Bunlar bələdiyyələrin xeyrinə yox, ziyanınadır - Deputat 

“Bələdiyyələr indiyədək dotasiya və subvenisiya ilə bir çox layihələrə həyata keçirməkdədir. Həmin dotasiya və subvensiyalarda ünvanlılıq göstərilib. Bu gün müzakirəyə çıxarılan “Qrant haqqında” qanun layihəsində bələdiyyələrə sosial layihənin icrası ilə bağlı ünvanlılıq göstərilib. Qanuna dəyişikliyə əsasən bələdiyyələr alacağı qrantla ancaq sosial layihələr həyata keçirə bilər. Daha doğrusu uşaq meydançaları düzəldə, yaşıllıqlar və ya nümunəvi məhəllələr  sala bilərlər. Lakin bu, bələdiyyələrə ziyandan başqa xeyir verməyəcək”.

Ölkə.Az xəbər verir ki, bunu deputat Siyavuş Novruzov parlamentdə “Qrant haqqında” qanun layihəsinə dəyişikliyin müzakirəsi zamanı deyib.

Deputatın sözlərinə görə, bu layihələrə icra olunduqdan sonra həmin uşaq meydançalarını, stadionları, yaşıllığı və nümunəvi həyəti saxlamaq üçün vəsait lazımdır. “Amma bələdiyyənin həmin icra olunan layihələri saxlamaq üçün imkanı və gücü  yoxdur. Təklif edirəm ki, qanuna sosial layihələrlə yanaşı, iqtisadi layihələrin icrası da nəzərdə tutulmalıdır. Bələdiyyələr iqtisadi layihələrdən əldə etdiyi gəlirləri həmin sosial layihələrin saxlanmasına yönəltməlidir”, - deputat qeyd edib.

Mürtəza
Ölkə.Az