan Məmmədli 1997-ci il oktyabrın 13-də İsmayıllı rayonu Zoğallıq kəndində dünyaya göz açıb. 2004-cü ildə Suraxanı rayonu Pərviz İsmayılov adına 278 saylı tam orta məktəbində təhsilinə başlayıb, 2015-ci ildə həmin məktəbin 11-ci sinfini başa vurub.

Məktəbi bitirdikdən sonra Bakı Biznes Universitetinin Dövlət və Bələdiyyə İdarəetməsi fakültəsinə daxil olub, 2019-cu ildə oranı bitirərək məzun olub. 2019-cu ildə İsmayıllı rayon hərbi komissarlığı tərəfindən müddətli həqiqi hərbi xidmətə çağırılıb. Dövlət Sərhəd Xidmətinin Tovuz rayonunda yerləşən N saylı hərbi hissəsində xidmət edən Elxan Məmmədli ordudan tərxis olunduqdan sonra Azərbaycan Silahlı Qüvvələrinin Təlim Tədris Mərkəzində "Ehtiyat zabit hazırlığı" kursu keçib və leytenant hərbi rütbəsini alıb. O, Azərbaycan Respublikası Müdafiə Nazirliyinin Quru Qoşunlarının Silahlı Qüvvələrində müddətdən artıq həqiqi hərbi xidmət hərbi qulluqçusu kimi fəaliyyətə başlayıb. Xocalı, Şuşa, Xankəndi və Qubadlının ətraf ərazilərində hərbi xidmətini davam etdirib. Hərbi xidmət zamanı əldə etdiyi nailiyyətlərə görə 10 fevral 2022-ci ildə komandanlıq tərəfindən fəxri fərmanla təltif edilib.

Daha sonra 15 may 2023-cü ildən 29 iyul 2023-cü ilə kimi "Komando" Dağ Təlimi Mərkəzində keçirilmiş 17-ci qəbul "Komando başlanğıc kursu"nu müvəffəqiyyətlə başa vurub və sertifikata layiq görülüb. E.Məmmədli Komando əməliyyat qrupunda "Kəşfiyyat komandiri" vəzifəsində xidmət göstərib.

Leytenant 2023-cü il sentyabrn 19-da Qarabağda başlanan lokal xarakterli antiterror əməliyyatları zamanı kəşfiyyat komandiri olaraq döyüşə qatılıb, öndə gedərək torpaqlarımızın terrorçulardan azad edilməsində şücaət göstərib. Həmin gün sentyabrn 19-da Xocavəndin azadlığı uğrunda gedən döyüşlərdə qəhrəmancasına şəhid olub.

O, 21 sentyabr 2023-cü ildə İsmayıllının Zoğallıq kənd qəbiristanlığında torpağa tapşırılıb.

Qarabağda başlanan lokal xarakterli antiterror əməliyyatları zamanı qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 07.11.2023-cü il tarixli Sərəncamlarına əsasən Elxan Məmmədli ölümündən sonra "Vətən uğrunda" medalı, eləcə də "Vətənə xidmətə görə" 3-cü dərəcəli ordenlə təltif edilib.

Şəhidimizin mövlud günündə atası Ələkbər Məmmədli xatirələrini Ölkə.Az-la bölüşüb. O deyib ki, Elxan əvvəlcədən şəhid olacağını hiss etmişdi:

“Elxan döyüş bölgəsinə gedən vaxtı dostları video çəkmişdi. “Canavar badi” olaraq ona səslənirlər, o da arzularını deyir.
Hətta Şuşada olanda da dostlarında deyib ki, hiss edirəm, şəhid olacağam. Bunu antiterror əməliyyatlarından çox əvvəl söyləmişdi.
Sonuncu dəfə məzuniyyətə gələndə də belə bir söz demişdi. Yoldaşıma demişdi ki, adam şəhid ola, adı bu küçəyə verilə. O da çox pis olmuşdu, dedi niyə elə deyirsən?”

Şəhid atası oğlu ilə sonuncu dəfə danışdıqları günü isə belə xatırlayır:

“19 sentyabr günü hardasa 12-yə işləmiş olardı, sonuncu dəfə yoldaşıma şəkil atıb. Bildirib ki, hələ heç yerdə paylaşma, vaxtı gələndə paylaşarsan. Anası da narahat olurdu ki, niyə görəsən belə deyirsən? Elxan da deyirdi ki, narahat olası heç nə yoxdur, ağlama, hər şey yaxşı olacaq.
Son anda artıq onlara qabağa getmək barədə tapşırıq veriləndə qrupa bir kəlmə yazdı ki, haqqınızı halal edin.
O zaman içərisində bütün dostları ilə hallalaşıb, hətta o anda, o vəziyyətdə tanıdığı bir insanın doğum günü olduğunu bilib onu belə təbrik eləmişdi. O qədər diqqətcil, mərhəmətli, ürəyiaçıq idi”.

O mənə atdığı sonuncu səsdə maşının Qubadlı rayonunda qalacağını demişdi. Söylədi ki, birdən nəsə olsa, maşını gəlib götürərsən.

Ələkbər bəyin sözlərinə görə, oğlunun ən böyük arzusu general olmaq idi:

“Həbi xidməti başa vurub gələndən sonra 44 günlük müharibə başladı. Könüllü yazılsa da, ehtiyac olmadı deyə çağırmadılar. Onu çağırmadıqlarına görə çox pis olmuşdu. Özünə heç sığışdırmırdı. Elə müharibə təzə bitmişdi ki, yenidən sənədlərini verdi və kurs keçdi. Daha sonra isə birbaşa leytenant rütbəsini aldı. Onun müqavilə müddəti mayda bitmişdi. Yenidən müqavilənin vaxtını 20 illik artırdı. General olmaq istəyirdi”.

Bu gün şəhid ailəsinin ən böyük gileyi isə leytenantın rayonda dəfn edilməsidir:

“Əslində, biz Bakıda yaşayırıq. İndi ağlımız başımıza gəlir ki, səhvə yol vermişik. Bakıda böyüyüb yaşasa da, rayonda dəfn etmişik.
Qardaşım rayonda yaşayır. Bu xəbəri də mənə qardaşım çatdırmışdı. Amma şəhid olduğunu deməmişdi, biz Elxanı yaralı bilirdik. Elə bildik ki, Elxanı İsmayıllıya gətiriblər. Sən demə, onu heç neytral zonadan çıxarmamışdılar. Həmin ərazidən 20 sentyabrda çıxarılıb. Biz artıq İsmayıllıya getmişdik. Hamı tökülüşüb gəlməyə başladı. O anda nəsə düşünə bilmədik. Həmin anda ağlımızın ucundan heç nə keçmirdi. Gedib gətirdilər, elə İsmayıllıda da dəfn etdilər. Heç ağlımıza gəlmədi ki, Elxan həm də rütbəlidir, niyə kənd qəbiristanlığında dəfn olunur, onu şəhidlər Xiyabanında da dəfn etmək olardı”.

Billurə Yunus