2 milyon insanı öldürən səbəb - Çalışan şəxslər diqqətli olun!
Ümumdünya Səhiyyə Təşkilatı (ÜST) və Beynəlxalq Əmək Təşkilatının (BƏT) ilk birgə hesablamalarına görə, 2016-cı ildə istehsalatla bağlı xəstəliklər və xəsarətlər 1,9 milyon insanın ölümünə səbəb olub.
Ölkə.az Yenisabah.az-a istinadən xəbər verir ki, ÜST/BƏT-in 2000-2016-cı illər üzrə İşlə bağlı Xəstəlik və Yaralanma Yükünün Birgə Qiymətləndirilməsi: Qlobal Monitorinq Hesabatına əsasən, işlə bağlı ölümlərin əksəriyyəti tənəffüs və ürək-damar xəstəlikləri nəticəsində baş verir.
Ölümlərin 81 faizi qeyri-infeksion xəstəliklər nəticəsində baş verib. Ölümlərin ən böyük səbəbləri xroniki obstruktiv ağciyər xəstəliyidir (450.000 ölüm). Siyahıda ikinci sırada infarkt (400,000 ölüm), 3-cü işemik ürək xəstəliyi (350,000 ölüm) gəlir. Ölümlərin 19 faizi isə (360.000 ölüm) istehsalat xəsarətləri ilə nəticələnib.
Tədqiqat uzun iş saatları və iş yerində havanın çirklənməsi, astmaya səbəb olan maddələr, kanserogen maddələr, erqonomik risk faktorları və səs-küyə məruz qalma da daxil olmaqla 19 peşə risk faktorunu nəzərdən keçirir. Ən mühüm risk faktoru uzun iş saatlarına məruz qalmaqdır ki, bu da təxminən 750.000 ölümlə əlaqələndirilir. İş yerlərində havanın çirklənməsinə (hissəciklər, qaz, tüstü) məruz qalma 450.000 nəfərin ölümünə səbəb olub.
Hesabat xəbərdarlıq edir ki, işlə bağlı xəstəliklər və xəsarətlər səhiyyə sistemlərini gərginləşdirir, məhsuldarlığı azaldır və ev təsərrüfatlarının gəlirlərinə ciddi təsir göstərir.
Dünyada 2000-2016-cı illər arasında işlə bağlı ölümlər 14 faiz azalıb. Bu, iş yerlərində sağlamlıq və təhlükəsizliyin yaxşılaşdığını göstərə bilər. Bununla belə, uzun iş saatlarına məruz qalma ilə bağlı ürək xəstəlikləri və insultdan ölümlər müvafiq olaraq 41 faiz və 19 faiz artıb. Bu, psixososial peşə risk faktorlarının artmasının nisbətən yeni tendensiyasını əks etdirir.
Birgə ÜST/BƏT qlobal monitorinq hesabatı siyasətçilərə ölkədə, regional və qlobal səviyyədə işlə bağlı sağlamlıq itkilərini izləməyə imkan yaradıb. Bu, işçilərin sağlamlığını yaxşılaşdırmaq və sağlamlıq bərabərliyinə nail olmaq üçün daha diqqətli əhatə dairəsinin müəyyənləşdirilməsinə, planlaşdırılmasına, maya dəyərinin hesablanmasına, həyata keçirilməsinə və qiymətləndirilməsinə gətirib çıxara bilər. Hesabat göstərir ki, daha sağlam, daha təhlükəsiz, daha davamlı və sosial cəhətdən daha ədalətli iş yerləri yaratmaq üçün daha çox fəaliyyətə ehtiyac var.
