Prokuror Aytacın qatilinə cəza istədi

Bakı Ağır Cinayətlər Məhkəməsində Gürcüstan vətəndaşı, 1995-ci il təvəllüdlü İzzət Hüseynovun CM-nin 120.2.4-cü (xüsusi amansızlıqla qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesi davam edib.

Oxu.Az xəbər verir ki, məhkəmə prosesində zərərçəkmişin hüquqi varisi, mərhumun anası İ.Hüseynova ömürlük cəza verilməsini xahiş edib, onun ardınca çıxış edən dövlət ittihamçısı isə təqsirləndirilən şəxsin 20 il müddətinə azadlıqdan məhrum edilməsini istəyib.

Qeyd edək ki, ötən prosesdə təqsirləndirilən şəxsin anası oğlu barəsində ifadə verməyib. Bununla yanaşı, təqsirləndirilən şəxsin atası Hafiz Hüseynov da məhkəməyə teleqram vuraraq xəstə olduğunu və ifadə vermək istəmədiyini bildirib.

Məhkəmənin növbəti prosesi noyabrın 20-ə təyin olunub.

Xatırladaq ki, bu il aprelin 29-da Nizami rayonunun Bəhruz Nuriyev küçəsində İzzət Hüseynov sevdiyi qızı, Aytac Babayevanı (1998-ci il təv.) bıçaqlayaraq, qəsdən öldürüb.

Hadisə aralarında yaranan münaqişə zəminində baş verib. Cinayəti törədən şəxs həmin tarixdə Nizami RPİ-nin əməkdaşları tərəfindən saxlanılıb.

Mərhum A.Babayeva 58 saylı orta məktəbin 11-ci sinfində oxuyub.